የሆዋ ብዛዕባ እቶም ኣብ ሰማይ ዘለዉ ስድራ ቤቱ ኽንፈልጥ ይደልየና እዩ። ኣብቶም ስድራ ቤቱ “ደቂ ኣምላኽ” ዚብሃሉ መላእኽቲ ኣለዉ። (እዮብ 38:7) መጽሓፍ ቅዱስ ብዛዕባ መላእኽቲ እንታይ ይብል፧ መላእኽቲ ንሰባት ብኸመይ ይጸልውዎም፧ ኵሎም መላእኽቲ ኽፍሊ ስድራ ቤት ኣምላኽ ድዮም፧

1. መላእኽቲ መን እዮም፧

የሆዋ ንመላእኽቲ፡ ንምድሪ ቕድሚ ምፍጣሩ እዩ ፈጢርዎም፧ መላእኽቲ ኸም የሆዋ ኣብ ሰማይ ዚነብሩ ብዓይኒ ዘይረኣዩ መናፍስቲ እዮም። (እብራውያን 1:14) ሚልዮናት መላእኽቲ ኣለዉ፣ ነፍሲ ወከፎም ከኣ ነናቶም መንነት ኣለዎም። (ራእይ 5:11) ‘ንድምጺ የሆዋ ተኣዚዞም ቃሉ ይፍጽሙ’ እዮም። (መዝሙር 103:20) ብግዜ ጥንቲ፡ የሆዋ መልእኽቱ ንህዝቡ ኼብጽሑሎምን ኪድግፍዎምን ኬናግፍዎምን ኢሉ ሓድሓደ ግዜ መላእኽቲ ልኢኹ እዩ። ሎሚ፡ መላእኽቲ ንክርስትያናት፡ ናብቶም ብዛዕባ ኣምላኽ ኪምሃሩ ዚደልዩ ሰባት ይመርሕዎም እዮም።

2. ሰይጣንን ኣጋንንቱን መን እዮም፧

ገሊኦም መላእኽቲ ንየሆዋ እሙናት ኰይኖም ኣይቀጸሉን። እቲ ቐዳማይ ዝዓለወ መልኣኽ፡ “እቲ ንብዘላ ዓለም ዜስሕታ ዘሎ ድያብሎስን ሰይጣንን ዚብሃል” እዩ። (ራእይ 12:9) ሰይጣን ኣብ ልዕሊ ኻልኦት ገዛኢ ኪኸውን ይደሊ እዩ፣ ስለዚ፡ ኣብ መጀመርታ ነቶም ቀዳሞት ሰባት፡ ጸኒሑ ንኻልኦት መላእኽቲ ኣብቲ ዕልወቱ ኺሓብሩ ጸልይዎም። እቶም ዓለወኛታት መላእኽቲ ኸኣ ኣጋንንቲ ይብሃሉ። የሆዋ ንዓታቶም ካብ ሰማይ ናብ ምድሪ ሰጒጕዎም እዩ፣ ኣብ መጻኢ ድማ ኪጠፍኡ እዮም።—ራእይ 12:9, 12 ኣንብብ።

3. ሰይጣንን ኣጋንንቱን ብኸመይ እዮም ኬስሕቱና ዚፍትኑ፧

ሰይጣንን ኣጋንንቱን ብኣጋንንታዊ ተግባራት ወይ ብመናፍስትነት ኣቢሎም ንብዙሓት ሰባት ኬስሕቱ ይፍትኑ እዮም። መናፍስትነት ኪብሃል ከሎ፡ ሰባት ምስ መናፍስቲ ንምዝርራብ ዚፍትኑሉ ሕማቕ ተግባር እዩ። ንኣብነት፡ ገሊኦም ሰባት ንቘጸርቲ ኸዋኽብትን ንጠንቈልትን ንደብተራታትን ይጥይቑ እዮም። ገሊኦም ከኣ ምስ መናፍስትነት እተተሓሓዘ ፈውሲ ይደልዩ እዮም። ገሊኦም ሰባት ድማ ምስ ምዉታት ከም እተዛረቡ መሲልዎም ይታለሉ እዮም። የሆዋ፡ “ናብ ጠየቕቲ መናፍስቲ ኣይትኺዱ፡ ንጠንቈልቲ ድማ ኣይትሕተቱ” ኢሉ ኣጠንቂቑና ኣሎ። (ዘሌዋውያን 19:31) ነዚ መጠንቀቕታ እዚ ዝሃበና፡ ካብ ሰይጣንን ኣጋንንቱን ምእንቲ ኼዕቍበና ኢሉ እዩ። ንሳቶም ጸላእቲ ኣምላኽ እዮም፣ ኪጐድኡና እውን ይደልዩ እዮም።

 ኣዕሚቝካ ዅዓት

6. ኣብቲ ምስ ሰይጣንን ኣጋንንቱን ዚግበር ቃልሲ ተዓወት

ንኣጋንንቲ ዚገዝኦም፡ ሰይጣን እዩ። እሙናት መላእኽቲ ግና ብሚካኤል እቲ ሊቀ መላእኽቲ እዮም ዚምርሑ፣ ሚካኤል ንየሱስ እተዋህቦ ኻልእ ስም እዩ። እሞ ደኣ ሚካኤል ዘለዎ ሓይሊ ኽሳዕ ክንደይ እዩ፧ ራእይ 12:7-9 ኣንብብ፡ ድሕሪኡ በዚ ሕቶታት ተመያየጡ፦

• መን ይሕይል፧ ሚካኤልን መላእኽቱንዶ፡ ወይስ ሰይጣንን ኣጋንንቱን፧

• ሰዓብቲ የሱስ ንሰይጣንን ንኣጋንንቱን ኪፈርህዎም ዘለዎምዶ ይመስለካ፧

ኣብቲ ምስ ሰይጣንን ኣጋንንቱን ዚግበር ቃልሲ ኽትዕወት ትኽእል ኢኻ። ያእቆብ 4:7 ኣንብብ፡ ድሕሪኡ በዚ ሕቶ ተመያየጡ፦

• ከመይ ጌርካ ኢኻ ንርእስኻ ኻብ ሰይጣንን ኣጋንንቱን ክትከላኸለላ እትኽእል፧

 ጽማቝ

እሙናት መላእኽቲ ይሕግዙና እዮም። ሰይጣንን ኣጋንንቱን ጸላእቲ የሆዋ እዮም፣ ብመናፍስትነት ገይሮም ድማ፡ ንሰባት የስሕቱ እዮም።

ክለሳ

• መላእኽቲ የሆዋ ንሰባት፡ ብዛዕባ የሆዋ ኺምሃሩ ብኸመይ ይሕግዝዎም ኣለዉ፧

• ሰይጣንን ኣጋንንቱን መን እዮም፧

• ካብ መናፍስትነት ክትርሕቕ እትደሊ ስለምንታይ ኢኻ፧