Deuteronomio 7:1-26
7 “Ora Yehova, boso Dios, hiba boso na e pais ku boso ta bai drenta pa boso konkistá,+ lo e kore ku e nashonnan grandi ku tin boso dilanti;+ sí, lo e kore ku shete nashon ku ta mas grandi i mas poderoso ku boso,+ esta, e heteonan, e guirgasitanan, e amoreonan,+ e kananeonan, e perezitanan, e heveonan i e yebuseonan.+
2 Yehova, boso Dios, lo entregá nan den boso man, i boso lo derotá nan.+ Boso tin ku destruí nan sin falta.+ No sera niun pakto ku nan ni tene miserikòrdia di nan.+
3 No laga boso famianan uni ku otro den matrimonio.* No laga boso yu muhé kasa ku nan yu hòmber, ni laga boso yu hòmber kasa ku nan yu muhé,+
4 pasobra nan lo pone boso yunan stòp di sirbi Dios i bai sirbi otro dios.+ E ora ei, Yehova lo rabia ku boso, i lo e kaba ku boso rápidamente.+
5 Mas bien, esaki ta loke boso tin ku hasi ku nan: Basha nan altarnan abou, kibra nan pilánan sagrado,+ kap nan palunan sagrado*+ i kima nan imágennan.+
6 Boso ta un pueblo santu pa Yehova, boso Dios. For di tur e pueblonan ku tin riba tera, Yehova, boso Dios, a skohe boso pa boso bira su pueblo, su propiedat spesial.*+
7 Akaso ta pasobra boso tabata e pueblo di mas grandi Yehova a demostrá kariño na boso i skohe boso?+ Nò, di tur e pueblonan, boso tabata e pueblo di mas chikitu.+
8 Mas bien, Yehova a skohe boso pasobra e ta stima boso i pasobra el a kumpli ku loke el a hura boso antepasadonan.+ Ta p’esei Yehova a reskatá boso i saka boso ku su man poderoso for di e pais kaminda boso tabata katibu;+ sí, el a reskatá boso for di poder* di Fárao, e rei di Egipto.
9 Boso sa bon bon ku Yehova, boso Dios, ta e Dios berdadero, e Dios fiel, ku ta kumpli ku su pakto; te na e di mil generashon, e ta demostrá su amor leal na hende ku ta stim’é i ku ta kumpli ku su mandamentunan.+
10 Lo e no keda sin destruí hende ku ta odi’é. Lo e duna nan nan kastigu meresí.*+ Lo e no tarda pa kastigá hende ku ta odi’é. Lo e laga nan paga pa esei.
11 P’esei, sòru pa semper boso kumpli ku e mandamentunan, e reglanan i e leinan ku mi ta duna boso awe.
12 Si boso sigui skucha e leinan akí i obedesé nan i semper kumpli ku nan, Yehova, boso Dios, lo kumpli ku su pakto i demostrá amor leal na boso, manera el a hura boso antepasadonan.
13 Lo e stima boso, bendishoná boso i laga boso bira masha hopi. Sí, lo e bendishoná boso ku hopi yu,*+ ku hopi kosecha, grano, biña nobo, zeta,+ i ku hopi bisé i lamchi na e pais ku el a hura boso antepasadonan ku lo e duna boso.+
14 Di tur e pueblonan, boso lo bira e pueblo di mas bendishoná.+ Tur hende hòmber i tur hende muhé entre boso lo tin yu, asta boso bestianan lo tin yu.+
15 Yehova lo libra boso di tur malesa; lo e no laga boso haña niun di e malesanan teribel ku boso tabata konosé na Egipto.+ Mas bien, lo e laga tur hende ku ta odia boso haña e malesanan ei.
16 Boso tin ku destruí* tur e pueblonan ku Yehova, boso Dios, entregá den boso man.+ Boso* no mester sinti duele di nan+ ni boso no mester sirbi nan diosnan,+ pasobra esei lo ta un trampa pa boso.+
17 Podisé boso ta bisa den boso mes:* ‘E nashonnan akí ta muchu mas grandi ku nos. Ta kon nos ta hasi kore ku nan?’+
18 Wèl, no tene miedu di nan.+ Boso mester kòrda kiko Yehova, boso Dios, a hasi ku Fárao i ku henter Egipto.+
19 Kòrda tur loke boso a mira; kòrda kon Yehova, boso Dios, a usa su man fuerte i brasa poderoso pa kastigá* nan.+ Kòrda tur e señalnan i e milagernan+ ku Dios a usa ora el a saka boso for di einan. Manera Yehova, boso Dios, a trata e egipsionan, lo e trata e pueblonan ku boso tin miedu di dje.+
20 Yehova, boso Dios, lo laga e pueblonan ei sinti nan desesperá.* I tur hende ku keda na bida+ i ku bai skonde pa boso lo muri.
21 No spanta pa nan motibu, pasobra Yehova, boso Dios, ta ku boso.+ E ta un Dios grandi ku hende mester teme i respetá.+
22 Pokopoko pero sigur, Yehova, boso Dios, lo kore ku e nashonnan ei for di boso dilanti.+ Boso lo no tin mag di kaba ku e nashonnan ei den un solo biaha pa bestia salbahe no bira hopi i forma un peliger pa boso.
23 Yehova, boso Dios, lo entregá e nashonnan den boso man. Un pa un, lo e derotá nan, te ora ku e kaba ku nan.+
24 Lo e entregá nan reinan den boso man,+ i niun hende lo no kòrda nan nòmber mas.*+ Niun hende lo no por resistí boso.+ Boso lo destruí nan kompletamente.+
25 Boso mester kima e imágennan di nan diosnan den kandela.+ No deseá e plata ni e oro ku tin riba e imágennan ni tuma e oro ni e plata pa boso mes+ pa nan no bira un trampa pa boso, pasobra nan ta repugnante pa Yehova, boso Dios.+
26 No trese nada ku Dios ta odia den boso kas pa Dios no destruí boso huntu ku nan. Boso mester odia e kosnan ei ku henter boso kurason, pasobra nan mester ser destruí.”*
Nota
^ Òf: “No sera aliansa matrimonial ku nan.”
^ Òf: “su poseshon presioso.”
^ Lit.: “man.”
^ Òf: “Lo e paga nan bèk den nan kara.”
^ Lit.: “bendishoná fruta di boso barika.”
^ Lit.: “habraká.”
^ Lit.: “Boso wowo.”
^ Lit.: “den boso kurason.”
^ Òf: “pa husga.”
^ Òf: “laga nan drenta pániko; laga nan sinti nan terorisá.”
^ Lit.: “i boso lo kita nan nòmber for di bou di shelu.”
