“Sengenze laziwa Ibizo Lakho”

“Sengenze laziwa ibizo lakho ebantwini owangipha bona emhlabeni. . . . Sengenze balazi ibizo lakho njalo ngizalenza laziwe.”—UJOHANE 17:6, 26.

Kutshoni? UJesu wayelisebenzisa ibizo likaNkulunkulu nxa etshumayela futhi lokhu kwanceda abantu ukuthi balazi. Ngesikhathi ebala iMibhalo, wayengaleqi kodwa wayelikhuluma. (ULukha 4:16-21) Wafundisa abalandeli bakhe ukuthi bathandaze bathi: “Baba, kalingcweliswe ibizo lakho.”—ULukha 11:2.

AmaKhristu Okuqala Akwenza Njani Lokhu? Umphostoli uPhetro watshela amadoda amadala eJerusalema wathi uNkulunkulu wayekhethe “abantu bebizo lakhe” phakathi kwezizwe. (ImiSebenzi 15:14) Abaphostoli kanye labanye abazalwane babetshumayela besithi “wonke umuntu obiza ibizo likaJehova uzasindiswa.” (ImiSebenzi 2:21; KwabaseRoma 10:13) Basebenzisa ibizo likaNkulunkulu langesikhathi bebhala amabhuku abo. Iqoqo lemithetho yamaJuda okuthiwa yi-The Tosefta, elaqedwa ukubhalwa ngabo-300 C.E., lithi kwakuvunyelwa ukutshisa imibhalo yamaKhristu ngeSabatha, njalo kwakuze kutshiswe lezingxenye ezilebizo likaNkulunkulu.

Ngobani Abakwenzayo Lokhu Lamuhla? Isandulelo seBhayibhili okuthiwa yi-Revised Standard Version elaphiwa imvumo yi-National Council of the Churches of Christ kweleMelika, sithi: “Inkolo yesiJuda yiyo eyama ukusebenzisa ibizo likaNkulunkulu kungakaqalisi inkolo yesiKhristu, njengoba kwakuyabe sekungathi kulabanye onkulunkulu okumele ehlukaniswe labo futhi amaSonto esiKhristu akubona kungafanelanga ukulisebenzisa.” Yikho lakhitshwa emibhalweni kwafakwa elithi, “NKOSI.” Abakhokheli benkolo yeRoma batshela amabhishophu abo bathi: “Ibizo likaNkulunkulu elithi YHWH * ngenhlamvu zesiHebheru, akumelanga liqanjwe emithandazweni loba lisetshenziswe ezingomeni.”

Ngobani abalisebenzayo ibizo likaNkulunkulu lamuhla? USergey wathi esakhula eKyrgyzstan wabukela ifilimu eyathi ibizo likaNkulunkulu nguJehova. Kwadlula iminyaka engaba litshumi engazange aphinde alizwe. Ngemva kwesikhathi uSergey esethuthele kweleMelika wavakatshelwa ngoFakazi bakaJehova ababili abamtshengisa ibizo likaNkulunkulu eBhayibhilini. Kwamthokozisa kakhulu uSergey ukubona abantu ababesebenzisa ibizo likaJehova. Kuyajabulisa ukuthi isichazamazwi okuthiwa yi-Webster’s Third New International Dictionary sithi uJehova uNkulunkulu “nguNkulunkulu omkhulu okunguye yedwa okhonzwa ngaboFakazi bakaJehova.”

[Footnote]