Samuel omutivali 8:1-18
8 Lwanima, David okwa lwifa Ovafilisti+ nokwe va finda,+ na David okwa kufa ko Meteg-amma momake Ovafilisti.
2 Okwa finda Ovamoab+ noku va nangeka momukweyo, ndele te va mete nongodi. Okwe va tukula meengudu nhatu, ta dipaa po mbali domudo, ndele imwe te i efa i kale nomwenyo.+ NOvamoab ova ninga ovapiya vaDavid, nova li ve mu etela eemhale.*+
3 David okwa finda Hadadeser, omonamati waRehob, ohamba yaSoba,+ ofimbo a li mondjila a yuka kOmulonga waEufrat, a ka kwate ko vali oshitukulwa osho.+
4 David okwa kwata ko ovalondinghambe 1 700, novakwaita vokolupadi 20 000. Okwa teta omifipa domaulu eenghambe adishe, odo da li tadi nane omatemba oita, ndele ta xupifa eenghambe 100.+
5 Eshi Ovasiria vokuDamaskus+ ve uya okukwafela ohamba Hadadeser yokuSoba, David okwa dipaa Ovasiria 22 000.+
6 Opo nee David okwa tula omatangakwaita muSiria shomuDamaskus, nOvasiria ova ninga ovapiya vaDavid nove mu etela eemhale. Jehova okwa kwafela David a findane* keshe apa a li a ya.+
7 Natango, David okwa kufa ko oikelelifo yoshingoli kovapiya vaHadadeser, noku i twala kuJerusalem.+
8 Ohamba David oya kufa ongopolo ihapu muBeta nomuBerotai, oilando yaHadadeser.
9 Toi, ohamba yaHamat,+ okwa li a uda kutya David okwa finda etangakwaita alishe laHadadeser.+
10 Onghee Toi okwa tuma omonamati waye, Joram, kohamba David e ke mu pule ngeenge oku li tuu nawa, noku mu pandula, eshi a lwifa nokufinda Hadadeser (osheshi Hadadeser okwa kala ha lwifa Toi lwoikando), nokwe mu tumina oisilveri, oshingoli nongopolo.
11 Ohamba David oya yapulila Jehova oinima oyo, pamwe noshisilveri noshingoli, oyo ya kufa koiwana aishe oyo ya finda:+
12 kuSiria naMoab,+ kOvaammoni, kOvafilisti,+ kOvaamalek+ nomoixuulwa* yaHadadeser,+ omonamati waRehob, ohamba yaSoba.
13 David okwe liningila yo edina, eshi a aluka kolwoodi, eshi a dipaa Ovaedom 18 000 mEfilu lOmongwa.+
14 Okwa tula omatangakwaita muEdom. MuEdom ashishe okwa tula mo omatangakwaita, nOvaedom aveshe ova ninga ovapiya vaDavid.+ Jehova okwa kwafela David a findane* keshe apa a li a ya.+
15 David okwa twikila okupangela Israel ashishe,+ nokwa li ta tokola oshiwana shaye ashishe+ pauyuki.+
16 Joab,+ omonamati waSerua, okwa li ondjai yetangakwaita, na Josafat,+ omonamati waAhilud, okwa li omushangi wondjokonona.
17 Sadok,+ omonamati waAhitub, naAhimelek, omonamati waAbjatar, ova li ovapristeri, ofimbo Seraja a li hamushanga.
18 Benaia,+ omonamati waJehoiada, okwa li omuwiliki wOvakereti nOvapleti.+ Novanamati vaDavid ova ninga omalenga omakulunhu.*
