Lipuzo Ze Zwa Kwa Babali

Mubuso wa lifasi wa Britain ni America ne u bile lili mubuso o maata wa busupa mwa lifasi ka ku ya ka bupolofita bwa mwa Bibele?

▪ Siswaniso se situna sa sipi sa naa boni Mulena Nebukadenezare mwa pono ha si yemeli mibuso kaufela ye maata ye kile ya ba teñi mwa lifasi. (Dan. 2:31-45) Siswaniso seo ne si yemela feela mibuso ye maata ya lifasi ye ketalizoho ye ne lwanisize batu ba Mulimu mwa nako ya Daniele ni hamulaho wa lifu la hae.

Ha naa bulela taluso ya siswaniso sa sipi seo, Daniele u talusa kuli mubuso wa lifasi wa Britain ni America ne u ka simuluha kwa Roma, isiñi kuli ne u ka tula Roma. Daniele naa bulezi kuli sipi i kalela mwa linumbu mi i zwelapili ku yo fita kwa mahutu mane ku ya cwalo ni kwa minwana ya mahutu. (Kwa linumbu ni minwana ya kwa mahutu, sipi yeo i zwakani ni lizupa.) * Taba yeo i bonisa kuli mubuso wa lifasi wa Britain ni America ne u ka simuluha kwa mubuso wa Roma, ona o yemelwa ki linumbu za sipi. Seo luli ki sona se ne si ezahalile. Britain ne i li kalulo ye nyinyani ya mubuso wa Roma, kono kwa mafelelezo a lilimo za ma 1700 ya kala ku ba mubuso o maata. Hasamulaho, naha ya United States ya ba ye maata hahulu. Kono ka nako yeo, Britain ni United States ne li si ka ba kale mubuso o maata wa busupa o bulezwi mwa Bibele. Libaka? Bakeñisa kuli linaha zeo ne li si ka kalisa kale ku sebelisana hamoho ka nzila ye ipitezi. Ne li kalisize ku eza cwalo ka nako ya Ndwa ya Lifasi ya Pili.

Ka nako yeo “bana ba Mubuso” ne ba fumaneha hahulu mwa United States. Musebezi wa ku kutaza ne u etelelwa ku zwelela kwa Brooklyn, ili kwa New York. (Mat. 13:36-43) Bakreste ba ba tozizwe hape ne ba tukufalezwi mwa musebezi wo wa ku kutaza mwa linaha ze ne busiwa ki Britain. Ka nako ya Ndwa ya Lifasi ya Pili, Britain ni United States ne li swalisani hahulu. Bubeli bwa linaha zeo ne li lwanisize lila za zona. Bakeñisa kuli Ndwa yeo ne i tahisize kuli linaha za Britain ni United States li be ni moya wa ku lata hahulu naha ya habo, linaha zeo hape ne li lwanisize batu ba ne ba li kalulo ya peu ya ‘musalaa’ Mulimu. Mibuso yeo ne i kwalile musebezi wa ku hatisa libuka ze ñwi za peu ya musali mi ya beya mwa tolongo batu ba ne ba etelela musebezi wa ku kutaza.—Sin. 12:17.

Ku zwelela ku ze lu bala mwa Bibele, lu fumana kuli Mubuso wa busupa o maata ne u si ka bonahala kwa mafelelezo a lilimo za ma 1700 ili ka nako yeo Britain ne i kalile ku ba mubuso o maata. Kono mubuso wo ne u bonahalile kwa makalelo a lizazi la Mulena. *

[Litaluso za kwatasi]

[Siswaniso se si fa likepe 19]

Mizwale ba 8 ba kwa sibaka se situna sa zamaiso ne ba lengilwe mwa tolongo mwa kweli ya June ka 1918