Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 12

Uunongo wopaKalunga owo omwenyo

Uunongo wopaKalunga owo omwenyo

Membo lyOmayeletumbulo omu udha omayele ga nwethwa taga gandja ewiliko monkalamwenyo yakehe esiku, ngoka ogendji gomugo ga nyolwa kuSalomo

MBELA Jehova oku li ngaa Omupangeli omunandunge? Epulo ndyoka otatu vulu oku li yamukula momukalo gumwe gwa simana ngele otwa kala hatu pulakene komayele ngoka he tu pe. Mbela omayele ngoka oge na ngaa oshilonga? Mbela oku ga tula miilonga otaku vulu okuninga onkalamwenyo yi kale yi li nawa nosho wo yi kale tayi ti sha? Omukwaniilwa omunandunge Salomo okwa li a nyola omayeletumbulo omathele. Omayeletumbulo ngoka oga guma oombinga adhihe dhokukalamwenyo. Ngashingeyi natu ka konakone gamwe gomugo.

Otu na okukala twi inekela muKalunga. Opo tu kale tu na ekwatathano ewanawa naJehova otu na okukala twe mu inekela. Salomo okwa nyola ta ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” (Omayeletumbulo 3:5, 6) Okwiinekela muKalunga mokukonga ewiliko lye nokuvulika kuye ohaku ningi onkalamwenyo yi kale tayi ti sha. Ngele tatu ningi ngawo otatu nyanyudha omutima gwaKalunga e ta vulu okuyamukula oompata ndhoka dhe etithwa komutondi gwe, Satana.—Omayeletumbulo 27:11.

Kala ho ungaunga nayalwe pandunge. Omayele ngoka Kalunga a pa aasamane, aakulukadhi nosho wo aanona oge li pethimbo kunena shi vulithe nale. Kalunga okwa pa omusamane kehe omayele ngaka taga ti: ‘Nyanyukilwa omukiintu gwomuugundjuka woye,’ shoka sha hala okutya, oku na okukala omudhiginini komukulukadhi gwe. (Omayeletumbulo 5:18-20) Embo lyOmayeletumbulo otali popi kombinga yomukulukadhi ngoka a li ha longo nuudhiginini noha pandulwa komusamane gwe nokaanona ye. Aakulukadhi ya hokanwa otaya vulu okwiilonga oshindji koshiholelwa she. (Omayeletumbulo ontopolwa 31) Aanona nayo otaya a dha mo omayele ngoka taga vulu oku ya kwathela ya kale haya vulika kaavali yawo. (Omayeletumbulo 6:20) Embo ndika otali ulike wo kutya osha simana okukala wu na ookuume molwaashoka okwiikalela ohaku ningitha omuntu a kale i ihole ye mwene. (Omayeletumbulo 18:1) Ookuume otashi vulika ye tu nwethe mo nawa nenge nayi, onkee ano, otwa pumbwa oku ya hogolola pandunge.—Omayeletumbulo 13:20; 17:17.

Kala ho isile oshimpwiyu nawa. Membo lyOmayeletumbulo otamu adhika omayele taga ti sha ge na ko nasha nankene tu na okuyanda okulongitha nayi iikolitha, okukala tu na omaukwatya ngoka tage tu kwathele tu kale tu na uukolele notu kondjithe ngoka tage tu yono po notali tu ladhipike tu longe nuudhiginini. (Omayeletumbulo 6:6; 14:30; 20:1) Otali tu londodha kutya osha nika oshiponga okwiinekela maantu pehala lyokwiinekela muKalunga. (Omayeletumbulo 14:12) Otali tu londodha wo tu gamene omutima gwetu gwaaha nwethwe mo komikalo omiwinayi notali tu dhimbulukitha kutya ‘momutima omo mu na ekota lyomwenyo.’—Omayeletumbulo 4:23.

Muuyuni auhe aantu omamiliyona oya mona kutya okuvulika komayele ngoka ohashi ningi onkalamwenyo yi kale ombwaanawa. Onkee ano, oye na omatompelo ogendji okutaamba ko Jehova e li Omupangeli gwawo.

—Uuyelele moshitopolwa shika owa kankamena kembo lyOmayeletumbulo.

 

Tseya oshindji

HEDHA POPEPI NAJEHOVA

Oho tula ngaa miilonga ‘uunongo wopombanda’?

Ombiimbeli otayi popi iinima ine ya simanenena mbyoka tayi vulu oku ku kwathela wu kale wu na uunongo.