Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 5

Kalunga okwa li a laleke nuuyamba Abraham nuukwanegumbo we

Kalunga okwa li a laleke nuuyamba Abraham nuukwanegumbo we

Oluvalo lwaAbraham olwa li lwa yambapala. Kalunga okwa li a gamene Josef muEgipiti

JEHOVA okwa li e shi shi kutya Omwana omuholike okwa li e na okumona iihuna nokusa. Ehunganeko ndyoka li li muGenesis 3:15 olya li lya popi lya futika kutya osho tashi ka kala ngawo. Mbela Kalunga okwa li ta vulu okukwathela ngiini aantu opo ya mone kutya ekuliloyambo lyOmwana omuholike oli li oshinima shi na ondilo? Ombiimbeli oye tu pa eudhi moku tu lombwela shoka sha li sha ningwa po kombinga yomusamane nomwana. Kalunga okwa li a pula Abraham a yambe po omwana omuholike Isaak.

Abraham okwa li e na eitaalo lya kola. Dhimbulukwa kutya Kalunga okwa li e mu uvanekele kutya Omuhupithi omuuvanekwa nenge Oluvalo, olwa li talu ka za muIsaak. Abraham okwa li ta ka yamba po omwana Isaak e na einekelo kutya Kalunga ote ke mu yumudha ngele sha pumbiwa. Ihe Abraham sho a li poku shi ninga, omuyengeli okwa li a tumwa kuKalunga e mu keelele kaa yambe po omwana. Kalunga okwa li a pandula Abraham molwaashoka okwa li e na ehalo okuyamba po omwana ngoka e na ongushu onene kuye nokwa li e mu shilipaleke ishewe kutya ota ka gwanitha po euvaneko lye.

Konima yethimbo, Isaak okwa mono oyanamati yaali, Esau naJakob. Mepingathano naEsau, Jakob okwa li e na olupandu lwiinima yopambepo nokwa li a pewa ondjambi. Kalunga okwa li a lundulula edhina lyaJakob li ninge Israeli, noyanamati yaIsraeli 12 oya ningi aawiliki yomazimo gaIsraeli. Ihe ongiini mbela ezimo ndyoka lya li lya ningi oshigwana oshinene?

Iiningwanima ya landulathana oya li ya ningwa sho oyendji yomoyanamati mboka ya li ya sile ondumbo omumwayinamati omushona Josef. Oya li ye mu landitha po a ka ningwe omupika nokwa falwa kuEgipiti. Ihe Kalunga okwa li a laleke nuuyamba omumati ngoka omugundjuka omudhiginini noku li ependa. Nonando opwa li omahepeko omadhigu, hugunina Josef okwa li a hogololwa kuFarao, omupangeli gwaEgipiti nokwa li e mu pe oonkondopangelo oonene. Shoka osha li sha ningwa pethimbo, molwaashoka ondjala oya li ya ningitha Jakob a tume yamwe yomoyanamati kuEgipiti ya ka lande iikulya, pethimbo mpoka iikulya ayihe muEgipiti oya li metonatelo lyaJosef. Konima yokuhangana naamwahe mboka yi iyela ombedhi kwaashoka ya li ya ningi, Josef okwe ya dhimine po e ta ningi elongekidho opo uukwanegumbo auhe wu tembukile kuEgipiti. Oya li ya pewa epya pevi ewanawa mpoka ya li taya vulu okutsikila okulonga nokuyambapala. Josef okwa li e wete kutya Kalunga oye a longekidha iinima momukalo ngoka opo a vule okugwanitha euvaneko lye.

Omunamimvo Jakob okwa li a kala muEgipiti onkalamwenyo ye ayihe nuukwanegumbo we. Sho a li e li pokusa, okwa li a hunganeke kutya Oluvalo lu uvanekwa nenge Omuhupithi ota ka kala Omupangeli omunankondo ngoka ta ka valwa mezimo lyomwanamati Juda. Konima yoomvula dhontumba manga inaa sa, Josef okwa li a hunganeke kutya Kalunga ota ka kutha mo ezimo lyaJakob muEgipiti.

—Uuyelele moshitopolwa shika owa kankamena kuGenesis ontopolwa 20 sigo 50; Aahebeli 11:17-22.