Di Dos Karta pa e Korintionan 13:1-14
13 Esaki ta di tres biaha ku mi ta prepará pa bishitá boso. “Mester konfirmá tur asuntu a base di deklarashon* di dos òf tres testigu.”+
2 Aunke aworakí mi ta leu for di boso, hasi komo si fuera ta pa di dos biaha mi ta huntu ku boso. Anto mi ta bolbe spièrta e hendenan ku a yega di peka i tambe boso tur: Si un dia mi bini atrobe, lo mi no keda sin disipliná hende ku ta hasi malu.
3 Asina lo mi demostrá boso ku Kristu realmente ta papia pa medio di mi. Anto Kristu no ta hasi nada na un manera suak. Mas bien, e ta demostrá su poder entre boso.
4 Sí, ta bèrdat ku nan a klaba* Kristu na staka ora ku e tabata suak,* pero awor e ta bibu debí na e poder di Dios.+ Ta bèrdat ku nos tambe ta suak meskos ku e tabata suak, pero nos lo biba huntu kuné+ debí na e poder di Dios. Ta e mesun poder ei ta obra den boso.+
5 Sigui saminá boso mes pa sa si boso ta biba di akuerdo ku boso fe den Dios; sigui hasi sigur* ki sorto di hende boso ta.+ Òf boso no ta realisá ku Hesukristu ta den union ku boso? Bon mirá, boso lo mester a realisá esei, a ménos ku boso a pèrdè Dios su aprobashon.
6 Mi ta spera sinseramente ku boso lo rekonosé ku nos sí tin Dios su aprobashon.
7 Nos ta pidi Dios pa boso no hasi nada malu. Nos no ta pidi esei djis pa laga hende kere ku ta nos tin Dios su aprobashon. Mas bien, nos ke pa boso hasi loke ta bon, maske hende kisas ta pensa ku nos no tin Dios su aprobashon.
8 Pasobra nos no por hasi nada pa stroba e bèrdat ku ta bini di Dios. Mas bien, nos por solamente traha na fabor di e bèrdat.
9 Semper nos ta bira masha kontentu ora boso ta fuerte, maske si na e momentonan ei nos ta suak. Anto nos ta pidi den orashon pa boso hasi e kambionan nesesario.*
10 P’esei, mi ta skirbi e kosnan ei promé ku mi bini serka boso, pa asina ora mi ta huntu ku boso, mi no mester usa e outoridat ku Señor a duna mi na un manera severo.*+ Mas bien, lo mi por us’é pa animá boso i no pa desanimá boso.
11 Por último, Rumannan, sigui alegrá; sigui hasi e kambionan nesesario;* sigui laga otro hende konsolá boso;+ sigui ta uní den boso manera di pensa+ i sigui biba na pas ku otro.+ Asina e Dios di amor i di pas+ lo ta ku boso.
12 Boso kumindá otro ku masha kariño.*
13 Tur e rumannan santu* ta manda kumindamentu pa boso.
14 Mi ta deseá pa boso tur risibí bondat inmeresí di nos Señor Hesukristu, amor di Dios i e bendishonnan di spiritu santu ku nos tur ta benefisiá di dje.
