Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli oyi na etumwalaka lini?

 OSHITOPOLWA 26

Evi otali ka ninga ishewe Oparadisa

Evi otali ka ninga ishewe Oparadisa

Okupitila mUukwaniilwa waKalunga wu li miikaha yaKristus, Jehova ota ka yapulitha edhina lye, nokuyukipalitha uunamapangelo nota ka hulitha po uukolokoshi

EMBO lyahugunina lyOmbiimbeli, hali ithanwa Ehololo otali gandja etegameno kaantu ayehe. Embo ndika olya nyolwa komuyapostoli Johannes. Oli na omamoniko ngoka ga hunganeka iiningwanima yomonakuyiwa mbyoka tayi ka kala nokuningwa sigo elalakano lyaJehova lya gwanithwa pakuudha.

Memoniko lyotango, omuyumudhwa Jesus okwa li a pandula nokwa pukulula omagongalo ogendji. Memoniko lya landula ko, Johannes okwa mono oshipangelapundi shaKalunga megulu, nopwa li iishitwa yopambepo tayi hambelele Kalunga.

Sho elalakano lyaKalunga tali ende tali gwanithwa, Onzigona, Jesus Kristus oya pewa ondhinga yembo yi na iihako iheyali. Sho Jesus a li a patulula iihako yotango ine, opwa holoka aakayili yuukambe mboka taya thaneke iiningwanima yontumba mbyoka ya li tayi ka guma aantu muuyuni auhe. Omukayili gwokakambe kotango okatokele, ngoka a zalekwa oshikoloni, ota thaneke Jesus e li Omukwaniilwa. Aakayili yoonkambe dhomayala gi ili nogi ili, mboka ya landula ko, otaya thaneke iita, ondjala nosho wo omikithi dholutapo. Iinima ayihe mbyoka otayi ka gwanithwa momasiku ngaka gahugunina gonkalelo ndjika yiinima. Sho oshihako oshitiheyali sha matulwa, opwa holoka aayengeli taya hiki omankuma gaheyali nokuhikwa kwago okwa li taku thaneke okuuvithwa kwomatumwalaka gepangulo gaKalunga. Ehiko lyomankuma olya li lye etitha omageelo gaheyali gopathaneko ngoka ga za kuKalunga.

Memoniko limwe, Johannes okwa li a mono okanona kokamati opo ka valwa hoka taka thaneke okudhikwa po kUukwaniilwa waKalunga megulu. Megulu omwa tukuluka iita, Satana naayengeli ye oyu umbilwa kombanda yevi. Ewi olyi igidha okuza megulu tali ti: “Iihuna otayi ka kala yi thike peni kombanda yevi.” Omuhindadhi okwa kulukile kune u udha ondjahi, sho e shi shi kutya oku na ko owala okathimbo okafupi.—Ehololo 12:12.

Johannes okwa li a mono onzigona megulu ndjoka tayi thaneke Jesus yi li pamwe naantu 144 000 mboka ya hogololwa maantu ‘ya ka pangele pamwe’ naJesus megulu ye li aakwaniilwa. Ehololo olya holola kutya oshitopolwa oshitiyali sholuvalo ndoka lwa li lwu uvanekwa osha li tashi ka kala sha thikama po maantu 144 000.—Ehololo 14:1; 20:6.

Johannes okwa li wo a mono memoniko aapangeli yokombanda yevi taya gongelwa puArmagedon “ya ka hinge iita mesiku enene lyaKalunga Omunankondoadhihe.” Okwa mono aapangeli mboka taya kondjitha Jesus ngoka a kayila okakambe okatokele, ta wilike omatangakwiita gomegulu, opo nduno aapangeli mboka oya hanagulwa po thiluthilu. Satana okwa mangwa. Jesus naapangeli pamwe naye 144 000 oya pangele kombanda yevi “uule woomvula eyovi.” Kehulilo lyoomvula eyovi, Satana okwa hanagulwa po.—Ehololo 16:14; 20:4.

Mbela okupangela kwaKristus naapangeli ooyakwawo kwOomvula Eyovi okwa li taku ka tya shike kaantu mboka aavuliki? Johannes okwa nyola ta ti: “[Jehova] ota ka theta po omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” (Ehololo 21:4) Evi olya ningi Oparadisa.

Kungawo embo lyEhololo olya hulitha nawa etumwalaka lyOmbiimbeli. Edhina lyaJehova otali ka yapulithwa nuunamapangelo we otawu ka yukipalithwa sigo aluhe okupitila mUukwaniilwa wopaMesiasa.

—Uuyelele moshitopolwa shika owa kankamena kembo lyEhololo.