Samuel omutivali 5:1-25
5 Mokweendela ko kwefimbo, omapata aeshe aIsrael okwa ya kuDavid, kuHebron,+ ndele taa ti: “Tala! Fye otu li ovapambele voye vopopepi elela.*+
2 Monakudiwa, ofimbo Saul a li ohamba yetu, oove wa li omuwiliki waIsrael momalwoodi asho.*+ Jehova okwe ku lombwela a ti: ‘Oto ka lifa oshiwana shange, Israel, noto ka ninga omuwiliki washo.’”+
3 Onghee ovakulunhu aveshe vaIsrael ove uya kohamba kuHebron, nohamba David oya ninga ehangano navo+ muHebron, koshipala shaJehova. Opo nee ova vaeka David a ninge ohamba yaIsrael.+
4 Eshi David a ninga ohamba, okwa li e na eedula 30, nokwa pangela oule womido 40.+
5 MuHebron, okwa pangela Juda oule weedula 7 neemwedi 6, nomuJerusalem+ okwa pangela Israel naJuda ashishe oule weedula 33.
6 Nohamba novakwaita vayo ova ya kuJerusalem va ka lwife Ovajebusi,+ ovo va li hava di medu olo. Ova sheka David tava ti: “Ku na efiku u uye ko oku! Ovapofi noilema navo otave ke ku taataa.” Ova li tava diladila kutya, ‘David ke na efiku a ye mo.’+
7 Ashike David okwa kwata ko ohotengulu yaSion, oyo paife hai ifanwa Oshilando shaDavid.+
8 Mefiku olo, David okwa ti: “Ovo tava ka ponokela Ovajebusi ove na okupitila pomakungulukilo omeva, eshi tava ka dipaa ‘oilema novapofi,’ ovo va li ve tonde David.”* Nomolwaasho kwa tiwa: “Ovapofi noilema, itai ka ya mo monhele oyo.”
9 Opo nee David okwa kala ha di mohotengulu, noya li hai ifanwa* Oshilando shaDavid; na David okwa hovela okutunga e shi dingilila, okudja kOshikulundudu*+ fiyo omeni.+
10 Onghee David okwa enda ta nghonopala unene,+ na Jehova Kalunga komatangakwaita okwa li pamwe naye.+
11 Ohamba Hiram+ yokuTirus oya li ya tumina David ovatumwa nosho yo omiti domisederi dokutungifa,+ ovahongi voipilangi, ovahongi vomamanya, nova li va hovela okutungila David eumbo.*+
12 Na David okwa li e shi shii kutya Jehova oye e mu nangeka po e li ohamba yaIsrael,+ nokwa tumbalekifa ouhamba waye+ omolwoshiwana shaYe, Israel.+
13 David okwe likongela ovakainhu vahapu vopomunghulo+ nosho yo ovakulukadi muJerusalem, konima eshi a dja kuHebron, nokwa dala navo ovanamati novanakadona vahapu.+
14 Omadina aavo a dalelwa muJerusalem oyaa: Shammua, Sobab, Natan,+ Salomo,+
15 Ibhar, Elishua, Nefek, Jafia,
16 Elisama, Eliada naElifelet.
17 Eshi Ovafilisti va uda kutya David okwa vaekwa e li ohamba yaIsrael,+ Ovafilisti aveshe ova li ve uya okukonga David.+ Eshi David e shi uda, okwa ya kohotengulu.+
18 Opo nee Ovafilisti ove uya mo, ndele tave lihanene mEfilu laRefaim.+
19 David okwa pula Jehova+ a ti: “Nandi ka lwife tuu Ovafilisti? Mbela oto ke va yandja ngoo momake ange?” Opo nee Jehova okwa nyamukula David a ti: “Inda, ohandi ka yandja Ovafilisti filufilu momake oye.”+
20 Onghee David okwa ya kuBaal-perasim nokwe va dipaela oko. Opo nee David okwa tya: “Jehova okwa finda ovatondi vange+ moipafi yange, ngaashi ekuma la teka po komeva.” Nomolwaasho David a luka onhele oyo Baal-perasim.+
21 Ovafilisti ova fiya po oikalunga yavo, na David novakwaita vaye ove i kufa po.
22 Lwanima, Ovafilisti ova aluka vali nove lihanena mEfilu laRefaim.+
23 David okwa pula Jehova, ashike okwa ti: “Ino ya we va taalela. Ponhele yaasho, va dilila konima, ndele to va lwifa to dilile komesho yoixwa yobaka.
24 Ngeenge owa udile omaweelelo koxulo yoixwa yobaka, katuka diva, osheshi Jehova ote ku pitile komesho, u dipae etangakwaita lOvafilisti.”
25 Onghee David okwa ninga naanaa ngaashi Jehova e mu lombwela, nokwa dipaa Ovafilisti+ okudja muGeba+ fiyo okuGeser.+
