Ibuku Lyakwe Ciili Lyakwe Samweli 20:1-26
20 Kwali kaleta wa vimvulunganya uwi zina lyakuti Sheba+ mwana Bikili, Mwina Benjamini. Walizizye ipenga+ nu kulanda ati: “Tutakweti icili consi muli Devedi, nupya tutakweti ica upyanyi cili consi muli mwana Yese.+ Fwandi mwe Ina Izlaeli mwensi swililini kuli ya leza inu!”+
2 Lyene Aina Izlaeli yonsi yatiile ukulondela Devedi nu kutandika ukulondela Sheba mwana Bikili;+ lelo Ayuda yatwalilile ukuya pamwi nu mwene wao kufuma uku Yodani ukufika uku Yelusalemu.+
3 Lino Devedi wafisile uku ng’anda yakwe* ku Yelusalemu,+ watozile aci ya pa mbali 10 yano wasiile yakusakamala ing’anda,+ waisile umu ng’anda nupya wisilepo alinzi. Watwalilanga ya mama yayo ivyakulya lelo atapanganga nayo icupo.+ Yatwalilile ukwikala mumo kwene suka imfwa yao, iikalanga kwati aa mukamfwilwa nanti cakuti iya wali nu umi.
4 Lyene umwene wanenyile Amasa ati:+ “Ama Ayuda umu manda yatatu ize kuli nene, nupya naawe kwene ulinzile ukwiza kuno.”
5 Fwandi Amasa waile aama Ayuda, nomba wene waile uku mwene pa cisila ca nsita ino umwene wasoolwile.
6 Lyene Devedi wanenyile Abishai+ ati: “Sheba+ mwana Bikili angatucitila iciipe kucila na pali vino Abusalomu wacisile.+ Senda aomvi yane nu kumuzinganya, pakuti atazana misumba ya malinga nu kuutukilamo.”
7 Fwandi asilika yakwe Yoabu,+ kuli kuti Aina Keleti, Aina Peleti,+ na aonsi yonsi amaka, yamulondiile; yafumile uku Yelusalemu nu kuzinganya Sheba mwana Bikili.
8 Lino yafisile mupiipi ni ciliwe icikalamba umu Gibyoni,+ Amasa+ wayakomenkinye. Yoabu wazwite ivyakuzwala vya mu ulwi nupya wakweti ulupanga ala luli umu cikwama cino wanyepelile umu musana. Lino watampwile, ulupanga lwaponyile.
9 Yoabu walamwike Amasa ati: “Uli uli mwinane?” Lyene Yoabu walemile Amasa uku vilezu ni kasa lya kwi lunji kwati akulonda ukumutonsola.
10 Amasa ataweni ulupanga luno Yoabu walemile, Yoabu watosile Amasa umu lunda+ na mala iyalongolokela pansi. Atamutosile imiku iili, wamutosile sile umuku onga nu kufwa afwa. Lyene Yoabu nu mwinakwe Abishai yazinginye Sheba mwana Bikili.
11 Umonsi wenga pa yonsi yakwe Yoabu wimilile umupiipi na Yoabu nupya walandanga akuti: “Wensi aali uku lusansa lwakwe Yoabu nu ku lusansa lwakwe Devedi, akonke Yoabu!”
12 Amasa wapilikitanga umu wazi wakwe pakasi ka museo. Lino umuntu wiyo waweni ukuti antu yonsi yakwimilila pali Amasa, wamufumizye umu museo nu kumutwala umu mpanga. Wamuvimvile ni cakuzwala, pano waweni ukuti antu yonsi imililanga nga yafika pali aliwe.
13 Pa cisila ca kufumya Amasa mu museo, antu yonsi yalondiile Yoabu pakuti yakazinganye Sheba+ mwana Bikili.
14 Sheba wapisile umu mitundu yonsi ya Ina Izlaeli nu kuya uku Abeli uku mpanga iya Beti-maaka.+ Aina Bikili yakolongine nupya nayo kwene yazinginye Sheba.
15 Yoabu na antu yakwe yaile iyazinguluka incende iya Abeli mu Beti-maaka nupya yatuulike umucanga pakuti yawishe iciumba ca musumba. Nupya antu yonsi aali na Yoabu yatandike ukutonsha iciumba ca musumba pakuti yaciwishe.
16 Lyene umwanaci umwi uwa mano wapunzile umu musumba ati: “Mwe yantu mwe, uvwini! Nenini Yoabu aize kuno pakuti ndande nawe.”
17 Fwandi Yoabu wapalime uku mwanaci, nupya umwanaci wamuzizye ati: “Uzye wewe Yoabu?” Yoabu nawe waswike ati: “Ee a nene.” Lelo umwanaci walanzile ati: “Uvwa kuli vino ne muomvi wako nkulanda.” Nawe waswike ati: “Nkuvwa.”
18 Umwanaci watwalilile ukulanda ukuti: “Mpiti yalandanga yakuti, ‘Lekini tukuuzye umu mpanga iya Abeli,’ nupya vivyo kwene avino nu mulandu wasilanga.
19 Inkwimililako antu ya mutende nupya acisinka umu Izlaeli. Ukulonda ukonona umusumba uwaya kwati a mayo umu Izlaeli. U mulandu ci uno ukulonda ukononela ica upyanyi cakwe Yeova?”+
20 Yoabu waswike ati: “Ntanga nonone umusumba.
21 Vivyo asi ali vino tukulonda ukucita. Nomba kuli umuntu umwi uwi zina lyakuti Sheba+ mwana Bikili ukufuma uku mpanga ya myamba iya Efulemu+ uwapondokela umwene Devedi. Ndi cakuti mwatupeela umuntu wiyo tumafuma umu musumba.” Lyene umwanaci wanenyile Yoabu ati: “Tumakusumbilila umutwe wa muntu wiyo pa ciumba!”
22 Lilyo kwene sile umwanaci wiyo waile uku yantu yonsi nupya yaputwile umutwe wakwe Sheba mwana Bikili nu kusumbilila Yoabu. Lyene Yoabu walizizye ipenga, nupya antu yasalangine ukufuma umu musumba, cila muntu waile ukwakwe;+ Yoabu nawe waswilile uku mwene ku Yelusalemu.
23 Yoabu wangalilanga asilika yonsi aa Ina Izlaeli;+ Benaya+ mwana Yeoyada+ nawe wangalilanga Aina Keleti, na Ina Peleti.+
24 Adolamu+ wangalilanga alemvilwe kuti yaombela umwene; Yeoshafati+ mwana Ailudi nawe wasunganga ivyeo pali vino vyacitikanga.
25 Sheva wali a kalemba; Zadoki+ na Abiata+ yaali aa simapepo.
26 Ila Umwina Jaili wizile aya a cilolo mukalamba* wakwe Devedi.
