Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 4

Kalunga okwa li a ningi ehangano naAbraham

Kalunga okwa li a ningi ehangano naAbraham

Abraham okwa li a vulika kuKalunga meitaalo, shoka osha li sha ningitha Jehova e mu uvanekele kutya ote ke mu laleka nuuyamba mokwiindjipaleka oluvalo lwe

OPWA li pwa piti oomvula 350 lwaampono okuza pEyelu lyaNoowa. Tatekulululwa Abraham okwa li a kala moshilando oshiyamba Ur shoka ngashingeyi hashi ithanwa Irak. Abraham okwa li omulumentu e na eitaalo lya tongomana. Ihe eitaalo lye olya li lya makelwa.

Jehova okwa li a lombwele Abraham a thige po oshilongo moka a valelwa ye a tembukile koshilongo shoka kaashi shi shaandjawo, hashi ithanwa Kaanana. Abraham okwa li a vulika nopwaahe na okukakadhala. Okwa li a yi nuukwanegumbo we, mwa kwatelwa omukulukadhi gwe, Sara nomutekulu gwe Lot, nokonima yolweendo lwawo olule oya kala momatsali muKaanana. Sho Jehova a li a ningi ehangano naAbraham, Jehova okwe mu uvanekele kutya muye otamu ka za oshigwana oshinene, sha hala okutya, iigwana ayihe otayi ka lalekwa nuuyamba okupitila muye, noluvalo lwe otalu ka lala evi lyaKaanana.

Abraham naLot oya li ya yambapala, oya kala ye na uusita uunenenene woonzi noongombe. Molwaashono Abraham ka li i ihole mwene, okwa li a pe Lot ompito a hogolole oshitopolwa shoka a hala. Lot okwa li i ihogololele oshitopolwa shono shi na evi li li nawa molusilu lwaJordan popepi noshilando Sodom. Ihe aalumentu yomoshilando Sodom kaya li ye na omikalo, sha hala okutya, haya longo uulunde koshipala shaJehova.

Konima yethimbo Jehova Kalunga okwa li a shilipaleke Abraham kutya oluvalo lwe otalu ki indjipala ngaashi oonyothi dhokegulu. Abraham okwa li itaala euvaneko ndyoka. Ihe omukulukadhi gwaAbraham, Sara, ka li e na aanona natango. Opo nduno sho Abraham a li e na oomvula 99 naashono Sara a li e li pokugwanitha 90, Kalunga okwa lombwele Abraham kutya yo naSara otaya ka mona okanona okamati. Dhoshili, ngaashi naanaa Kalunga a popile, Sara okwa li a mono okanona kedhina Isaak. Abraham okwa li wo e na aanona yalwe, ihe muIsaak omo mwa li tamu ka za Omuhupithi ngoka a li u uvanekwa moshikunino shaEden ngoka a li te ke ya.

Pokati mpoka, Lot nuukwanegumbo we oya li ya kala muSodom, ihe omuyuuki Lot ka li a holele aantu yomoshilando moka mboka ya li kaaye na omikalo. Sho Jehova a li a tokola okuhanagula po Sodom, okwa tumu aayengeli ya ka londodhe Lot kombinga yehanagulo ndyoka lya li popepi. Aayengeli oya li ya lombwele Lot nuukwanegumbo we ya ye ontuku okuza muSodom nopwaahe na okutala konima. Opo nduno Kalunga okwa lokithile omulilo gwosulufuli muSodom nomoshilando shopuushiinda Gomorra gu hanagule po aantu yamo ayehe. Lot noyanakadhona yaali oya li ya yi ontuku. Ihe omukulukadhi gwe okwa li a tala konima, tashi vulika a li ta dhiladhila iinima mbyoka a li a thigi moshilando. Omolwokwaahavulika kwe, okwa si.

—Uuyelele moshitopolwa shika owa kankamena kuGenesis 11:10–19:38.

Tseya oshindji

NATU HOLELENI EITAALO LYAWO

Abraham — “Oye he yopambepo yaayehe mboka yi itaala Kalunga”

Abraham okwa li u ulike ngiini eitaalo? Ongiini ngoye wa hala okuholela eitaalo lyaAbraham?