Deuteronomio 4:1-49
4 “Israel, skucha awor e mandamentunan i e leinan ku mi ta bai siña boso pa boso por kumpli ku nan. Si boso kumpli ku nan, boso lo keda na bida+ i boso lo drenta e pais ku Yehova, e Dios di boso antepasadonan, ta bai duna boso, i boso lo konkistá e pais ei.
2 No agregá nada na e instrukshonnan ku mi ta duna boso ni kita nada for di nan.+ Kumpli ku e mandamentunan di Yehova, boso Dios, ku mi ta duna boso.
3 Boso a mira ku boso mes wowo loke Yehova a hasi den kaso di Baal di Péòr. Yehova, boso Dios, a eliminá for di entre boso tur hende ku a sigui Baal di Péòr.+
4 Pero boso tur ku a keda fiel na Yehova, boso Dios, ta na bida awe.
5 Tende, mi a siña boso e mandamentunan i e leinan,+ manera Yehova, mi Dios, a manda mi hasi. Asina, boso por kumpli ku nan ora boso ta na e pais ku boso ta bai konkistá.
6 Kumpli ku nan fielmente,+ pasobra esei lo laga e nashonnan mira ku boso ta sabí+ i ku boso tin komprondementu.+ Ora nan tende di tur e mandamentunan akí, nan lo bisa: ‘E nashon grandi akí sin duda ta un pueblo sabí, i nan tin komprondementu.’+
7 Nos nashon no ta di kompará ku niun otro nashon. E diosnan di e nashonnan no ta hala serka nan. Pero Yehova, nos Dios, ta hala serka nos ki ora ku nos sklama na dje.+
8 I ta kua nashon grandi tin mandamentu i lei hustu manera tur e leinan akí ku mi ta duna boso awe?+
9 Pero tene kuidou!* Wak pa boso no lubidá e kosnan ku boso a mira. Mantené nan bibu den boso kurason durante henter boso bida i konta boso yunan i boso ñetunan loke boso a mira.+
10 Dia ku boso a para dilanti di Yehova, boso Dios, na Hórèb, Yehova a bisa mi: ‘Reuní e pueblo pa nan skucha mi palabranan.+ Asina nan por siña kon pa demostrá rèspèt profundo pa mi*+ tur e dianan ku nan ta biba riba tera i pa nan por siña nan yunan demostrá rèspèt profundo pa mi.’+
11 Pues, boso a hala serka i para na pia di e seru. E seru tabata na kandela, i e vlamnan tabata yega te na shelu.* Tabata reina un skuridat i tabatin nubia diki i skur.+
12 Yehova a kuminsá papia ku boso for di meimei di e kandela.+ Boso tabata tende un persona papia, pero boso no por a mir’é.+ Ta un stèm so boso a tende.+
13 Anto el a hasi su pakto konosí na boso,+ esta, E Dies Mandamentunan.*+ I el a manda boso kumpli ku nan, i despues el a skirbi nan riba dos tabla di piedra.+
14 Na e okashon ei, Yehova a manda mi siña boso e mandamentunan i e leinan ku boso mester kumpli kuné na e pais ku boso ta bai drenta pa konkistá.
15 Dia ku Yehova a papia ku boso for di meimei di e kandela na Hórèb, boso no a mira nada den e kandela. Pues, tene kuidou
16 pa boso no komportá boso mes na un manera malbado i traha un imágen den kualke forma òf figura, sea ta imágen den forma di hòmber òf muhé+
17 òf den forma di bestia ku tin riba tera òf di para ku ta bula den shelu+
18 òf den forma di bestia ku ta lastra riba tera òf di piská ku tin den awa.+
19 I ora boso hisa boso kara na shelu i mira solo, luna i strea, sí, tur loke tin den shelu,* no kai den tentashon pa bùig pa nan i adorá nan,+ pasobra ta Yehova, boso Dios, a krea nan pa tur pueblo bou di shelu.
20 I Yehova a skohe boso, i el a saka boso for di Egipto, kaminda boso tabata sufri teriblemente. Boso tabata komo si fuera den un fòrnu pa dirti heru. El a saka boso pa boso bira su pueblo, sí, su propiedat,*+ manera boso ta awe.
21 Yehova a rabia ku mi pa boso motibu.+ Anto el a hura ku lo e no laga mi krusa riu Yordan i drenta e pais bunita ku Yehova, boso Dios, ta bai duna boso komo herensia.+
22 Pues, lo mi muri den e pais akí. Lo mi no krusa riu Yordan,+ pero boso sí lo krus’é i konkistá e pais bunita ei.
23 Sòru pa boso no lubidá e pakto ku Yehova, boso Dios, a sera ku boso.+ No traha niun imágen den forma di un di e kosnan ku Yehova, boso Dios, a prohibí boso,+
24 pasobra Yehova, boso Dios, ta manera un kandela destruktivo;+ sí, e ta un Dios ku ta eksigí pa hende adorá e so.*+
25 Asta despues ku boso tin basta tempu ta biba na e pais i boso tin yu i ñetu, si boso kuminsá hasi maldat i traha imágen+ den kualke forma, i si boso hasi loke ta malu den bista di Yehova, boso Dios, pa ofend’é,+
26 mi ta laga shelu i tera ta mi testigu awe ku boso sigur lo disparsé rápidamente for di e pais ku boso ta bai konkistá ora ku boso krusa riu Yordan. Boso lo no biba largu einan, pasobra boso nashon lo ser destruí kompletamente.+
27 Yehova lo plama boso entre e pueblonan.+ Ta un par di boso so lo sobrebibí+ na e paisnan kaminda Yehova lo manda boso.
28 Na e paisnan ei, boso lo tin ku sirbi e diosnan di palu i di piedra ku man di hende a traha,+ sí, dios ku no por mira ni tende ni kome ni hole.
29 Pero ora boso ta ayanan, si boso buska Yehova, boso Dios, boso lo hañ’é sigur,+ basta boso busk’é ku henter boso kurason i ku henter boso alma.*+
30 Den futuro, ora ku tur e kosnan akí pasa ku boso i boso ta sufriendo, boso lo bolbe serka Yehova, boso Dios, i boso lo obedes’é.*+
31 Yehova, boso Dios, ta un Dios miserikòrdioso.+ Lo e no bandoná boso ni kaba ku boso ni lubidá e pakto ku el a sera ku boso antepasadonan.+
32 Awor, ban bèk den pasado, promé ku boso tempu, for di dia ku Dios a krea hende riba tera. Buska for di un punta di shelu te na e otro punta di shelu. Akaso algu maravioso asina a yega di tuma lugá? Akaso hende a yega di tende algu similar?+
33 Akaso tabatin otro pueblo ku, meskos ku boso, a tende Dios papia for di meimei di kandela i keda na bida?+
34 Akaso a yega di sosodé ku Dios a purba di libra un nashon for di meimei di un otro nashon? El a yega di usa kastigu,* señal, milager,+ guera,+ man fuerte,+ brasa poderoso i obra spantoso pa saka nan?+ Loke Yehova, boso Dios, a yega di hasi pa boso dilanti di boso mes bista na Egipto, el a yega di hasi esei mas promé?
35 Tur e kosnan ei a ser mustrá na boso pa boso por sa ku ta Yehova ta e Dios berdadero.+ No tin niun otro Dios fuera di dje.+
36 For di shelu, el a laga boso tende su stèm pa instruí boso pa boso obedes’é. I riba tera, el a laga boso mira su kandela grandi, i boso a tende su palabranan for di e kandela.+
37 Komo ku e tabata stima boso antepasadonan i el a skohe nan desendientenan* pa bira su pueblo,+ el a kompañá boso ora el a saka boso for di Egipto ku su gran poder.
38 El a kore ku nashon mas grandi i mas poderoso ku boso for di boso dilanti pa hiba boso na nan pais i duna boso e pais ei komo herensia, manera boso por mira awe.+
39 Pues, boso mester realisá awe i tuma na serio* e echo ku Yehova ta e Dios berdadero den shelu i riba tera.+ No tin niun otro Dios.+
40 Kumpli ku su reglanan i su mandamentunan ku mi ta duna boso awe pa por bai bon ku boso i ku boso yunan i pa boso por keda hopi tempu na e pais ku Yehova, boso Dios, ta bai duna boso.”+
41 E tempu ei, Moises a apartá tres stat na parti ost di riu Yordan.+
42 Si un persona a mata su próhimo sin ku e por a yuda i sin ku e tabatin rabia riba dje,+ e persona ei mester a hui bai na un di e statnan ei pa e keda na bida.+
43 E promé stat tabata Bézer,+ ku tabata keda den desierto den e sabana.* Esei tabata pa e tribu di Ruben. E di dos stat tabata Rámòt,+ na Gálad. Esei tabata pa e tribu di Gad. E di tres stat tabata Gólan,+ na Básan. Esei tabata pa e tribu di Mánases.+
44 Awor ta sigui e leinan+ ku Moises a duna e pueblo di Israel.
45 Esakinan ta e rekordatorionan, e reglanan i e leinan ku Moises a duna e israelitanan despues ku nan a sali for di Egipto.+
46 El a hasi esei den region di riu Yordan, den e vaye enfrente di Bèt-Péòr,+ na pais di Síhòn, e rei di e amoreonan. Síhòn tabata biba na Hèsbòn.+ Despues ku Moises i e israelitanan a sali for di Egipto, nan a derotá Síhòn.+
47 Nan a konkistá e pais di Rei Síhòn i e pais di Rei Òg+ di Básan, e dos reinan di e amoreonan ku tabata biba den e region ost di riu Yordan.
48 Nan teritorio tabata kore for di Aroer,+ ku tabata keda na rant di vaye Árnòn, te na seru Siòn (esta, Hèrmòn).+
49 Nan teritorio a inkluí tambe henter Áraba, den e region ost di riu Yordan, te na Laman di Áraba,* na pia di bahada di Pisga.+
Nota
^ Òf: “Pero paga bon tinu na boso alma.”
^ Lit.: “te den kurason di shelu.”
^ Lit.: “E Dies Palabranan.”
^ Lit.: “henter e ehérsito selestial.”
^ Òf: “herensia.”
^ Òf: “ku ta eksigí deboshon eksklusivo; ku no ta tolerá pa boso tin niun otro dios; ku ta yalurs; ku no ta tolerá rivalidat.”
^ Òf: “skucha su stèm.”
^ Òf: “huisio; prueba; tèst.”
^ Lit.: “simia.”
^ Òf: “i graba den boso kurason.”
^ Òf: “den desierto riba e seru plat (plateau).”
^ Esta, Laman Salu, òf Laman Morto.
