Ibuku Lyakwe Ciili Lyakwe Samweli 18:1-33
18 Lyene Devedi wapenzile aonsi yano wali nayo nu kusoolola akwangalila maumba umuli antu 1,000 alino na akwangalila maumba umuli antu 100.+
2 Nupya Devedi watumile antu yano wali nayo mu maumba yatatu, iumba lyonga lyatungululwanga na Yoabu,+ lyuze nalyo lyatungululwanga na Abishai+ umwina wakwe Yoabu mwana Zeluya,+ alino lyuze nalyo lyatungululwanga na Itai+ Umwina Gati. Lyene umwene wanenyile antu ati: “Nani kwene namapita namwe.”
3 Lelo yalanzile iyati: “Utatukonka,+ pano ndi cakuti tuutuka yasikusakamala pali sweswe; nupya ndi cakuti afu wa yasilika itu yafwa, yasikusakamala pali sweswe, pa mulandu wakuti wacindama ukucila antu 10,000.+ Fwandi cingazipa ndi cakuti watutumilanga uwazwilizyo ukufuma umu musumba.”
4 Umwene wayanenyile ati: “Namacita vyonsi ivingamuzipila.” Fwandi umwene wimilile umupiipi ni mpongolo ya musumba, nupya antu yonsi yafumile umu maumba umwali antu 100 nu mu maumba umwali antu 1,000.
5 Lyene umwene wanenyile Yoabu, Abishai, na Itai ati: “Mutacita iciipe kuli Abusalomu pa mulandu wane.”+ Antu yonsi yuvwile vino umwene walanzile pali Abusalomu lino wanenanga atungululanga asilika.
6 Lyene antu yaile umu mpanga umu kukomenkanya Aina Izlaeli, nupya yaile umu kulwila umu mutengo wa Efulemu.+
7 Kuuku kwene akuno aomvi yakwe Devedi+ yaile iyacimvya Aina Izlaeli,+ nupya antu aingi yakomilwe pa wanda uuwa, kuli kuti aonsi 20,000.
8 Ulwi wasalangine umu ncende iiya yonsi, nupya aafwile umu mutengo yavuzile ukucila yano yakomile uku lupanga pa wanda uuwa.
9 Abusalomu wakomenkine na aomvi yakwe Devedi ukwaula ukwenekela. Abusalomu wakwezile pali punda, nupya punda waile apita umwisika lya misambo ya cimuti cikulu, umutwe wakwe Abusalomu walemizye umu muti icakuti watandike ukunyinyinda, lelo punda wene watwalilile ukupita.
10 Lyene umwi waweni ivyacitike nupya wanenyile Yoabu+ ati: “Indola Abusalomu akunyinyinda uku muti.”
11 Yoabu wanenyile umuntu wiyo ati: “Ndi cakuti watumulola, u mulandu ci uno utali wamukomela papo kwene sile? Ucita vivyo nga nakupeela impiya zyakwe siuva 10 nu musipi.”
12 Nomba umuntu wiyo wanenyile Yoabu ati: “Nanti cakuti ungampeela impiya zyakwe siuva 1,000, ntanga inkome umwana wa mwene, pano tuvwile lino umwene wakunenyile kumwi na Abishai na Itai, ukuti ‘kusi alinzile ukucita iciipe kuli Abusalomu.’+
13 Ndi cakuti ntuvwila nupya imukoma, nga camanyikwe uku mwene, nupya nga utancingilile.”
14 Lyene Yoabu walanzile ati: “Nkusumba sile insita ukulanda nawe!” Fwandi Yoabu watozile inceto zitatu nu kulasa Abusalomu mu cisao ala akunyinyinda nupya ala acili nu umi.
15 Lyene aomvi asendelanga Yoabu ivyanzo aali 10 yaile iyamalilila Abusalomu.+
16 Lyene Yoabu walizizye ipenga pakuti aimike ulwi, nupya antu yawezile kuno yaile umu kuzinganya Aina Izlaeli.
17 Yasumbiile Abusalomu mu ciwina icikulu icali mu mutengo nupya yatuliikepo mutumba wa mawe+ ukulu sana. Na Ina Izlaeli yonsi yutukiile uku mwao.
18 Lino Abusalomu wali nu umi, wakuuzile icipilala umu Mukonko wa Mwene+ pano walanzile ati: “Ntakwata umwana umonsi uwa kusungilila izina lyane.”+ Fwandi watemiile icipilala izina lyakwe, nupya na ndakai kwene cikaamwa ukuti ca kwiusizyako Abusalomu.
19 Aimaazi+ mwana Zadoki wanenyile Yoabu ati: “Leka nsimule nkanene umwene ivyativicitika, pano Yeova watamulanga umulinganya pa kumupususha uku yalwani yakwe.”+
20 Lelo Yoabu wamunenyile ati: “Utakuya umukunena umwene ilelo. Ulaya ukamuneneko uwanda uze, ilelo lyene foo, pano umwana wa mwene watafwa.”+
21 Lyene Yoabu wanenyile Umwina Kushi+ ati: “Yanga ukanene umwene vino watulola.” Umwina Kushi wakontamile Yoabu nu kusimula.
22 Nupya Aimaazi mwana Zadoki wanenyile Yoabu ati: “Asi mulandu ni vimacitika, leka nsimule nkonke Umwina Kushi.” Lelo Yoabu wamunenyile ati: “U mulandu ci uno umasimwila mwanane lino kusi ilyasi lyakuyalanda?”
23 Watwalilile ukulanda ati: “Asi mulandu ni vimacitika, leka sile nsimule!” Fwandi Yoabu wamunenyile ati: “Simula!” Nupya Aimaazi wasimwile ukulungama uku nzila iyapita uku citungu ca Yodani nu kuyapitilila Umwina Kushi.
24 Lyene Devedi wikazile pakasi ka mpongolo ziili zya mu musumba,+ nupya umulinzi+ wakwezile api paala lya mpongolo mupiipi ni ciumba. Waweni umonsi akusimula ala ali wenga.
25 Fwandi umulinzi wapundilile umwene nu kumunena vino waweni. Lyene umwene watiile: “Ndi cakuti ali wenga ale watakwata ilyasi ilya kwizalanda.” Lino wayanga akupalamila,
26 umulinzi waweni umonsi na muze akusimula. Lyene umulinzi wanenyile uwali pa mpongolo ati: “Lola! Umonsi na muze akusimula ali wenga!” Umwene watiile: “Nawe kwene watakwata ilyasi ilya kwizalanda.”
27 Mulinzi walanzile ati: “Umonsi wa kutandikilako akusimula kwati Aimaazi+ mwana Zadoki,” fwandi umwene walanzile ati: “U muntu umusuma nupya akuleta ilyasi lisuma.”
28 Lyene Aimaazi wapundilile umwene ati: “Vyonsi vili sile ningo!” Wafukime pa nkoleelo ya mwene nupya walanzile ati: “Si Yeova Leza wako alumbanyiziwe, uwatakupeela antu atiyakupondokela musambazi wane!”+
29 Lelo umwene uzizye ati: “Uzye Abusalomu ali sile ningo?” Aimaazi waswike ati: “Inalola icimvulunganya icikalamba lino Yoabu ali akutuma aomvi yako, lelo ntalimanyile ivyali vikucitika.”+
30 Umwene walanzile ati: “Fuma paa iza uwimilile kuu.” Nawe wafumilepo nu kuyaimilila pauze.
31 Lyene Umwina Kushi wafisile+ nupya walanzile ati: “Si umusambazi wane apokelele ilyasi lii: Ilelo Yeova watakulanga umulinganya pa ku kupususha uku yantu yonsi aakupondokela.”+
32 Lelo umwene uzizye Umwina Kushi ati: “Uzye Abusalomu ali sile ningo?” Umwina Kushi waswike ati: “Si alwani yonsi aa musambazi wane na yonsi aalondanga ukukukoma yaye wakwe Abusalomu!”+
33 Umwene uvwile sana ulanda nupya wakwezile pa muputule wa papela uwali pa mpongolo nu kutandika ukulila, lino wapitanga walilanga akuti: “Iye mwe mwanane Abusalomu, mwanane, Abusalomu mwanane! Nga icazipa nene imfwa ukucila wewe, Abusalomu mwanane, mwanane Abusalomu!”+
