Hosea 1:1-11
1 Kwaghôron u Yehova u va hen Hosea* wan u Beeri, sha ayange a Ushia+ man Yotam+ man Ahashi+ kua Hesekia,+ utor mba Yuda,+ man sha ayange a Yeroboam+ wan u Yoashi+ tor u Iserael la.
2 Zum u Yehova hii u ôron mkaanem nam sha zwa u Hosea la, Yehova kaa a Hosea ér: “Za, za vôso kwase u una va hingir idyakwase,* shi una mar u ônov sha idya* yô, sha ci u tar ne yem idya i eren,* u gema ijime a Yehova gbindigh gbindigh.”+
3 Tsô a za vôso Gomer wan u Dibelaim, nahan a wa iyav a mar un wannomso.
4 Yehova maa kaa a na ér: “Ii un iti wer Yesereel,* gadia ica a gba ga tsô me pine ya u Yehu+ kwagh sha awambe a i hee inya ken Yesereel la, shi me bee a hementor hen ya u Iserael kera.+
5 Sha iyange la me kever ada u Iserael shin Pev* u Yesereel.”
6 Shi a wa iyav a mar wan u kwase. Nahan A kaa a na ér: “Ii un iti wer Lo-ruhama,* gadia me kera zungwe ya u Iserael mhôônom ga,+ sha ci u me zenda ve kera kpee je.+
7 Kpa me zungwe ya u Yuda+ mhôônom, man mo Yehova Aôndo ve, me yima ve.+ Me yima ve a lu sha ada shin sha sanker shin sha utya shin sha anyinya shin sha mbaanyinyav ga.”+
8 Va den Lo-ruhama atumba yô, shi a wa iyav a mar wan u nomso.
9 Tsô A kaa ér: “Ii un iti wer Lo-ami,* sha ci u ne mba ior av ga, mo kpaa me lu u wen ga.
10 “Nahan kpa iyenge i Mbaiserael* ia lu er waarawa u shin zegemnger u a fatyô u karen u shin ôron u ingyegh ga la nahan.+ Man hen ijiir i yange m kaa a ve mer, ‘Ne mba ior av ga’ la,+ me kaa a ve mer, ‘Ne mba ônov mba Aôndo u uma.’+
11 A kohol ior i Yuda man i Iserael cii vea lu gungur môm,*+ vea tsua or môm nana hemen ve, vea due ken tar la kera, gadia iyange i Yesereel+ ia lu iyange i vesen je.
Ngeren mba shin kpe
^ Gbenda u zevera u yilan Hoshaia. Inja na yô ér, “Yehova Yima.”
^ Shin “gbagakwase.”
^ Shin “gbaga u eren.”
^ Shin “gbaga u eren.”
^ Inja na yô ér, “Aôndo Una Ta Ivor.”
^ Shin “Pev u Lun Gburumaa.”
^ Inja na yô ér, “I Zungwe Mhôônom Ga.”
^ Inja na yô ér, “Ka Ior Av Ga.”
^ Zwa Heberu, “ônov mba Iserael.”
^ Shin “ken mzough.”
