PEBRERO 13, 2024
RUSSIA

Nakapokus sa Karangalang Paglingkuran si Jehova

I-PLAY

Malapit nang ilabas ng Vyselkovskiy District Court of the Krasnodar Territory ang hatol nito sa kaso nina Brother Yevgeniy Bochko, Vladimir Kolesnikov, Aleksey Shubnikov, Vitaliy Ushakov, at Valeriy Vechkayev. Wala pang hinihiling ang prosecutor na parusa para sa kanila.

Profile

Yevgeniy Bochko

Ipinanganak: 1975 (Novoberezansky, Krasnodar Territory)

Maikling Impormasyon: Isang maintenance engineer

Nanalangin siya sa Diyos na mahanap niya sana ang tunay na relihiyon. Nabautismuhan bilang Saksi ni Jehova noong 1998

Napangasawa si Anna noong 2009

Mayroong multiple sclerosis

Personal na mga Komento

Saan ka nagpokus habang iniimbestigahan ka at nililitis?

Lagi kaming nananalangin ng asawa ko na mapapurihan sana namin ang pangalan ni Jehova. At nagawa namin iyon. Habang binabasa ng isa sa mga imbestigador ang mga dokumento sa kaso ko, marami siyang itinanong sa amin tungkol sa mga Saksi ni Jehova. May 17 dokumento sa kaso, at bawat isa ay mga 100 hanggang 350 pahina ang haba. Lumitaw ang pangalan ni Jehova sa halos lahat ng pahina. Isang malaking karangalan na maipakilala ang pangalan niya.

Vladimir Kolesnikov

Ipinanganak: 1946 (Ukraine)

Maikling Impormasyon: Nagretiro sa militar. Pagkatapos, nagtrabaho sa isang minahan

Napangasawa si Zinaida noong 1979. May dalawang anak na babae at isang anak na lalaki. Namatay si Zinaida noong 2020

Magkasabay sila ng asawa niya na nakipag-aral ng Bibliya sa mga Saksi ni Jehova. Pareho silang nabautismuhan noong 1995

Personal na mga Komento

Ano ang nakatulong sa iyo na maging masaya sa kabila ng mga pagsubok?

Hindi laging madali na maharap ang maraming hamon sa buhay, kaya minsan nasisiraan din ako ng loob. Pero natutuhan kong mapaglabanan iyon. Nananalangin ako at nagbabasa ng mga publikasyong batay sa Bibliya. Mas lalo kong napahalagahan ngayon ang Salita ng Diyos, at natutuhan ko rin na importanteng sabihin kay Jehova ang lahat ng inaalala ko. Na-realize ko na sinusubukan ko palang solusyunan dati ang mga problema ko nang ako lang. Ngayon, nasasabi ko na kay Jehova ang mga nararamdaman at inaalala ko. Dahil doon, nananatili akong masaya at panatag.

Aleksey Shubnikov

Ipinanganak: 1982 (Nizhnevartovsk, Tyumen Region)

Maikling Impormasyon: Naka-wheelchair dahil sa isang aksidenteng puminsala sa gulugod niya noong 16 siya. Gustong-gusto niya ang malinaw na paliwanag ng Bibliya tungkol sa pagdurusa

Nabautismuhan noong 2008

Personal ng mga Komento

Ano ang natutuhan mo sa nararanasan mo ngayong pag-uusig?

Kapag nakakabasa ako noon ng karanasan ng mga kapatid na nagsasabing nakakadama daw sila ng kapayapaan sa kabila ng pagsubok, naiisip ko, ‘Posible ba talaga iyon?’ Pero noong halughugin ang bahay ko, pagtatanungin ako, at papuntahin ako sa korte, kalmado lang ako. Napatunayan kong tinutulungan ako ni Jehova at posible palang maging masaya kahit may pagsubok. Talagang ipinagpapasalamat ko ang tulong ni Jehova at ang karangalang mapaglingkuran siya.

Vitaliy Ushakov

Ipinanganak: 1980 (Khatukay, Republic of Adygeya)

Maikling Impormasyon: Isang mekaniko ng kotse. Nalaman niya ang katotohanan mula sa nanay niya. Gustong-gusto niya ang pangako ng Bibliya tungkol sa magandang kinabukasan. Nabautismuhan noong 1995

Napangasawa si Irina noong 2006. Mayroon silang dalawang anak na lalaki

Personal na mga Komento

Ano ang nakatulong sa iyo na magtiis habang nasa pretrial detention center?

Noong unang isa at kalahating buwan ko sa bilangguan, wala akong Bibliya. Kaya isinusulat ko sa isang notebook ang mga tekstong naaalala ko, pati na ang mga naiisip ko sa bawat teksto. Talagang nakatulong iyon sa akin noong nasa bartolina ako. Nasuri ko ang nararamdaman ko. Mas malapít na ako ngayon kay Jehova, at mas determinado akong magpagabay sa kaniya.

Valeriy Vechkayev

Ipinanganak: 1973 (Vyselki, Krasnodar Territory)

Maikling Impormasyon: Isang interior finisher. Hangang-hanga siya sa mataas na pamantayan ng pamumuhay na nasa Bibliya at kung paano ito sinusunod ng mga Saksi ni Jehova. Nabautismuhan noong 1999

Napangasawa niya si Irina noong 1996. Mayroon silang dalawang anak na lalaki at isang anak na babae

Personal na mga Komento

Paano ka tinutulungan ni Jehova na makayanan ang pagsubok na ito?

Tinutulungan ako ni Jehova sa maraming paraan. Ipinapanalangin ako ng mga kapatid, nagbibigay sila ng pinansiyal na tulong, at pinapatibay nila ako. Naging mas maliwanag din sa akin na malapit na ang bagong sanlibutan dahil natutupad na ang mga hula sa Bibliya. Kaya ang mga pagsubok ko ngayon ay para lang mga ulap—iba-iba ang hugis at laki, pero mawawala rin. Nagpapasalamat ako kay Jehova na binibigyan niya ako ngayon ng lakas para makapagtiis.

Nagtitiwala tayo na tutulungan ni Jehova na manatiling masaya at matatag ang mga kapatid na ito at ang lahat ng umaasa sa tulong niya.—Awit 141:8.

Time Line

Pebrero 11, 2022

Sinampahan ng kasong kriminal sina Yevgeniy, Aleksey, Vitaliy, at Valeriy
Pebrero 13, 2022

Hinalughog ang mga bahay. Pinagtatanong sina Yevgeniy, Aleksey, at Vitaliy. Ikinulong si Vitaliy sa isang temporary detention center
Pebrero 15, 2022

Ikinulong si Vitaliy sa isang pretrial detention center
Pebrero 16, 2022

Pinagbawalang umalis ng kanilang lugar sina Yevgeniy at Aleksey
Pebrero 18, 2022

Pinagbawalang umalis ng kanilang lugar si Valeriy
Pebrero 21, 2022

Sinampahan ng kasong kriminal si Vladimir
Marso 15, 2022

Pinagbawalang umalis ng kanilang lugar si Vladimir. Pinagsama ang mga kasong kriminal
Setyembre 8, 2022

Pinalaya si Vitaliy mula sa pretrial detention at inilagay sa house arrest
Oktubre 10, 2022

Pinayagang umalis ng bahay si Vitaliy pero pinagbawalang umalis ng kanilang lugar
Mayo 31, 2023

Sinampahan ng kasong kriminal

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE