Mareko 13:1-37
13 Ya re a tswa mo tempeleng mongwe wa barutwa ba gagwe a mo raya a re: “Moruti, bona! gore maje ano ke a mofuta ofe le gore dikago+ tseno ke tsa mofuta ofe!”
2 Le fa go ntse jalo, Jesu a mo raya a re: “A o bona dikago tse dikgolo tseno?+ Leje ga le kitla le tlogelwa ka gope fano le le mo godimo ga leje le lengwe+ mme le sa digelwa fa fatshe.”+
3 Mme ya re a ntse mo Thabeng ya Lotlhware bolebana le tempele, Petere+ le Jakobe le Johane le Anderea ba simolola go mmotsa kwa thoko ba re:+
4 “Re bolelele, Dilo tseno di tla diragala leng, mme ke eng se e tla nnang sesupo sa fa dilo tseno tsotlhe di laoletswe go tla mo bokhutlong?”+
5 Jalo Jesu a ba raya a re: “Disang gore ope a se ka a lo timetsa.+
6 Ba le bantsi ba tla tla ka leina la me, ba re, ‘Ke nna ene,’ mme ba tla timetsa ba le bantsi.+
7 Mo godimo ga moo, fa lo utlwalela ka dintwa le dipego tsa dintwa, lo se ka lwa tshoga; dilo tseno di tshwanetse go diragala, mme e be e ise e nne bokhutlo.+
8 “Gonne setšhaba se tla tsogologela setšhaba le bogosi bo tsogologele bogosi,+ go tla nna dithoromo tsa lefatshe+ mo mafelong ka go latelana, go tla nna le ditlhaelo tsa dijo.+ Tseno ke tshimologo ya ditlhabi tsa tlalelo.+
9 “Mme lona, itiseng; batho ba tla lo isa kwa dikgotlatshekelong+ tsa mafelo a lo leng mo go one, mme lo tla itewa mo disinagogeng+ lo bo lo emisiwa fa pele ga balaodi le dikgosi ka ntlha ya me, go nna bosupi mo go bone.+
10 Gape, mo ditšhabeng tsotlhe dikgang tse di molemo+ di tshwanetse go rerwa pele.+
11 Mme fa ba lo goga gore ba lo ise, lo se ka lwa tlhobaela go sa le pele kaga se lo tla se buang;+ mme le fa e le eng se lo se newang mo nakong eo, buang sone, gonne ga se lona ba lo buang, mme ke moya o o boitshepo.+
12 Mo godimo ga moo, morwarramotho o tla neela morwarraagwe mo losong, le rre ngwana wa gagwe,+ mme bana ba tla tsogologela batsadi ba bo ba dira gore ba bolawe;+
13 mme lo tla nna ba ba tlhoilweng ke batho botlhe ka ntlha ya leina la me.+ Mme yo o itshokileng go ya bokhutlong+ ke ene yo o tla bolokwang.+
14 “Le fa go ntse jalo, fa lo tshogana ka lo bona selo se se ferosang sebete+ se se bakang kgakgabalo+ se eme fa se sa tshwanelang gone (a mmadi a dirise temogo),+ foo a ba ba kwa Judea ba simolole go tshabela kwa dithabeng.+
15 A monna yo o kwa godimo ga ntlo a se ka a fologa, le fa e le go tsena mo teng a ya go tsaya sepe mo ntlong ya gagwe;+
16 mme a monna yo o mo tshimong a se ka a boela kwa dilong tse di kwa morago a ya go tsaya seaparo sa gagwe sa kafa ntle.+
17 A bo go latlhega basadi ba ba baimana le ba ba anyisang masea mo malatsing ao!+
18 Nnang lo rapele gore go se ka ga diragala ka nako ya mariga;+
19 gonne malatsi ao e tla nna malatsi a pitlagano+ e e leng gore ga e ise e ko e nne gone go tswa tshimologong ya popo e Modimo a neng a e bopa go fitlha ka nako eo, mme e se kitla e nna gone gape.+
20 Tota e bile, fa Jehofa+ a ne a sa khutshwafatsa malatsi ao, go ka bo go se na nama epe e e tla bolokwang. Mme ka ntlha ya ba ba tlhophilweng+ ba a ba tlhophileng+ o khutshwafaditse malatsi.+
21 “Foo, ka tsela e e tshwanang, fa mongwe a ka lo raya a re, ‘Bonang! Keresete ke yo,’ ‘Bonang! Ke yole,’+ lo se ka lwa go dumela.+
22 Gonne go tla tsoga boKeresete ba maaka le baporofeti ba maaka+ mme ba tla dira ditshupo le dikgakgamatso+ gore ba timetse, fa go kgonega, ba ba tlhophilweng.+
23 Jaanong lona, disang;+ ke lo boleletse dilo tsotlhe go sa le pele.+
24 “Mme mo malatsing ao, morago ga pitlagano eo, letsatsi le tla fifala, le ngwedi ga e na go ntsha lesedi la yone,
25 mme dinaledi di tla bo di wa kwa legodimong, le maatla a a mo magodimong a tla reketlisiwa.+
26 Mme go tswa foo ba tla bona Morwa motho+ a tla a le mo marung ka maatla a magolo le kgalalelo.+
27 Mme go tswa foo o tla romela baengele mme ba tla phutha ba ba tlhophilweng+ ba gagwe go tswa kwa diphefong tse nnè, go tswa ntlheng ya lefatshe go ya ntlheng ya legodimo.+
28 “Jaanong ithuteng setshwantsho seno ka setlhare sa mofeige: Ka bonako fela fa kalana ya sone e nna nana mme e ntsha matlhare a yone, lo a itse gore selemo se gaufi.+
29 Ka tsela e e tshwanang le lona, fa lo bona dilo tseno di diragala, itseng gore o gaufi, fa dikgorong.+
30 Ammaaruri ke a lo raya ka re kokomana eno ga e na go feta ka gope go fitlha dilo tseno tsotlhe di diragala.+
31 Legodimo+ le lefatshe di tla feta, mme mafoko+ a me one ga a na go feta.+
32 “Ka ga letsatsi leo kgotsa nako ga go na ope yo o itseng, le fa e le baengele kwa legodimong kgotsa Morwa, fa e se Rara.+
33 Nnang lo lebile, nnang lo tsogile,+ gonne ga lo itse gore nako e e tlhomilweng e leng.+
34 Go tshwana le motho yo o tsayang loeto a ya nageng e e kgakala+ yo o neng a tlogela ntlo ya gagwe a ba a naya batlhanka ba gagwe taolo, mongwe le mongwe tiro ya gagwe, a ba a laela molebedi wa kgoro gore a nne a disitse.
35 Jalo nnang lo disitse,+ gonne ga lo itse gore mong wa ntlo o tla leng, e ka ne e le maitseboa kgotsa bosigogare kgotsa fa mokoko o lela kgotsa go sa le phakela;+
36 gore fa a goroga ka tshoganyetso, a se lo fitlhele lo robetse.+
37 Mme se ke se lo rayang ke se raya botlhe, Nnang lo disitse.”+
