Ibuku Lyakwe Ciili Lyakwe Samweli 1:1-27
1 Pa cisila ca mfwa yakwe Saulo lino Devedi wafumile umu kucimvya Aina Amaleki, wikazile umu Zikilagi+ pa manda yaili.
2 Pa wanda wakwe citatu, umonsi umwi wafumile umu nkambi yakwe Saulo ala azwite ivyakuzwala vilepuke nupya wali nu lukungu ku mutwe. Lino wafisile kuli Devedi waponyile pansi ala afupime.
3 Devedi wamuzizye ati: “Aekwi kuno wafuma?” Nawe waswike ati: “Inutuka ukufuma uku nkambi ya Ina Izlaeli.”
4 Nupya Devedi wamunenyile ati: “ Neene, uzye ivintu vili uli kuno wafuma?” Nawe wamwaswike ati: “Antu iyutuka umu ulwi nupya aingi iyafwa. Nupya na Saulo kwene nu mwanakwe Yonatani nayo kwene iyafwa.”+
5 Lyene Devedi uzizye umuntu wiyo ati: “Nga wamanya uli ukuti Saulo nu mwanakwe Yonatani iyafwa?”
6 Mulumendo nawe waswike ati: “Lino naile pa Mwamba uwa Giliboa+ ukwaula ukwenekela, nazanyile Saulo watasintilizya api sumo lyakwe, nupya ala maceleta na aonsi atiyakwela pa mfwalasi yakupalama kuli aliwe.+
7 Lino Saulo wapiliwike nu kundola, wangamile, nani naswike nati ‘Mukwai!’
8 Wanguzizye ukuti, ‘Wewe weni?’ Nani namwaswike inti, ‘Nene Mwina Amaleki.’+
9 Lyene wanenyile wati, ‘Iza kuno unkome, pano nkuvwa sana ukali lelo ncili nu umi.’
10 Fwandi napalime kuli aliwe nu kumukoma+ pano namanyile ukuti asikupusuka pa mulandu ni vilonda vino yamucisile. Lyene namuzuzile icisote ni cibango icali ukwi kasa, nupya ali vino inkuletela musambazi wane.”
11 Lino Devedi uvwile vivyo walepwile ivyakuzwala vyakwe, nupya na antu yonsi yano wali nayo, nayo kwene yacisile vivyo kwene.
12 Yaloosizye nupya yafunzile+ ukufika manguzi pa mulandu wakwe Saulo na pa mulandu wakwe Yonatani umwanakwe, na pa mulandu wa yantu yakwe Yeova alino na amu ng’anda yakwe Izlaeli+ pano yakomilwe umu ulwi.
13 Devedi uzizye umulumendo wiya ati: “Wewe weni?” Nawe waswike ati: “Nene mwana wa muntu uwafuma uku mpanga yuze Umwina Amaleki.”
14 Devedi nawe wamuzizye ati: “U mulandu ci uno utuvwilile intete pa kukoma umuntu wino Yeova+ wasoolola?”
15 Lyene Devedi wamile umulumendo wenga pa yaomvi yakwe nu kumunena ati: “Iza ukome umuntu wii.” Nawe waile amukoma nu kufwa afwa.+
16 Lyene Devedi walanzile pa muntu uwakomilwe ati: “Uwazi wako umaya pa mutwe wako, pano watuilandila wemwineco ukuti, ‘Nakomile umusoololwe wakwe Yeova.’ ”+
17 Lyene Devedi wasisile ulwimbo lwa kuloosha Saulo na Yonatani+ mwana Saulo
18 nupya wanenyile Ayuda ukuti yalinzile ukusambilila ulwimbo kwene luu ulukaamwa ukuti “Ulapwa,” ulwalembwa umwi buku lyakwe Yashali:+
19 “We Izlaeli antu asuma iyakomelwa pa myamba yako.+
Kalanda we vino antu yamaka iyafwa!
20 Mutanena antu yamu Gati;+Nupya mutalanda umu miseo yamu Ashikeloni,Pano limwi ana akazyana aa Ina Filisti yangasansamuka,Nanti limwi ana akazyana aa yantu aatazembululwa yangasansamuka sana.
21 Mwe myamba ya Giliboa,+Si ulumi nanti imvula vitiza pali mwemwe,Nupya umu vyalo mutaya imisangulo ya muzilo,+Pano cishangu ca yantu ya maka icikowela,Lyene icishangu cakwe Saulo citapasilwe na mafuta.
22 Ulapwa wakwe Yonatani utawezile sile,+Watosile umunyefu wa yantu ya maka nu kuzwisha uwaziNu lupanga lwakwe Saulo lutawezile sile ukwaula ukuomba umulimo.+
23 Saulo na Yonatani+ yaali atemwikwe lino yaali nu umi,Nu mu mfwa kwene yatapaalukine.+
Yasimulanga ukucila ya lya ng’anda,+Nupya yakweti amaka ukucila ya cisama.+
24 Mwe yana akazyana amu Izlaeli looshini Saulo,Uwamuzwisile insalu ziyenzu nupya izisuma sana,Uwamwikiile iviyembelo vyakwe goldi pa vyakuzwala vinu.
25 Iye mwe vino antu ya maka yafwa umu ulwi!
Yonatani wafwila pa myamba inu!+
26 Indi sana nu ulanda pali wewe Yonatani mwinane;Nakutemilwe sana.+
Nupya ukutemwa kuno wantemilwe kwacizile pa kutemwa kwa yanaci.+
27 Kalanda we vino antu ya maka yafwaNupya ivyanzo vya nkondo i vilowa!”
