Ibuku Lyakwe Ciili Lyakwe Samweli 10:1-19
-
Aina Amoni na Ina Silya yacimviwa (1-19)
10 Pa cisila umwene wa Ina Amoni+ wafwile, nupya Hanuni umwanakwe u wamupyanyile pa wene.+
2 Lyene Devedi walanzile ati: “Ndalanga ukutemwa kwa cumi kuli Hanuni mwana Nahashi pa mulandu na vino isi wandanzile ukutemwa kwa cumi.” Fwandi Devedi watumile aomvi yakwe kuli Hanuni pakuti yakamuteekezye pa mfwa yakwe isi. Nomba lino aomvi yakwe Devedi yafisile umu mpanga ya Ina Amoni,
3 ya cilolo ya Ina Amoni yanenyile Hanuni umwene wao iyati: “Uzye ukwelenganya ukuti Devedi watatuma aakwizakuteekezya pakuti acindike tata wako? Uzye atatumile aomvi yakwe pakuti ize yalondelezye umu musumba nu kulola pano yangingilila pakuti ize yauzanze?”
4 Fwandi Hanuni walemile aomvi yakwe Devedi nu kuyapela ivilezu+ mbali nupya wayalepwilile ivyakuzwala vyao ukufuma pansi kufika uku matako ayazinga nu kuyazinga.
5 Lino Devedi uvwile ilyasi lilyo, lilyo kwene sile watumile antu aakuti yayakomenkanye, pano alanga iyazewana sana; nupya wayanenyile ati: “Mwikale umu Yeliko+ kufikila ivilezu vikakule alino muce muwele.”
6 Mu kuya kwa nsita Aina Amoni izile iyalola ukuti Devedi watayapata, fwandi yaalipiile Aina Silya aikalanga uku Beti-leobu,+ na Ina Silya aikalanga uku Zoba,+ asilika yonsi apitanga ulwa pansi yaali 20,000; nupya yalipiile nu mwene wa Ina Maaka+ uwali na aonsi 1,000, uku Ishitobu nako yaalipiile aonsi+ 12,000.
7 Lino Devedi uvwile vivyo, watumile Yoabu pamwi na asilika yonsi ukwikako sile na asilika yakwe aamaka sana.+
8 Lyene Aina Amoni yaile iyatantama pa mpongolo ya musumba ala Aina Silya aku Zoba na aku Leobu kumwi na asilika ya ku Ishitobu na asilika yakwe Maaka iimilila pa ncende iwatuke.
9 Lino Yoabu waweni alwani yakuya umu kumulwisha kufuma uku nkoleelo nu ku cisila, wasoolwile asilika yamwi ukufuma pa yasilika amanyikishe ivya ulwi pa Ina Izlaeli nupya wayatantike pakuti yakomenkaye Aina Silya.+
10 Nupya walesile ukuti Abishai+ umwinakwe aliwe atungulule asilika ashala, pakuti ayatantike umu maumba uku kukomenkanya Aina Amoni.+
11 Lyene Yoabu walanzile ati: “Ndi cakuti Aina Silya yakwatisha maka wize ungazwe; lelo ndi cakuti Aina Amoni aliyo yakwatisha maka namaiza nkwazwe.
12 Tulinzile ukuya akome nupya asipe+ pakuti tucingilile antu itu ni misumba yakwe Leza witu, nupya Yeova amacita cino akulola+ ukuti ali cisuma.”
13 Lyene Yoabu na antu yakwe yatandike ukuya umu kukomenkanya Aina Silya pakuti yalwe nayo, nupya Aina Silya yutwike.+
14 Lino Aina Amoni yaweni ukuti Aina Silya yutuka, nayo kwene yutwike ukufuma kuli Abishai nu kuya umu musumba. Pa cisila Yoabu wafumile uku Ina Amoni nu kuswilila uku Yelusalemu.
15 Lino Aina Silya yaweni ukuti yacimviwa uku Ina Izlaeli, yakolongine nupya kwene.+
16 Fwandi Hadadeza+ watumile akuyaama Aina Silya aikalanga umu ncende ya Luzi,*+ lyene yaile uku Helamu, nupya Shobaki umukalamba wa yasilika yakwe Hadadeza u wayatungululanga.
17 Lino yanenyile Devedi ilyasi lilyo, lilyo kwene sile wakolonganike Aina Izlaeli yonsi nu kulamba Uluzi Lwa Yodani iyaya uku Helamu. Lyene Aina Silya yaipekinye pakuti yakakomaanye Devedi, nupya yaile iyamulwisha.+
18 Lelo Aina Silya yutwike ukufuma uku Ina Izlaeli nupya Devedi wakomile aonsi 700 aali pa maceleta na aonsi 40,000 aali pa mfwalasi, wakomile na Shobaki umukalamba wa yasilika yao uwafwilile kuuku kwene.+
19 Lino aene yonsi, kuli kuti aomvi yakwe Hadadeza yaweni ukuti yacimviwa uku Ina Izlaeli, lilyo kwene sile yapanzile umutende na Ina Izlaeli nupya yatandike ukutungululwa na aliyo;+ na Ina Silya yatandike ukuvwa intete izya kwazwa Aina Amoni.
Mafutunoti
^ Kuli kuti Uluzi Lwa Yufuleti.
