Deuteronomio 13:1-18
-
Loke mester a hasi ku hende apóstata (1-18)
13 “Suponé ku un profeta òf un persona ku ta pronostiká futuro pa medio di soño presentá entre boso i e ta duna boso un señal òf e ta pronostiká algu.
2 Den kaso ku e señal òf e kos ku el a pronostiká sosodé i e bisa boso: ‘Ban sigui otro dios, i laga nos sirbi nan’ (esta, dios ku boso no konosé),
3 no skucha e palabranan di e profeta òf di e persona ei ku ta pronostiká futuro pa medio di soño,+ pasobra ta Yehova, boso Dios, ta tèst boso+ pa wak si boso ta stima Yehova, boso Dios, ku henter boso kurason i ku henter boso alma.*+
4 Ta Yehova, boso Dios, boso mester adorá i ta p’e boso mester tin rèspèt profundo.* Ta su mandamentunan boso mester kumpli kuné i ta su stèm boso mester skucha. E ta e persona ku boso mester sirbi i ta na dje boso mester tene duru.+
5 Pero boso mester mata e profeta òf e persona ku ta pronostiká futuro pa medio di soño,+ pasobra el a instigá rebelion kontra Yehova, boso Dios, e persona ku a saka boso for di Egipto i reskatá boso for di kaminda boso tabata katibu. E profeta òf e persona ei a purba di desviá boso for di e kaminda ku Yehova, boso Dios, a manda boso sigui. Boso tin ku eliminá loke ta malu for di entre boso.+
6 Suponé ku bo ruman hòmber, esta, e yu di bo mama, òf bo yu hòmber òf bo yu muhé òf bo esposa stimá òf bo mihó amigu purba di konvensé bo den sekreto, bisando: ‘Ban sirbi otro dios.’+ E diosnan ei ta dios ku ni abo ni bo antepasadonan no tabata konosé;
7 nan ta dios di e pueblonan rònt di boso, ku ta keda sea serka òf leu di boso, sí, for di kualke parti di e pais.
8 No laga e persona ei konvensé bo ni no skuch’é.+ Bo no mester sinti duele di dje ni tene kompashon kuné ni tapa kos p’e.
9 Al kontrario, bo tin ku mat’é sigur.+ Abo, e persona ku el a purba di desviá, mester ta promé pa piedr’é mata. Despues, henter e pueblo lo piedr’é.+
10 Piedr’é te ora e muri,+ pasobra el a purba di pone bo bandoná Yehova, bo Dios, e persona ku a saka bo for di Egipto, kaminda bo tabata katibu.
11 Anto henter Israel lo tende loke a pasa i haña miedu, i nunka mas niun hende entre boso lo bolbe hasi algu malu asina.+
12 Suponé ku boso tende lo siguiente den un di e statnan ku Yehova, boso Dios, duna boso pa biba aden:
13 ‘Tin algun hòmber ku no ta sirbi pa nada ta kana rònt ku intenshon di desviá e habitantenan di nan stat; nan ta bisa e habitantenan: “Ban sirbi otro dios,” dios ku boso no konosé.’
14 Boso mester investigá e asuntu bon i hasi sigur ku esei ta bèrdat.+ Si resultá ku di bèrdat e kos repugnante ei a tuma lugá den boso pueblo,
15 boso mester mata e habitantenan di e stat ei ku spada.+ Destruí e stat i tur loke tin den dje ku spada, inkluso e tounan di bestia.+
16 Kaba, boso tin ku trese henter e botin di e stat na e plenchi públiko i pega e stat na kandela. E botin kompleto lo sirbi komo un ofrenda kimá na Yehova, boso Dios. E stat lo keda un ruina pa semper. No tin mag di rekonstruí e stat ei nunka mas.
17 Boso* no tin mag di kohe nada ku a ser kondená na destrukshon.*+ E ora ei, Yehova lo no keda rabiá ku boso; lo e tene miserikòrdia i kompashon ku boso i lo e multipliká boso, manera el a hura boso antepasadonan.+
18 Pues, boso mester obedesé* Yehova, boso Dios, kumpliendo ku tur su mandamentunan ku mi ta duna boso awe. Asina, boso ta hasi loke ta korekto den bista di Yehova, boso Dios.”+
