Di Dos Karta pa e Korintionan 8:1-24
8 Rumannan, awor nos ke konta boso kiko e kongregashonnan na Masedonia+ a hasi, danki na e bondat inmeresí di Dios ku nan a haña.
2 Durante un prueba pisá ku a pone nan sufri hopi, nan a duna ku masha alegria apesar ku nan tabata masha pober. Esei a demostrá kon generoso nan tabata.
3 Mi por sigurá boso ku nan a duna tur loke nan tabata por,+ sí, asta mas di loke nan tabata por.+
4 E rumannan ei riba nan propio inisiativa a keda roga nos mashá pa nan tambe tin e privilegio di duna un regalo generoso. Nan tambe kier a partisipá den yuda* e rumannan santu.*+
5 I nan a hasi mas di loke nos a spera. Pa kuminsá, di akuerdo ku boluntat di Dios, nan a hasi tur nan esfuerso pa sirbi Señor i yuda nos.
6 P’esei, nos a animá Tito+ pa kaba di kolektá boso regalo generoso, pasobra ta e mes a kuminsá ku e obra ei serka boso.
7 Boso tin tur kos na abundansia: fe, abilidat di papia, konosementu i entusiasmo. I boso ta stima otro hopi, manera nos ta stima boso. Pues, sigui hasi esfuerso tambe pa boso ta generoso ora di kontribuí.+
8 No ta un mandato mi ta duna boso, pero mi ta bisa esei pa mustra boso e entusiasmo ku otro hende tin i pa wak si di bèrdat boso stima e otro rumannan.
9 Pasobra boso sa di e bondat inmeresí di nos Señor Hesukristu: E tabata riku, pero el a bira pober pa boso,+ pa asina boso por bira riku pa medio di su pobresa.
10 Anto mi ta duna boso mi opinion riba e asuntu akí:+ Ta boso mes lo benefisiá si boso kaba di hasi e kolekta akí. Pasobra ta for di un aña pasá, boso a mustra ku boso kier a hasi e kolekta, i boso asta a kuminsá hasié tambe.
11 Pues awor, kaba loke boso a kuminsá kuné. Hasié ku e mesun entusiasmo ku boso a kuminsá kuné i di akuerdo ku loke boso por duna.
12 Pasobra si un hende ta dispuesto pa duna, e ora ei Dios gustosamente ta aseptá loke e hende ei ta duna.+ Sí, un hende mester duna segun loke e tin, no segun loke e no tin.
13 No ta asina ku mi ke hasi boso bida difísil, anto hasi bida di otro hende fásil.
14 Mas bien, mi ke pa por tin un balansa: Usa loke boso tin di mas awor pa kompensá loke nan falta. Anto un dia, nan tambe lo usa loke nan tin di mas pa kompensá loke boso falta. Asina, e karga di kada grupo lo ta igual.*
15 Manera ta pará skirbí den Skritura: “Un persona ku a piki hopi no tabatin di mas, i un persona ku a piki tiki no tabatin muchu tiki.”+
16 Nos ta gradisí Dios ku Tito tin e mesun interes sinsero pa boso ku nos tin.+
17 El a hasi kaso di loke nos a bis’é, i e ta asina ansioso pa hasi loke nos a pidié ku riba su propio inisiativa e ta bini serka boso.
18 Pero huntu ku Tito, nos ta manda e ruman hòmber ku tur kongregashon ta elogiá pa loke e ta hasi na fabor di e bon notisianan.
19 Es mas, e kongregashonnan a nombra e ruman ei pa kompañá nos pa hiba e regalo generoso akí. Nos lo repartí e regalo ei pa Señor por haña gloria i pa nos demostrá ku nos ta kla pa yuda otro hende.
20 Asina nos ta evitá ku hende lo por kritiká nos pa e manera ku nos ta repartí e kontribushon generoso akí ku ta na nos enkargo.+
21 Pasobra nos ‘ta atendé tur kos na un manera onesto, no solamente den bista di Yehova,* sino tambe den bista di hende.’+
22 Ademas, nos ta manda un otro ruman hòmber di nos huntu ku nan. Hopi biaha i den hopi asuntu, e ruman ei a demostrá nos ku e ta diligente. Pero awor e ta muchu mas diligente pasobra e tin tur konfiansa ku boso lo hasi loke ta korekto.
23 Pero si boso tin kualke duda tokante Tito, mi ke pa boso sa ku e ta mi kompañero, i e ta traha huntu ku nos na boso interes. Òf si boso tin duda tokante e ruman hòmbernan ku ta huntu kuné, kòrda ku nan ta hende ku e kongregashonnan a manda,* i nan ta sòru pa Kristu haña gloria.
24 P’esei, demostrá e rumannan ei ku boso stima nan,+ i laga e kongregashonnan mira dikon nos a gaba boso.
