Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 20

Okudhipagwa kwaJesus Kristus

Okudhipagwa kwaJesus Kristus

Jesus okwa li a dhike po edhimbuluko epe nokwa gwaalekwa e ta alelwa komuti gwomahepeko

KONIMA yoomvula ndatu netata dhokuuvitha nokulonga aantu kwe, Jesus okwa li e shi shi kutya okukala kwe kombanda yevi oku li pokuhula po. Aawiliki yelongelokalunga lyOshijuda oya li ya ningi ompangela ya dhipage Jesus, ihe oya li ye na uumbanda molwaashoka aantu oya li ye mu tala ko e li omupolofeti. Konima yethimbo, Satana okwa li a nwetha mo gumwe gwomaayapostoli 12, Judas Iskariot a gwaaleke Jesus. Aawiliki yomalongelokalunga oya li ya futu Judas iisiliveri 30 opo a gwaaleke Jesus.

Jesus okwa li a gongala naayapostoli ye kongulohi ye yahugunina kombanda yevi opo ya dhane Opaasa. Konima sho a lombwele Judas a pite mo, okwa dhike po edhimbuluko epe, ndyoka hali ithanwa Uulalelo wOmuwa. Okwa kutha oshikwiila e ta galikana nokwe shi pambula e te shi pe aayapostoli ye mboka 11 ya hupu po. Okwa ti kuyo: “Shika osho olutu lwandje ndoka talu mú gandjelwa. Shi ningeni nokudhimbulukwa ndje.” Okwa ningi wo sha faathana noshitenga shomaviinu e ta ti: “Oshitenga shika osho ehangano epe lyomombinzi yandje ndjoka tayi tilwahi molweni.”—Lukas 22:19, 20.

Ongulohi ndjoka Jesus okwa li e na iinima oyindji okulombwela aalongwa ye. Okwe ya pe oshipango oshipe ya kale ye holathane. Okwa ti kuyo: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:34, 35) Okwa li wo e ya londodha ya kotoke opo oomwenyo dhawo kaadhi lolodhwe kiitendele yuuyuni. Jesus okwa li a galikana a mana mo omolwawo. Oya li yi imbi pamwe omaimbilohambelelo noya li ya piti mo e taya yi koshikunino shaGetsemane.

Moshikunino shaGetsemane Jesus okwa tsu oongolo e ta galikana kuKalunga a mana mo. Nziya ongundu yaakwiita ya homata, aasaseri nayalwe oye ya oku mu kwata po. Judas okwe ya puJesus e te mu thipi komilungu opo u ulike kutya Jesus oguni po. Sho aakwiita ya kwata po Jesus, aayapostoli oya fadhuka po.

Sho Jesus a li mompangu yOshijuda, okwa li a popi kutya ye Omwana gwaKalunga. Ompangu oya li ye mu tala ko a gwana okudhipagwa molwaashoka aniwa okwa sheka Kalunga. Jesus okwa li a falwa komupangeli gwaRoma Pontius Pilatus. Nonando Pilatus ka li a mono Jesus ondjo, okwe mu shunitha kongundu yaantu mboka ya li tayi igidha kutya na dhipagwe.

Jesus okwa li a falwa kuGologota, hoka aakwiita yaRoma ya li ye mu alele komuti gwomahepeko. Omutenya ogwa li gwa shituka uusiku pashikumithalonga. Konima yethimbo, omutenya ogwo tuu ngoka Jesus okwa si nevi olya kakama. Omudhimba gwe ogwa li gwa tulwa mombila ndjoka ya li ya hokwa memanya. Mesiku lya ka landula ko, aasaaseri oye edhile po nemanya e taya tula po aalangeli. Mbela Jesus okwa li ngaa ta ka kala mombila moka? Aawe. Opwa ka ningwa oshikumithalonga oshinenenene shi na ko nasha naye.

—Uuyelele moshitopolwa shika owa kankamena kuMateus ontopolwa 26 no 27; Markus ontopolwa 14 no 15; Lukas ontopolwa 22 no 23; Johannes ontopolwa 12 sigo 19.

^ okat. 15 Omolwuuyelele wa gwedhwa po kombinga yeyambo li na ongushu lyeso lyaJesus, tala membo Omalongo gashili gOmbiimbeli ogeni naanaa?, ontopolwa 5.