Samuel omutivali 10:1-19
-
Ovaammoni nOvasiria tava findwa (1-19)
10 Lwanima, ohamba yOvaammoni+ oya fya, nomonamati wayo, Hanun, okwa ninga ohamba ponhele yayo.+
2 Opo nee David okwa tya: “Ohandi ka ulikila Hanun, omonamati waNahas, ohole i na oudiinini, ngaashi xe a ulikila nge ohole i na oudiinini.” Onghee David okwa tuma ovapiya vaye ve ke mu hekeleke omolwefyo laxe. Ashike eshi ovapiya vaDavid ve uya kedu lOvaammoni,
3 omalenga Ovaammoni okwa tya komwene wavo Hanun: “Mbela oto diladila kutya David ota fimaneke xo, eshi e ku tumina ovahekeleki? Hamba ku shi shii kutya David okwe ku tumina ovapiya vaye va konakone oshilando, ve shi ndaade, opo e shi hanaune po?”
4 Onghee Hanun okwa kufa ovapiya vaDavid, ndele te va kulula eendjedi kombinga imwe,+ nokwa teta oikutu yavo okudja komatako okuyuka pedu, ndele te va lekele.
5 Eshi ohamba David ye shi uda, oya tuma ovalumenhu ve ke va shakeneke, molwaashi ova li va fifwa ohoni neenghono, nohamba oye va lombwela ya ti: “Kaleni muJeriko+ fiyo eendjedi deni da mena, ndele tamu aluka.”
6 Mokweendela ko kwefimbo, Ovaammoni ova mona kutya David okwe va tonda. Onghee Ovaammoni ova tuma nova kuta Ovasiria vokuBet-rehob+ nOvasiria vokuSoba,+ ovakwaita vokolupadi 20 000, nosho yo ohamba yaMaaka+ pamwe novalumenhu 1 000; nokuIshtob,* okwa dja ovalumenhu 12 000.+
7 Eshi David e shi uda, okwa tuma Joab netangakwaita alishe, mwa kwatelwa ovakwaita vaye ovaladi ovanaenghono.+
8 NOvaammoni ova ya, nova li va fikama poshivelo shoshilando, ve lilongekidila olwoodi, ofimbo Ovasiria vokuSoba novokuRehob, pamwe naIshtob* nosho yo Maaka, va li ovo aveke poluhaela.
9 Eshi Joab a mona kutya omatangakwaita otae mu dilile komesho nokonima e mu ponokele, okwa hoolola omatangakwaita amwe, oo a denga mbada muIsrael, ndele te lilongekidile olwoodi a ka shakeneke Ovasiria.+
10 Okwa yandja ovalumenhu vakwao mepashukilo* lomumwaina Abisai,+ opo e va longekidile olwoodi va ka lwife Ovaammoni.+
11 Opo nee okwa tya: “Ngeenge Ovasiria ova dulu nge eenghono, ou na okuuya u kwafele nge. Ashike ngeenge Ovaammoni ove ku dulu eenghono, ohandi uya ndi ku kwafele.
12 Otu na okukala twa pama notu na ouladi+ omolwoshiwana shetu nomolwoilando yaKalunga ketu, na Jehova ota ka ninga osho shiwa momesho aye.”+
13 Opo nee Joab novakwaita vaye ova ya va ka shakeneke Ovasiria molwoodi, nOvasiria ove mu faduka po.+
14 Eshi Ovaammoni va mona kutya Ovasiria ova faduka po, navo ova faduka po Abisai, ndele tava i moshilando. Konima yaasho, Joab okwaaluka kolwoodi, olo va li tava lu nOvaammoni, ndele te uya kuJerusalem.
15 Eshi Ovasiria va mona kutya ova findwa kOvaisrael, ova ongala vali pamwe.+
16 Onghee Hadadeser+ okwa tuma a ifanenwe Ovasiria koshitukulwa shOmulonga,*+ ndele tava i kuHelam, pamwe naSobak, ondjai yetangakwaita laHadadeser, te va wilike.
17 Eshi David e shi shiivifilwa, okwa ongela diva Ovaisrael aveshe, ndele tava tauluka omulonga waJordan, nova ya kuHelam. Ovasiria ova li ve lilongekidila olwoodi va ka shakeneke David noku mu lwifa.+
18 Ashike Ovasiria ova faduka po Ovaisrael, na David okwa dipaa ovo va li va londa komatemba 700 novalondinghambe Ovasiria 40 000, nokwa dipaela oko Sobak, ondjai yetangakwaita lavo.+
19 Eshi eehamba adishe, ovapiya vaHadadeser, da mona kutya oda findwa kOvaisrael, oda panga ombili diva nOvaisrael, noda kala koshi yepangelo lavo;+ Ovasiria ova li va tila okukwafela Ovaammoni.
