Samuel omutivali 7:1-29
7 Eshi ohamba ya mona omhito yokukala meumbo* layo,+ Jehova okwe i amena kovatondi vayo aveshe,
2 noya tya komuprofeti Natan:+ “Ame ohandi di meumbo la dikwa nomiti domisederi,+ ofimbo Oshikefa shaKalunga kashili shi li metwali.”+
3 Natan okwa nyamukula ohamba ta ti: “Inda, ndele to ningi keshe osho omutima woye wa hala, molwaashi Jehova oku li pamwe naave.”+
4 Oufiku oo tuu oo, ondjovo yaJehova oye uya kuNatan, tai ti:
5 “Inda, ndele to lombwele omupiya wange, David, to ti, ‘Jehova ota ti ngaha: “Mbela oto tungile nge eumbo ndi kale mo?+
6 Osheshi okudja efiku olo nda mangulula Ovaisrael muEgipiti fiyo okunena, inandi kala meumbo,+ ashike onda kala handi endaenda momatwali nosho yo momatwalihangano.+
7 Efimbo alishe olo nda enda pamwe nOvaisrael aveshe,* mbela onda pulile ngoo nande onale ovawiliki vomapata aIsrael, ovo nda hoolola, va wilike Ovaisrael vange, nda ti: ‘Omolwashike inamu tungila nge eumbo la tungwa nomiti domisederi?’”’
8 Lombwela omupiya wange, David, to ti, ‘Jehova womatangakwaita ota ti, “Onde ku kufa koufita, oko wa li to lifa oimuna,+ ndele handi ku ningi omuwiliki woshiwana shange, Israel.+
9 Ohandi ka kala pamwe naave keshe apa to i,+ nohandi ka dima* po ovatondi voye aveshe moipafi yoye;+ nohandi ke ku ningila edina linene,+ ngaashi omadina ovanhu va fimana kombada yedu.
10 Ohandi ka hoololela oshiwana shange, Israel, onhele, ndele handi shi tula mo notashi ka kala mo, noitapa ka kala vali oo te shi piyaaneke; novakolokoshi itave ke shi fininika vali ngaashi va ningile nale,+
11 okudja efiku olo nda hoolola ovatokolipangeli+ voshiwana shange, Israel. Notashi ka fuda po kovatondi vasho aveshe.+
“‘“Natango, Jehova okwe ku lombwela kutya, Jehova ote ke ku tungila eumbo.*+
12 Ngeenge owa fi,+ ndele to nangekwa pooxokulululwa, ohandi ka nangeka po oludalo loye, olo tali ku shikula, omonamati woye,* nohandi ka pameka ouhamba waye.+
13 Oye ta ka tunga eumbo lokufimanekifila edina lange,+ nohandi ka pameka olukalwapangelo louhamba waye fiyo alushe.+
14 Ohandi ka ninga xe, nota ka ninga omonamati wange.+ Ngeenge a ningi epuko, ohandi ke mu pukulula nodibo nosho yo nongola oyo hai longifwa kovana vovanhu.*+
15 Ohandi ke mu ulikila alushe ohole i na oudiinini, itandi ke mu efa, ngaashi nda ningila Saul.+
16 Eumbo loye nouhamba woye otai ka amenwa fiyo alushe; olukalwapangelo loye otali ka pamekwa fiyo alushe.”’”+
17 Natan okwa lombwela David eendjovo adishe odo nemoniko alishe olo.+
18 Opo nee ohamba David oye uya, noya kala omutumba koshipala shaJehova, ndele tai ti: “Akutu! Omwene Jehova Omunamapangelo aeshe, aame lyelye? Neumbo lange olo eshike, eshi wa ningila nge oinima aishe oyo?+
19 Natango, akutu, Omwene Jehova Omunamapangelo aeshe, owa popya yo kombinga yeumbo lomupiya woye fiyo okefimbo lokomesho, nowa yandja elombwelo* kovanhu aveshe, akutu, Omwene Jehova Omunamapangelo aeshe.
20 Akutu! Omwene Jehova Omunamapangelo aeshe, omupiya woye, David, na tye vali shike, ngeenge ou mu shii nawanawa?+
21 Omolweendjovo doye nometwokumwe nomutima woye,* owa ninga oinima aishe ei inene nowe i hololela omupiya woye.+
22 Akutu! Omwene Jehova Omunamapangelo aeshe, osho osho she ku ningifa u kale wa tumbala shili.+ Kape na umwe e ku fa,+ nokape na Kalunga umwe;+ oinima aishe twa uda nomatwi etu oye shi koleka.
23 Oshiwana shilipi kombada yedu sha fa oshiwana shoye, Israel?+ Kalunga okwa xupifa Ovaisrael ve li oshiwana shaye,+ nokwe liningila edina+ moku va longela oilonga inene noku va ningila oinima ikumwifi.+ Owa ta mo oiwana noikalunga yayo moipafi yoshiwana shoye osho we lixupifila muEgipiti.
24 Owa hoolola oshiwana shaIsrael shi ninge oshiwana shoye fiyo alushe;+ naave, Jehova, owa ninga Kalunga kasho.+
25 “Paife, alikana, Jehova Kalunga, wanifa po eudaneko olo wa udaneka li na sha nomupiya woye nosho yo neumbo laye fiyo alushe, nou ninge naanaa ngaashi wa udaneka.+
26 Edina loye nali tumbalekwe fiyo alushe,+ opo ovanhu va tye, ‘Jehova womatangakwaita oye Kalunga kaIsrael,’ neumbo lomupiya woye, David, nali pamenene moipafi yoye.+
27 Molwaashi ove, Jehova womatangakwaita, Kalunga kaIsrael, owe shi hololela omupiya woye, eshi wa ti, ‘Ohandi ke ku tungila eumbo.’*+ Nomolwaasho omupiya woye e na ouladi wokwiilikana eilikano olo kwoove.
28 Ndele paife, alikana, Omwene Jehova Omunamapangelo aeshe, oove Kalunga kashili, eendjovo doye odo oshili,+ nowa udanekela omupiya woye oinima oyo iwa.
29 Onghee twikila okunangeka noupuna eumbo lomupiya woye fiyo alushe koshipala shoye,+ molwaashi ove, akutu, Omwene Omunamapangelo aeshe, Jehova, osho wa udaneka, neumbo lomupiya woye nali nangekwe noupuna fiyo alushe.”+
