“Sekuyiminyaka engu-19 ngililindele iBhayibhili leli!” La ngamazwi akhulunywa ngomunye umfowethu ngemva kokuthola INguqulo Yomhlaba Omutsha YeMibhalo YamaKhristu YesiGrikhi ehunyutshwe ngolimi lwakhe isiBengali. Abanengi bathokoza ngendlela efananayo nxa bethola INguqulo Yomhlaba Omutsha ngolimi lwabo. Kodwa uyake uzibuze yini ukuthi kwenziwani ukuze amaBhayibhili la ahunyutshwe futhi adindwe?

 IKhomithi Yokuloba yeQula Elibusayo iyakhetha abahumutshi abazakwenza umsebenzi wokuhumutsha. Kuthatha isikhathi esinganani ukuhumutsha iBhayibhili? UNicholas Ahladis osebenza kuHlangothi Lokuhumutsha emawofisini ethu amakhulu uthi: “Ukuthi umsebenzi uzathatha isikhathi esinganani kuya ngokuthi kuzasetshenziswa abahumutshi abangaki, ukuthi ulimi lwakhona lunzima okunganani, ukuthi luyatshintsha yini kusiya ngokuthi lukhulunywa ngaphi lokuthi ababali bolimi lolo bayakuzwisisa yini okwakusenzakala ngezikhathi zeBhayibhili. Kungathatha umnyaka owodwa kusiya kwemithathu ukuhumutsha iMibhalo YamaKhristu YesiGrikhi, besekuthatha iminyaka emine kumbe edlula lapho ukuhumutsha iBhayibhili lilonke. Ukuhumutsha iBhayibhili ngolimi lwezandla khona kuthatha iminyaka eminengi ukwedlula leyi.”

 Kuphinda kucelwe labantu abakhulele ezindaweni ezitshiyeneyo abakhuluma ulimi lolo ukuthi bahlole lokho osekuhunyutshiwe ukuze babone ukuthi kuyazwakala yini. Lokhu bakwenza bengabhadalwa futhi umsebenzi wabo unceda abahumutshi ukuthi bahumutshe iBhayibhili eliqondileyo, elicacileyo lelizwisiseka lula. Omunye umqeqetshi wabahumutshi oseSouth Africa wathi: “Abahumutshi bazizwa belomlandu kuJehova lakulabo ababala iLizwi lakhe.”

 Nxa umsebenzi wokuhumutsha usuphelile, iBhayibhili liyaphrintwa. Kusetshenziswa izinto ezinjengephepha, i-inki, amagwaliba, i-glue, amaribhoni lokunye okunenginengi ukuze lihlanganiswe. Ngo-2019 kwasetshenziswa imali edlula amadola angu-20 miliyoni (U.S.) ukuze kuthengwe izinto lezi. Ngomnyaka ofananayo abafowethu labodadewethu abakuhlangothi lokuphrinta basebenza okwama-awa adlula 300 000 bedinda njalo bethumela amaBhayibhili endaweni ezitshiyeneyo.

 Yindaba kusetshenziswa imali enengi kangaka? Kungani abafowethu labodadewethu bezimisele ukusebenza okwesikhathi eside kangaka? UJoel Blue okuHlangothi Lokuphrinta olusemawofisini ethu amakhulu uthi: “IBhayibhili libhuku eliqakatheke kakhulu ukwedlula wonke esiwaphrintayo. Yikho sifuna ukuthi indlela elibukeka ngayo idumise uNkulunkulu wethu esimkhonzayo njalo yenze abantu babone ukuqakatheka komsebenzi wethu wokutshumayela.”

 INguqulo Yomhlaba Omutsha iphinda iphrintwe langezinye indlela ezitshiyeneyo. Ngokwesibonelo, iphrintwa ngezindimi ezingu-10 ze-braille. Kungathatha ama-awa angu-8 ukwenza yonke imiqulu ebumba iBhayibhili le-braille futhi imiqulu le nxa igadanisiwe ingaba ngamamitha angu-2.3 ubude. Siphinda siphrinte lomhlobo weBhayibhili ovunyelwayo emajele ukuze izibotshwa lazo zenelise ukulibala.

 INguqulo Yomhlaba Omutsha isincede abantu abanengi kakhulu. Ngokwesibonelo, eDemocratic Republic of the Congo kulebandla elisebenzisa isiKiluba, elisedolobheni leTombe. ITombe ikhatshana ledolobho elikhulu ngamakhilomitha adlula 1 700. OFakazi abahlala endaweni le babeleBhayibhili elilodwa zwi elalibhalwe ngesiKiluba esidala futhi babesenza okokulibolekana ukuze balungiselele imihlangano. Kodwa kusukela ngo-August 2018 INguqulo Yomhlaba Omutsha yayisitholakala ngesiKiluba esilula ukuzwisisa futhi wonke umuntu ebandleni leli wayeseleBhayibhili lakhe.

 Omunye udadewethu wakhuluma nge-Nguqulo Yomhlaba Omutsha yesiGerman wathi: “Sengikukholisa ukubala iBhayibhili, akusafanani lakuqala!” Esinye isibotshwa sabhala sathi: “Ngaphiwa INguqulo Yomhlaba Omutsha futhi iBhayibhili leli seliyitshintshile impilo yami. IBhayibhili leli lenza kube lula kakhulu ukuzwisisa iLizwi likaNkulunkulu. Sengilesifiso sokufunda okunengi ngaboFakazi bakaJehova lokuthi ngibe ngomunye wabo.”

 Ivela ngaphi imali yokuphrinta INguqulo Yomhlaba Omutsha? Ivela eminikelweni yokusekela umsebenzi womhlaba wonke njalo abanengi bayenza ku-donate.jw.org. Siyalibonga kakhulu ngeminikelo yenu.