Bibele Yacincanga Bupilo Bwa Batu

KI LIKA MAÑI zenetusize muuna yasimuluha kwa Scotland kulemuha kuli kunani nto yeñwi ya butokwa yefita kueza pisinisi yefumanisa masheleñi amañata? Ki lika mañi zenetusize muuna wa kwa Brazil kutuhela mupilelo omaswe wa buhule ni kuzuba kwai? Ki lika mañi zenetusize muuna wa kwa Slovenia kutuhela mukwa wa kunwa hahulu bucwala? Mubale litaba ze kuli muutwe zene babulezi batu ba.

“Nekubonahala inge kuli neniikola bupilo luli.”—BO JOHN RICKETTS

SILIMO SENE BAPEPILWE: 1958

NAHA KONE BAPEPEZWI: SCOTLAND

ZENE BAEZIZE KWAMULAHO: NEBANANI PISINISI YENDE

BUPILO BWAKA BWA KWAMULAHO: Hane nisali mwanana, neniikola bupilo luli. Bo ndate neli masole mwa naha ya Britain, kacwalo neluyanga hahulu kwa libaka zeshutana-shutana. Nelupilile mwa linaha zecwale ka England, Germany, Kenya, Malaysia, Ireland, ni Cyprus. Mi hane ninani lilimo ze 8, baniisa kwa sikolo mwa naha ya Scotland, mi neni inanga mwahali a sikolo seo. Hamulaho wa nako nafeza kosi yene nieza kwa yunivesiti ya Cambridge.

Hane ninani lilimo ze 20, nakalisa pisinisi ya kulekisa oli, mi neniezize pisinisi yeo ka lilimo ze 8. Nenikalile kuezeza pisinisi yeo mwa South America, kihona niya mwa Africa, mi hasamulaho naya kwa Western Australia. Hase nifitile kwa Australia, naba ni pisinisi yetuna hahulu, kono hamulaho wa nako nailekisa hape.

Natuhela kueza pisinisi inze ninani lilimo ze 40, mi naitusisa masheleñi ane nifumani mwa pisinisi yene nilekisize yeo. Kueza cwalo nekunitusize kuba ni nako ya kuzamaya mwa libaka zeñata. Nenipotolohanga mwa Australia ka mutututu habeli mwa silimo, mi mane nenipotelanga libaka zeñwi mwa lifasi hañwi ka silimo. Nekubonahala inge kuli neniikola bupilo luli.

BIBELE MONE ICINCELIZE BUPILO BWAKA: Pili nisika tuhela kale pisinisi yene nieza, nenibatanga kuziba monikona kuboniseza buitumelo ku Mulimu bakeñisa lika zende zene niikola mwa bupilo. Nakalisa kuyanga kwa Keleke ya Anglican, ili kone niyanga hane nisali mwanana. Kono kwa keleke yeo nebasa lutangi litaba zetomile fa Bibele. Hasamulaho, nakalisa kuyanga kwa bulapeli bwa Mormoni, kono nenisika zwelapili bakeñisa kuli lituto zabona nelisika toma fa Bibele.

Zazi leliñwi, Lipaki za Jehova bato ngongota fa munyako wa ndu yaka. Hane lunze luikambota, nalemuha kuli lituto zabona litomile fa Bibele. Liñolo leliñwi la mwa Bibele lene bababile neli la 1 Timotea 2:3, 4. Liñolo le, libonisa kuli tato ya Mulimu kikuli “batu ba mufuta kaufela bapiliswe mi babe ni zibo yenepahezi ya kuziba niti.” Nenitabezi hahulu kuli Lipaki nebasa buleli feela za zibo kono nebabulela za zibo yenepahezi yetomile fa Bibele.

Kuituta Bibele ni Lipaki za Jehova kunitusize kufumana zibo yeo. Ka mutala, niitutile kuli Jehova ni Jesu haki silaalu sina mobuboniseza bulapeli bwa buhata; kono ki batu bababeli babashutana. (Joani 14:28; 1 Makorinte 11:3) Nenitabezi hahulu hane niitutile niti ka za taba yeo. Neniikutwile hahulu bumaswe kuli nenisinyize nako yeñata inze nilumela tuto ya buhata yecwalo!

Hamulaho wa nako, nakalisa kufumanehanga kwa mikopano ya Lipaki za Jehova. Nenitabisizwe hahulu ki silikani ni muzamao omunde wa batu kaufela kwateñi, nebabonahala kuli ki batu babasaba Mulimu. Nebabonisana lilato la niti, mi taba yeo yanitusa kulemuha kuli nifumani bulapeli bwa niti.—Joani 13:35.

MONITUSELIZWE: Hamulaho wa kukolobezwa, nakopana ni musali wa libizo la Diane. Naahuliselizwe mwa lubasi lwa Lipaki za Jehova, mi naanani mikwa yeminde yene nitabela. Hamulaho wa nako, lwanyalana. Niikutwa kuli Jehova unifuyauzi ka kunifa bo Diane babanani silikani sesinde ili baba nitusa.

Na ni bo Diane lwaba ni takazo ya kuyo sebeleza kwa sibaka kone kutokwahala hahulu bakutazi ba taba yende ya mwa Bibele. Ka 2010, lwatutela kwa Belize, mwa Central America. Mwa naha ye, lusweli kukutaza kwa batu babalata Mulimu, ili babata kuituta niti ka za hae.

Ka nako ya cwale ninani kozo ya mwa munahano, bakeñisa kuli naziba niti ka za Mulimu ni Linzwi lahae yona Bibele. Bakeñisa kuli nakutazanga ka nako kaufela, ninani tabo kabakala kuluta batu babañata niti ya mwa Bibele. Kwatabisa kubona niti ya mwa Bibele haicinca bupilo bwa batu, sina feela moi nituselize kueza licinceho mwa bupilo. Mi cwale nifumani nzila yende yenikona kuitebuha ka yona ku Mulimu kabakala bupilo boniikola.

“Neba nibonisize sishemo.”—BO MAURÍCIO ARAÚJO

SILIMO SENE BAPEPILWE: 1967

NAHA KONE BAPEPEZWI: BRAZIL

LITABA ZEEZAHEZI: NEBAPILA KA MUZAMAO WA BUHULE

BUPILO BWAKA BWA KWAMULAHO: Nenihulezi mwa Avaré, ili toloponyana ya mwa São Paulo. Buñata bwa batu babapila mwa tolopo yeo ki babeleki.

Bo ndate nebatimezi bo ma inze baitwezi na. Hane nisali mwanana, nenitinanga mwa litino za bo ma ka nako yebazwile fa ndu. Nenikalile kuba ni mikwa ya sisali, mi mane batu mwa silalanda nebaniinga kuli ni wa kalombe.

Hamulaho wa nako nakalisa kusomananga ni mitangana ni baana ka na. Hane nili mwa lilimo za kunonoboka, nakalisa kuyanga mwa mipanda, mwa libaka mobatonelanga batu busihu, mane nihaiba mwa likeleke kuyo bata batu ba kusomana ni bona ili baana ni basali. Ka nako ya mukiti nenitinanga inge musali ni kuya kuyo bina mwa sikwata sa babini babañwi. Nenizibahala hahulu.

Balikani baka babañwi neli ba kalombe, mahule, mi nebaitusisanga hahulu milyani yekola. Babañwi ba babalikani bao banikukueza kuitusisa milyani yekola, mi hamulaho wa nako, nakala kuitusisa hahulu milyani yeo. Fokuñwi neluzubanga busihu kaufela. Ka linako zeñwi, neniikauhanyanga kwa batu babañwi ni kuyo ina ninosi lizazi mutumbi inze nizuba feela. Neniotile hahulu kuli mane batu nebabulenga kuli nikula AIDS.

BIBELE MONE ICINCELIZE BUPILO BWAKA: Mwahalaa nako yeo, nakopana ni Lipaki za Jehova. Neba nibonisize hahulu sishemo. Neba nibalezi liñolo la Maroma 10:13, lelibulela kuli: “Mutu kaufela yabiza fa libizo la Jehova ukapiliswa.” Liñolo le, neli nitusize kuziba libaka hakuli kwa butokwa kuitusisa libizo la Jehova. Nako kaufela hamulaho wa kuzuba busihu kaufela, nenikwalulanga lihaulo ni kutalima kwahalimu ni kulapela ku Jehova kuli anituse kucinca mupilelo waka.

Bakeñisa kuli bo ma nebaikutwanga hahulu bumaswe haba nibona inze niitusisa milyani yekola, naikatulela kutuhela kuitusisa milyani yeo. Nakonyana kuzwa fo, nalumela kuituta Bibele ni Lipaki. Banitaluseza kuli litaba zene nikaituta mwa Bibele nelika nitusa kutuhela kuitusisa milyani yekola, mi ka niti nenituhezi luli!

Hane ninze niituta Bibele, nalemuha kuli nenitokwa kucinca mupilelo waka. Neku nibezi hahulu taata kutuhela mukwa waka wa kalombe, mi nihupula kuli nekuungile nako yetelele luli. Kono nto yene nitusize hahulu ki kutuhela kuswalisana ni balikani baka bakale. Nenituhezi kuswalisana ni bona, mi hape nenituhezi kuyanga kwa manwelo a bucwala ni kwa libaka kone batonelanga batu busihu.

Nihaike kuli nesi nto yebunolo kueza licinceho mwa bupilo, nenitusizwe hahulu ki kuziba kuli Jehova wanitokomela, ni kuli wautwisisa muinelo waka. (1 Joani 3:19, 20) Haluto fitanga mwa silimo sa 2002, nese nituhezi mikwa kaufela ya kalombe, mi ka silimo sesiswana seo, nakolobezwa sina yomuñwi wa Lipaki za Jehova.

MONITUSELIZWE Bo ma nebatabisizwe hahulu ki licinceho zene niezize mwa bupilo, mi ni bona bakalisa kuituta Bibele. Ka bumai, kuzwa feela ona nako yeo, bakala kukula butuku bobubatisanga lineku la mubili. Kusina taba ni muinelo obali ku ona, bazwezipili kulata Jehova ni lituto za mwa Bibele.

Mwahalaa lilimo ze 8 zefelile, nizwezipili kueza musebezi wa kukutaza, mi nitandile nako yeñata inze nitusa batu kuituta Bibele. Kono ka linako zeñwi nisabanga ni litakazo zemaswe. Kono nibonisanga bundume ka kusaeza lika zemaswe zeo bakeñisa kuli haiba nieza lika zeo hanina kutabisa Jehova.

Kusutelela ku Jehova ni kupila ka nzila yemutabisa kunitusize hahulu mwa bupilo. Mi kacenu le ninani tabo luli.

“Neninwa hahulu bucwala.”—BO LUKA ŠUC

SILIMO SENE BAPEPILWE: 1975

NAHA KONE BAPEPEZWI: SLOVENIA

ZENE BAEZIZE KWAMULAHO: KUNWA HAHULU BUCWALA

BUPILO BWAKA BWA KWAMULAHO: Nenipepezwi mwa tolopo ya Ljubljana, ili muleneñi omutuna wa Slovenia. Neniikola bupilo kufitela nikwanisa lilimo zeene. Bo ndate nebaipulaile. Bo ndate hase batimezi, bo ma nebasebezanga ka taata kufumanela na ni muhulwanaa ka za kuca.

Hane ninani lilimo ze 15, natuta kuyo ina ni bo kuku babasali. Neniikozi kupila ni bona, mi mwa sibaka sene bapila ku sona, nekunani balikani baka babañata. Mi hape neninani tukuluho yetuna kufita yene ninani yona hane nipila ni bo ma. Hane nikwanisize lilimo 16, nakala kuswalisana ni batu bane bayanga kwa kunwa bucwala La Mukibelo ni La Sunda. Nakala kuuta milili yemitelele, kuapala ka nzila yesaswaneli, mane ni kuzuba kwai.

Nihaike kuli nenilikile kuitusisa milyani yekola yeshutana-shutana, nenizwezipili kunwa bucwala bakeñisa kuli neli yona nto yene nitabela hahulu. Nakonyana kuzwa fo, nakala kunwanga botela mutumbi mwa sibaka sa kunwa feela tukomoki tusikai. Nekuungile nako kuli batu bazibe kuli ni munwi yomutuna wa bucwala. Batu hañata nebautwanga feela muunko wa bucwala hanibulela. Kono mane hakuna yanaaziba kuli nenili munwi yomutuna yanaakona kufeza mabotela a 8 kamba 10, ili azwakilwe ni mufuta wa sino sesibizwa vodka.

Nako kaufela hane luzwanga kwa linwelo ni balikani baka, ki na yanaa batusanga kukutela kwa ndu nihaike kuli na neninwanga mabotela amañata kubafita. Zazi leliñwi, naautwa yomuñwi wa balikani baka inze abulela kuli nenikozwi hahulu kufita batu kaufela. Nenisika tabiswa ki zanaabulezi.

Nakala kunahana ka za lika zene nieza mwa bupilo. Neniikutwile kuli hani wa butokwa. Nekubonahala kuli hakuna lika zangana zenieza mwa bupilo.

BIBELE MONE ICINCELIZE BUPILO BWAKA: Ka nako ye, nenilemuhile kuli mutu yomuñwi yene nikena ni yena sikolo naacincize mupilelo wahae. Naakalile kuba mutu yomunde. Bakeñisa kuli nenitabisizwe ki licinceho zanaaezize, namumema kuli luye kwa sibaka sesiñwi hamoho. Hane lunze luikambota, anitaluseza kuli naakalile kuituta Bibele ni Lipaki za Jehova. Anitaluseza lika zanaasweli kuituta, mi hakuna zene niziba ka za lika zeo kaufela bakeñisa kuli hakuna bulapeli bone nikile naswalisana ni bona. Nakala kuyanga kwa mikopano ya Lipaki za Jehova mane ni kuituta Bibele ni bona.

Kuituta Bibele neku nitusize kuziba litaba zeñata za niti. Ka mutala, neniitutile kuli lupila mwa nako yeo Bibele ibulela kuli ki “mazazi a mafelelezo.” (2 Timotea 3:1-5) Hape neniitutile kuli ona cwale-cwale fa, Mulimu ukazwisa batu babamaswe ni kufa batu babande kolo ya kupila kuya kuile mwa paradaisi. (Samu 37:29) Naba ni takazo ya kucinca mupilelo waka ilikuli nibe mwahalaa batu babande bao.

Nakala kutaluseza balikani baka za niti ya mwa Bibele yene nisweli kuituta. Buñata bwabona banisheununa, kono mane zene baezize neli nitusize hahulu. Nenilemuhile kuli haki balikani ba niti. Mi mane nenilemuhile kuli balikani baka ni bona nebaekeza kwa butata bwaka bwa kunwa hahulu bucwala. Nako kaufela nebanyolelwanga kuli sunda ifele ilikuli luye kwa kunwa kuli bayo kolwa hape.

Natuhela kuswalisana ni balikani bao, mi nakala kuswalisana hahulu ni Lipaki za Jehova. Nako kaufela hane nibanga ni bona, neniikutwanga kususuezwa hahulu, bakeñisa kuli neli batu bane balata Mulimu mi nebaeza mone bakonela kaufela kupila ka likuka zahae. Hamulaho wa nako, natuhela kunwa hahulu bucwala.

MONITUSELIZWE: Niitumela hahulu ku Jehova kuli hanisa tokwa kunwa bucwala kuli nibe ni tabo. Hanizibi zeneka ezahala ku na kambe nenizwezipili ni mupilelo waka wakale. Kono nitabile kuli ka nako yacwale nipila bupilo bobunde.

Mwahalaa lilimo ze 7 zefelile, nibile ni tohonolo ya kusebeleza kwa ofisi ya mutai wa Lipaki za Jehova mwa Slovenia. Kuziba Jehova ni kumusebeleza kunitusize kuba ni tabo mwa bupilo.