Ibuku Lyakwe Ciili Lyakwe Samweli 19:1-43
19 Lyene yanenyile Yoabu iyati: “Umwene akulila nu kuloosha Abusalomu.”+
2 Fwandi pa wanda uuwa antu yonsi yatandike ukuloosha nanti cakuti yacimvizye, pano yuvwile ukuti umwene akuloosha umwanakwe.
3 Antu yaswilile cimyamya mu musumba+ pa wanda uuwa wa yantu aali ni nsonyi pa mulandu nu kuutuka umu ulwi.
4 Umwene wavimbiile pa manso nu kutwalilila ukulila ni izwi ilikalamba ati: “Iye mwe, mwanane Abusalomu! Abusalomu mwanene, mwanane Abusalomu!”+
5 Lyene Yoabu waile uku ng’anda ya mwene nu kumunena ati: “Ilelo watuzewanya aomvi yako yonsi atiyakupususha nu kupususha anako alumendo+ na akazyana,+ ya mama yako na ya mama yako aa pa mbali.+
6 Watemwa aakupata nupya wapata aakutemwa, pano ilelo watulanga sile apaswe ukuti aakwangalila asilika na aomvi yako aa sile sile kuli wewe, insininkizya ukuti ndi cakuti Abusalomu atwalilila ukuya nu umi ilelo, nupya swensi itufwa, nga icili sile ningo kuli wewe.
7 Lyene katuka, yanga kakomelezye aomvi yako, pano nkulapa pali Yeova ukuti ndi cakuti utacisile vivyo, kusi nanti aumwi aamashala naawe ilelo usiku. Cico cimakwipila sana ukucila ni viipe vyonsi ivyakucitikila ukufuma uwance wako ukufika na ndakai.”
8 Fwandi umwene wakatwike nu kuyaikala pa mpongolo ya musumba, nupya antu yonsi yayamanyisizye ukuti: “Umwene wataikala pa mpongolo.” Lyene antu yonsi yaile uku mwene.
Lelo Aina Izlaeli yutwike, cila muntu utukiile ukwakwe.+
9 Antu yonsi amu mitundu ya Ina Izlaeli yapaazyanyanga iyati: “Umwene watupuswishe uku yalwani itu,+ nupya watupuswishe nu ku Ina Filisti; nomba ilelo watautuka impanga pa mulandu na Abusalomu.+
10 Nupya Abusalomu wino twasonsile ukulatuteeka,+ watafwa umu nkondo,+ u mulandu ci fwandi uno musikuwezezya umwene?”
11 Umwene watumile mazwi kuli ya simapepo, kuli kuti Zadoki+ na Abiata+ akuti: “Landini na akalamba ya mu Yuda+ muti, ‘U mulandu ci uno mwemwe muyelile akushalikizya ukuwezya umwene uku ng’anda yakwe, lino inuvwa Aina Izlaeli yonsi yakulanda yakuti yamawezya umwene uku ng’anda yakwe?
12 Mwemwe ina yane nupya mwemwe ya lupwa yane. U mulandu ci uno muyelile aakushalikizya ukumbwezya?’
13 Nupya munene Amasa+ muti umwene walanda wati, ‘Uzye asi wewe lupwa wane? Si Leza amfulule ndi cakuti utamaya umukalamba wa yasilika yane ukupyanikizya pali Yoabu+ ukutandika likwene.’ ”
14 Fwandi walenzile Ayuda yonsi kuti yatandike ukumutungilila, nupya yatumile mazwi uku mwene iyati: “Wela kumwi na aomvi yako yonsi.”
15 Umwene watandike ukuswilila nupya wafisile pa Luzi Lwa Yodani, Ayuda yaile uku Giligali+ umu kukomenkanya umwene nupya yamusukilile iyamulamvya Uluzi Lwa Yodani.
16 Lyene Shimei+ mwana Gela, Umwina Benjamini uwa ku Baulimu, wapitishe pakuti apitile pamwi na Ayuda uku kukomenkanya umwene Devedi,
17 wali na aonsi Aina Benjamini 1,000. Nupya Ziba+ umuomvi wa mu ng’anda yakwe Saulo pamwi na anakwe aonsi 15 alino na aomvi 20, yaile zuwa zuwa uku Yodani lino umwene atatala wafika.
18 Ziba walamvile uluzi nu kulamvya amu lupwa lwa mwene alino nu kucita consi cino umwene walondanga. Lelo Shimei mwana Gela wafukime pa nkoleelo ya mwene lino umwene wali umupiipi nu kulamba Uluzi Lwa Yodani.
19 Wanenyile umwene ati: “Musambazi wane, unjelele pa viipe vino nacisile+ pa wanda uno wafumile umu Yelusalemu. Si umwene atasunga ivintu vivyo uku mwenzo,
20 pano ne muomvi wako manyile ukuti nayembwike; nupya ilelo nene intandikilapo ukwiza kufuma pa ya mu ng’anda yakwe Jozefu yonsi.”
21 Lilyo kwene sile Abishai+ mwana Zeluya+ walanzile ati: “Uzye Shimei atalinzile ukukomwa vino watusile umusoololwe wakwe Yeova?”+
22 Lelo Devedi waswike ati: “Nga cii camukuma uli ya mwana Zeluya,+ pakuti munkanye vino nkulonda ukucita ilelo? Uzye kuli alinzile ukufwa umu Izlaeli ilelo? Uzye ntamanyile ukuti nene umwene umu Izlaeli?”
23 Lyene umwene wanenyile Shimei ati: “Usikufwa.” Nupya walafile kuli aliwe.+
24 Mefibosheti+ umwizikulu wakwe Saulo nawe kwene waile umu kukomenkanya umwene. Atafulile maulu nanti ukupela ivilezu nanti ukufula ivyakuzwala vyakwe kufuma pa wanda uno umwene wafumilepo ukufika pa wanda uno wawezile umu mutende.
25 Lino wafisile* uku Yelusalemu uku kukomenkanya umwene, umwene wamuzizye ati: “Mefibosheti u mulandu ci uno utapitiile nani?”
26 Nawe waswike ati: “Musambazi wane, umuomvi wane+ wambefile. Namunenyile inti: ‘Mpekanyizizye punda pakuti inkwele impite nu mwene,’ pano ne muomvi wako nalemala.+
27 Lelo Ziba wambepizye kuli wewe musambazi wane.+ Nomba musambazi wane waya wakwe malaika wakwe Leza wa cumi, fwandi cita icili consi icingakuzipila.
28 Musambazi wane nga wakoma yonsi amu ng’anda yakwe tata, lelo wanjika pa yaomvi yako aakaliila pamwi naawe,+ uzye fwandi i nsambu ci zino nkweti izyakuti nalondelapo na vyuze uku mwene?”
29 Lelo umwene walanzile ati: “U mulandu ci uno ungalandila vii? Impingula ukuti wemo na Ziba mulinzile ukwankana impanga.”+
30 Lyene Mefibosheti wanenyile umwene ati: “Leka sile atole impanga yonsi, pano lyene umwene watawela ukwakwe umu mutende.”
31 Lyene Bazilai+ Umwina Gilyadi wizile ukufuma uku Logelimu pakuti asukilile umwene uku Yodani.
32 Bazilai wali umukote sana, wali ni myaka 80, watwalilanga umwene ivyakulya lino wikalanga umu Mahanaimu+ pano wali u mukankala sana.
33 Fwandi umwene wanenyile Bazilai ati: “Iza tulambe uluzi swensi, indakupeela ivyakulya uku Yelusalemu.”+
34 Lelo Bazilai waswike umwene ati: “I myaka inga iya umi ino nashala nayo pakuti inje nu mwene uku Yelusalemu?
35 Indi ni myaka 80.+ Uzye ningapusanya icisuma ni ciipe, nsiuvwa usuma muli vino nkulya na vino nkumwa. Nupya nsiuvwa mazwi yakwe ya kiimba aonsi na anaci.+ Nga fwandi u mulandu ci uno nimayela icisendo kuli wewe musambazi wane?
36 Musambazi wane icilinga pali vino ne muomvi wako inkufisha pa Luzi Lwa Yodani. U mulandu ci uno ungandipilila pali cii cino nacita?
37 Si leka ne muomvi wako nswilile, nupya si leka nkaziikwe umu musumba uwaya umupiipi nu kwaziikwa tata na mayo.+ Nomba Kimuamu+ muomvi wako aewi. Pitini nawe nupya ungamucitila consi cino ukulonda.”
38 Fwandi umwene walanzile ati: “Kimuamu amapita nani, nupya ndamucitila cino ukulola ukuti i cingazipa; consi cino wandenga acino ndakucitila.”
39 Lyene antu yonsi yatandike ukulamba Uluzi Lwa Yodani, nupya lino umwene walamvile watonswile Bazilai+ nu kumupaala; nupya Bazilai waswilile ukwakwe.
40 Lino umwene walamvile nu kuya uku Giligali,+ Kimuamu wapisile nawe. Ayuda yonsi na afu wa Ina Izlaeli yalamvizye umwene.+
41 Lyene Aina Izlaeli yonsi yaile uku mwene nu kumuzya iyati: “U mulandu ci uno aina itu amu mutundu wakwe Yuda yakwivile nu kukulamvya Uluzi Lwa Yodani kumwi na amu ng’anda yako alino na antu yako yonsi?”+
42 Ayuda yonsi yaswike Aina Izlaeli iyati: “Umwene a lupwa witu mupalamishe.+ U mulandu ci uno mwasokela pali cii? Uzye kuli icili consi cino itulya cino umwene watatukalila nanti ukutupeela upe uli onsi?”
43 Lelo Aina Izlaeli yaswike Ayuda iyati: “Twakwata imitundu 10, fwandi tukweti maka pali Devedi ukumucila. Nga lyene u mulandu ci uno mwatusuulila? Uzye asi sweswe twalinzile ukuya akutandikilako ukuwezya umwene witu?” Lelo Ayuda yacimvizye Aina Izlaeli mu kupaazyanya kuko.
Mafutunoti
^ Nanti limwi, “wafumile.”
