Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 13

Aakwaniilwa aawanawa naawinayi

Aakwaniilwa aawanawa naawinayi

Israeli osha li sha topolwa. Ethimbo nethimbo aakwaniilwa yi ili noyi ili oya kala nokupangela muIsraeli noyendji yomuyo kaya li aainekelwa. Jerusalem osha li sha hanagulwa po kAababilonia

NGAASHI naanaa Jehova a li a hunganeke, Israeli osha li sha topolwa konima sho Salomo e etha po elongelokalunga lyashili. Omwanamati gwe, Rehabeam ngoka a li e mu landula ka li e na ohenda. Onkee ano, omazimo omulongo gaIsraeli oga li ga ningi oshipotha e taga toto po uukwaniilwa waIsraeli wokuumbangalantu. Omazimo gaali oga kala ga dhiginina kuukwaniilwa womezimo lyaDavid muJerusalem e taga toto po uukwaniilwa waJuda wokuumbugantu.

Omaukwaniilwa agehe oga kala kaage na ombili noga kala ge na omaupyakadhi ogendji omolwokwaahe na eitaalo nosho wo molwaashoka aakwaniilwa kaya li aavuliki. Israeli osha kala nokuli shi na omaupyakadhi ogendji shi vulithe Juda omolwaakwaniilwa yasho mbono ya kala nokuyambidhidha elongelokalunga lyiifundja. Aaisraeli oya kala taya longo uukolokoshi nonando opwa li aapolofeti mokati kawo, ngaashi Elia naElisa mboka ya li ya longo iilongankondo. Aapolofeti mboka kehe gumwe gwomuyo okwa li a yumudha nokuli omuntu. Hugunina, Kalunga okwa li e etha uukwaniilwa wokuumbangalantu wu hanagulwe po kAayassur.

Uukwaniilwa waJuda owa kala po oomvula inaadhi thika pethele okuza sho Uukwaniilwa waIsraeli wa hanagulwa po. Aakwaniilwa owala aashona yaJuda ya li ya pulakene kelondodho lyaKalunga e taya kambadhala okukwatela komeho oshigwana shi galukile kuJehova. Pashiholelwa, omukwaniilwa Josia okwa li a tameke okukutha mo elongelokalunga lyiifundja muJuda e ta tungulula otempeli yaJehova. Sho embo lyotango lyOompango dhaKalunga ndyono lya li lya gandjwa okupitila muMoses lya monika, Josia okwa li a tokola toko okutsikila okwoopalekulula elongelokalunga lyashili.

Shiyemateka, ngono a li a landula omukwaniilwa Josia ka li a landula oshiholelwa she oshiwanawa. Kungawo, Jehova okwa li e etha Aababilonia ya sinde Juda e taya hanagula po Jerusalem notempeli yasho. Aahupipo oya li ya falwa muupongekwa kuBabilonia. Kalunga okwa li a hunganeke kutya muupongekwa otaya ka kala mo uule woomvula 70. Juda osha kala sha mbugala uule wethimbo alihe ndoka sigo oshigwana she ethiwa shi shune kevi lyasho ngaashi sha li shu uvanekwa.

Ihe okuza sho Juda sha li sha hanagulwa po, kapwa li we omukwaniilwa gwomezimo lyaDavid a li ta ka pangela sigo ooshono Omuhupithi, Mesiasa ngoka u uvanekwa a tameke okupangela. Oyendji yomaakwaniilwa mbono ya li ya yi koshipangelapundi shaDavid muJerusalem oya li yu ulike kutya aantu inaaya gwanenena itaya vulu okupangela. Mesiasa oye owala a gwana okupangela shili. Osho molwaashono Jehova a li lombwele aakwaniilwa yahugunina yomezimo lyaDavid a ti: “Ihula oshishani. . . . Shika itashi ningwa, sigo ngoka tandi hogolola a geele oshilando, a thiki. Nena otandi shi mu pe.”—Hesekiel 21:26, 27.

—Uuyelele moshitopolwa shika owa kankamena kAakwaniilwa yo-1 nAakwaniilwa aati-2 Ondjalulo ontopolwa 10 sigo 36; Jeremia 25:8-11.

 

Tseya oshindji

NATU HOLELENI EITAALO LYAWO

Jona okwi ilongo sha momapuko ge

Mbela owu uvite nkene Jona a li u uvite sho a li a tila okutaamba ko oshilonga shoka? Mehokololo lye, otatu ilongo mo oshindji kombinga yolukeno neidhidhimiko lyaJehova.