Mas Inmasingger ed Pegley-labi so Doomsday Clock

I-PLAY

Nen Enero 27, 2026, imbaga na saray scientist ya mas inmasingger ni ed pegley-labi so Doomsday Clock. a Irerepresenta na pegley-labi so kaderal na mundo lapud saray gagawaen na totoo.

“Inyabanti na Bulletin of the Atomic Scientists Science and Security Board so Doomsday Clock, natan et wala lad 85 segundo antis na pegley-labi. Aya la so sankaasinggeran ed kaderal na mundo!”—Bulletin of the Atomic Scientists.
“Malinlinew so mensahe na Doomsday Clock. Ombebetbet iray nagagawan trahedya ed mundo, anggapoy pankakasakey na totoo, tan antiktikey lay nakekeran oras. Kaukolan lan onkiwas iray totoo tan sarasarag dan gawaen itan. Dapat piliten da la ray lider na bansa ra ya onaksion lan tampol.”—Alexandra Bell, say presidente tan CEO na Bulletin of the Atomic Scientists.

Talaga kasin asingger lan naderal iray totoo tan say planeta tayo? Dapat tayo kasin takotan so nagawad arapen? Antoy Ibabaga na Biblia?

No antoy nagawad arapen

Ibabaga na Biblia ya “say dalin et mansiansia ya anggad angga” tan wala ray totoo ya “manbilay ira ditan diad andi-anggaan.” (Eclesiastes 1:4; Salmo 37:29) Kanian agsarag na totoo ya deralen so dalin, odino pasabien da ed punto ya agla napanayaman so interon planeta tayo.

Balet ibabaga na Biblia ya walay mangangga. Singa bilang, nabasa ditan ya “say mundo . . . et naandi.”—1 Juan 2:17.

Pian naamtaan mo no antoy labay ya ibaga na Biblia no nabibitla ditan so anggaan na mundo, basaen so artikulon “Kasin Anggaan La na Mundo? Kasin Ibabaga na Biblia ya Naderal so Planetan Dalin?”
Pian naamtaan moy ibabaga na Biblia no kapigan iratan nagawa, basaen so artikulon “Kailan ang Katapusan ng Mundo?”

Mansiansian positibo

Natulongan itayo na Biblia ya mansiansian positibo anggano wala ray problema ed mundo natan. Panon?

Wala ray praktikal ya bilin na Biblia. (2 Timoteo 3:16, 17) Singa bilang, basaen so artikulon “No Panon ya Kontrolen so Panaburido” pian naamtaan mo no panon kan natulongan na Biblia ya mansiansian positibo anggano dakdakel so problema tayo.
Mangiiter so Biblia na napantiwalaan ya ilalo parad arapen. (Roma 15:4) Malinew ton ipapaliwawa no antoy nagawa natan tan diad arapen, kanian makapansiansia tayon positibo antokaman so nagawa.

Pian talagan natalosan mo so ibabangat na Biblia, sarag mon salien so iyoopresi min libre ya panag-aral na Biblia ya walay manbangat ed sika.

a “Ginawa so Doomsday Clock pian napasakbayan iray totoo no panon tayo la kaasingger ed pakaderal na mundo lapud saray mapeligron teknolohiya ya gagawaen tayo lanlamang. Simbolo itan ya mangipapanonot ed saray peligron kaukolan tayon asikasoen pian makapambilay tayo ni ed sayan planeta.”—Bulletin of the Atomic Scientists.