Ibuku Lyakwe Ciili Lyakwe Samweli 8:1-18
8 Lino papisile insita Devedi walwisizye Aina Filisti+ nu kuyacimvya,+ nupya wayaposile incende iya Mategi-ama.
2 Wacimvizye Aina Moabu+ nu kuleka ukuti yalambalale pansi. Nupya wayankinye umu viputulwa* vitatu, maumba yaili yaali nu kukomwa lelo iumba lyonga litaali nu kukomwa.+ Aina Moabu izile iyaya aomvi yakwe Devedi nupya yamutwalilanga umusonko.+
3 Devedi wacimvizye Hadadeza mwana Leobu umwene uwa ku Zoba,+ pa nsita iiyo Hadadeza wayanga uku Luzi+ Lwa Yufuleti pakuti akatandike ukuteeka nupya kwene.
4 Devedi wamuposile asilika 1,700 aakwelanga pa mfwalasi alino na aapitanga ulwa pansi aali 20,000. Lyene Devedi walemalike imfwalasi+ zyonsi ukufumyako sile izili 100.
5 Lino Aina Silya aku Damasika+ yaile umu kwavwa Umwene Hadadeza uwa ku Zoba, Devedi wakomile Aina Silya+ 22,000.
6 Lyene wapanzile inkambi ya yasilika umu Silya incende ya mu Damasika, na Ina Silya izile iyaya aomvi yakwe Devedi nupya yamutwalilanga imisonko. Yeova walenganga Devedi ukucimvya konsi kuno wayanga.+
7 Nupya Devedi waposile ivishangu vyakwe goldi uku yaomvi yakwe Hadadeza nu kuvitwala uku Yelusalemu.+
8 Umwene Devedi wasenzile koopa umwingi sana ukufuma uku musumba wa Beta nu wa Belota, kuli kuti misumba yakwe Hadadeza.
9 Lyene Umwene Toi uwa ku Hamati+ uvwile ukuti Devedi watacimvya asilika yonsi yakwe Hadadeza.+
10 Fwandi Toi watumile Yolamu umwanakwe uku Mwene Devedi pakuti akamulamuke nu kumutaizya pali vino walwisizye nu kucimvya Hadadeza (pano ilingi Hadadeza walwanga na Toi), nupya Yolamu watwalile Devedi viya vyakwe siuva, vyakwe goldi, alino na vyakwe koopa.
11 Umwene Devedi wapeezile ivintu vivyo kuli Yeova, kumwi na siuva na goldi vino waposile uku nko zyonsi zino wacimvizye:+
12 kuli kuti ku Ina Silya, ku Ina Moabu,+ ku Ina Amoni, ku Ina Filisti,+ ku Ina Amaleki,+ alino na vino waposile Hadadeza+ mwana Leobu umwene wa ku Zoba.
13 Nupya Devedi waipangiile izina pa cisila ca kukoma Aina Edomu 18,000 mu Mukonko wa Musilya.+
14 Devedi wapanzile inkambi zya yasilika umu Edomu. Umu ncende zyonsi zya Edomu wapanzilemo inkambi zya yasilika nupya Aina Edomu yonsi izile iyaya aomvi yakwe Devedi.+ Yeova walenganga Devedi ukucimvya konsi kuno waya.+
15 Devedi watwalilile ukuteeka Aina Izlaeli+ yonsi nupya wapingulanga antu+ yakwe yonsi mu mulinganya nu mu ulungami.+
16 Yoabu+ mwana Zeluya u watungululanga asilika, nupya Yeoshafati+ mwana Ailudi u wasunganga ivyeo pali vino vyacitikanga.
17 Zadoki+ mwana Aitubi na Aimeleki mwana Abiata yali aa simapepo, nupya Selaya wali a kalemba.
18 Benaya+ mwana Yeoyada u watungululanga Aina Keleti na Ina Peleti.+ Nupya ya mwana Devedi yaali aa cilolo yakalamba.*
