Ibuku Lyakwe Ciili Lyakwe Samweli 16:1-23
16 Lino Devedi wapitilile panono papela ya mwamba,+ Ziba+ umuomvi wakwe Mefibosheti,+ waile umu kumukomenkanya ala ali na ya punda, nupya wakwezizyepo mikate 200, ya keke 100 aapangilwa ni myangazi iyume, ya keke 100 aapangilwa ni vizao ivikayako icisanya,* alino ni nsembo ikulu yakwe waini.+
2 Lyene umwene uzizye Ziba ati: “U mulandu ci uno waletela ivintu vii?” Ziba waswike ati: “Ya punda aakukwelapo amu lupwa lwa mwene, mukate ni vizao i vyakuti alumendo yalye, nupya waini u wa kumwa atiyatonta pa mulandu wa kupita umu lwanga.”+
3 Lyene umwene wamuzizye ati: “Nga umwizikulu wa musambazi wako ali kwi?”+ Ziba nawe waswike umwene ati: “Ali uku Yelusalemu, pano watalanda ukuti, ‘Ilelo Aina Izlaeli yamawezezya uwene wakwe tata kuli nene.’ ”+
4 Lyene umwene wanenyile Ziba ati: “Ivintu vyonsi vino Mefibosheti wakwata vimaya ivyako.”+ Ziba waswike ati: “Indi pansi musambazi wane.+ Si lyonsi uwalanga icikuuku kuli nene.”
5 Lino umwene Devedi wafisile umu Baulimu, umonsi umwi uwa mu lupwa lwakwe Saulo uwi zina lyakuti Shimei+ mwana Gela, wafumile akutukana ala akupalamila+ kuli Devedi.
6 Wavwintanga mawe kuli Devedi nu ku yaomvi yakwe yonsi alino nu ku yantu yonsi na antu aamaka aali ukwi lunji lyakwe Devedi na kuli cimani.
7 Shimei walandanga amazwi ya miponto ala akuti: “Fuma paa, fuma paa, we nkomi we! Ciwelewele we!
8 Yeova akulandula pali vino wakomile amu ng’anda yakwe Saulo wino wapyana pa wene, nomba Yeova watapeela uwene kuli Abusalomu umwanako. Lyene intazi yatiiza pali wewe pa mulandu wakuti wewe nkomi!”+
9 Lyene Abishai mwana Zeluya+ wanenyile umwene ati: “U mulandu ci uno simbwa mufwe+ akutukila umusambazi wane?+ Leka inje pakuti nkamuputule umutwe.”+
10 Lelo umwene uzizye ati: “Nga ca mukuma uli cii ya mwana Zeluya?+ Lekini antuka+ pano Yeova watamunena+ ati, ‘Tuka Devedi!’ Uzye fwandi a weni aangalanda ati, ‘U mulandu ci uno ukucitila vii?’ ”
11 Lyene Devedi wanenyile Abishai na aomvi yakwe yonsi ati: “Ndi cakuti umwanane uwa kuivyalila aakulonda ukunkoma,+ cimapela kwi uku Mwina Benjamini!+ Mulekini antuka pano Yeova u watamunena ukucita vii!
12 Limwi Yeova alalola ukucula kwane+ nupya Yeova alancitila ivisuma pa kutukwa kuno natukwa ilelo.”+
13 Devedi na antu yakwe yatwalilile ukupita umu museo lino Shimei wapitanga umu mbali ya mwamba ala akuyatuka+ nu kuyavwintila mawe nu kuyasumbila lukungu ulwingi.
14 Umwene na antu yonsi yano wali nayo yafisile kuno yayanga ala iyatonta, nupya yapuuzile.
15 Lyene Abusalomu na Ina Izlaeli yonsi yafisile umu Yelusalemu nupya Aitofeli+ wali nayo.
16 Lino Hushai+ Umwina Aliki,+ cuza wakwe Devedi waile kuli Abusalomu, walanzile kuli Abusalomu ati: “Uwikale manda aingi mwene!+ Uwikale manda aingi mwene!”
17 Lino Abusalomu uvwile vivyo uzizye Hushai ati: “Uzye kuu ali kutemwa kwa cumi kuli cuzako? U mulandu ci uno utaapitiile pamwi na cuzako?”
18 Hushai wanenyile Abusalomu ati: “Nemo indi uku lusansa lwakwe wino Yeova, antu yaa, na Ina Izlaeli yonsi iyasoolola. Namatwalilila ukuya pamwi nawe.
19 Nupya uzye a weni wino ndinzile ukuombela? Uzye ntalinzile ukuombela umwanakwe? Wakwe vino naombiile tata wako, vivyo kwene avino naawe kwene ndakuombela.”+
20 Lyene Abusalomu wanenyile Aitofeli ati: “Mpandeko mano.+ I vyani vino tulinzile ukucita?”
21 Aitofeli wanenyile Abusalomu ati: “Laala na aci ya pa mbali+ yakwe tata wako, yano wasiile yakusakamala ing’anda.+ Lyene Aina Izlaeli yonsi yaluvwa ukuti watupatwa kuli tata wako, nupya aakukutungilila yalakomeleka.”
22 Fwandi yapangiile Abusalomu itenti api paala+ lya ng’anda, nupya Abusalomu waizi na aci ya pa mbali yakwe isi+ ala na Ina Izlaeli yonsi yakulolako.+
23 Mu manda yaya antu yalolanga ukupanda mano kwakwe Aitofeli+ kwati ku kufuma kuli Leza wa cumi. Nupya vikwene avino Devedi na Abusalomu nayo kwene yalolanga ukupanda mano konsi kwakwe Aitofeli.
Mafutunoti
^ Sana sana masamvu limwi ni vizao vya ku tuncindu.
