Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 11

Omaimbilo ga nwethwa mo ngoka taga hekeleke notaga longo

Omaimbilo ga nwethwa mo ngoka taga hekeleke notaga longo

David nosho wo yakwawo yalwe oya li ya nyola omaimbilo ngoka ga li haga longithwa melongelokalunga lyashili. Embo lyOmapisalomi olya thikama po momaimbilo 150

EMBO lyOmapisalomi ndyoka li li embo enene komakwawo agehe oli na ehwata lyomaimbilo omayapuki. Omaimbilo ngoka ge li membo lyOmapisalomi oga nyolwa momukokomoko gwoomvula 1000 lwaampoka. Embo lyOmapisalomi oli na oohapu odhindji dhituntula nodhihokitha dhi na ko nasha neitaalo. Embo ndyoka olya popya omaiyuvo gopantu gi ili nogi ili ngaashi enyanyu, okupandula nosho wo omaimbilohambelelo gokunika oluhodhi neiyelombedhi. Shika osha yela kutya aanyoli yOmapisalomi oya li yi inekela muKalunga noye na ekwatathano lyopothingo naye. Ngashingeyi tala komanenedhiladhilo ngoka taga adhika momaimbilo ngoka ge li mOmapisalomi.

Jehova oye awike a gwana okukala omupangeli, okulongelwa nokuhambelelwa. Otatu lesha mEpisalomi 83:18 taku ti: “Ongoye awike OMUWA Omupangeliawike kombanda yevi alihe.” Omapisalomi ogendji otaga tanga Jehova omolwiinima mbyoka a shita, ngaashi egulu li na oonyothi, iinima iikumithi yi na omwenyo mbyoka yi li kombanda yevi nosho wo olutu lwomuntu ndoka lwa shitwa momukalo omukumithi. (Episalomi 8, 19, 139, 148) Gamwe otaga tanga Jehova omolwiilonga mbyoka a longa opo a hupithe nokugamena aapiya ye aadhiginini. (Episalomi 18, 97, 138) Galwe otage mu simaneke e li Kalunga kuuyuuki, ngoka he etele oonakuthininikwa emanguluko noha geyele mboka haya longo uuwinayi.—Episalomi 11, 68, 146.

Jehova oha kwatha noha hekeleke mboka ye mu hole. Otashi vulika aantu oyendji ye shi nawa Episalomi 23 moka David a hokolola Jehova e li omusita omunahole ngoka ha wilike, ha gamenene noha sile oshimpwiyu oonzi dhe. Episalomi 65:2 otali dhimbulukitha aalongelikalunga kutya Jehova oku li ‘omuuvi gwomagalikano.’ Oyendji mboka ya yono omayono ga kwata miiti oya hekelekwa koohapu ndhoka dhi li mEpisalomi 39 nosho wo 51, moka David a popya tashi zi komutima shi na ko nasha nokwiiyela ombedhi kwe omolwomayono ga kwata miiti ngoka a li a ningi nokwiitaala kwe kutya Jehova oha dhimine po. Episalomi 55:22 otali tu ladhipike tu inekele muJehova nokuundulila omitenge dhetu adhihe kuye.

Jehova ota ka lundulula uuyuni okupitila mUukwaniilwa wopaMesiasa. Iitopolwa yimwe yOmapisalomi otayi popi shi na ko nasha naMesiasa, Omukwaniilwa ngoka a li u uvanekwa. Episalomi eti-2 olya hunganeka kutya Omupangeli nguka ota ka hanagula po iigwana iikolokoshi mbyoka yi li ompinge naye. Episalomi 72 otali ulike kutya Omukwaniilwa nguka ota ka hulitha po ondjala, okwaahe na uuyuuki nokuthindilwa kongudhi. Episalomi 46:9 otali ti kutya Kalunga ota ka hulitha po iita nota ka hanagula po nokuli iikondjitho ayihe okupitila mUukwaniilwa wopaMesiasa. MEpisalomi 37 otatu lesha kutya aakolokoshi otaya ka hanagulwa po, omanga aayuuki taya ka kala nomwenyo kombanda yevi sigo aluhe taya nyanyukilwa ombili nuukumwe.

—Uuyelele moshitopolwa shika owa kankamena kOmapisalomi.

 

Tseya oshindji

ONKUNDANA OMBWANAWA YA ZA KUKALUNGA

Uukwaniilwa waKalunga oshike?

Omukwaniilwa gUukwaniilwa waKalunga olye, notawu ka pondola okuninga shike?