Inda koshikalimo

Omolwashike Jesus a fya?

Omolwashike Jesus a fya?

Enyamukulo lopaMbiibeli

Jesus okwa fya opo ovanhu va dule okudiminwa po omatimba avo nova mone omwenyo waalushe. (Ovaroma 6:23; Ovaefeso 1:7) Efyo laJesus ola ulika kutya ovanhu otava dulu okukala ovadiinini kuKalunga kashi na nee mbudi kutya ova taalela omayeleko e fike peni. — Ovaheberi 4:15.

Konakona nghee efyo laumwe la e ta omauwa mahapu.

  1. Jesus okwa fya opo tu ‘kufilwe po omatimba e tu’. — Ovakolossi 1:14.

    Omulumenhu wotete Adam, okwa li a shitwa a wanenena ehe na oulunde. Ashike nande ongaho, okwa li a hoolola okuhadulika kuKalunga. Ovana vaAdam navo ova ka hangwa koilanduliko yaye omolwokuhadulika kwaye. Ombiibeli oya ti: “Kokuhadulika kwomunhu ou umwe ava vahapu va ninga ovalunde.” — Ovaroma 5:19.

    Jesus okwa li a wanenena ashike ina nyona sha nande. Onghee hano, Jesus oye “ekulilo lomatimba etu.” (1 Johannes 2:2) Ngaashi ashike ovanhu aveshe va ninga ovalunde omolwokuhadulika kwaAdam, efyo laJesus ola kufa po yo oulunde wovanhu aveshe ovo ve mu itavela.

    Ohatu dulu okutya Adam okwa landifa po ovanhu moulunde. Opo nee Jesus okwa li a tokola okufya ponhele yavo opo e va xupife. Ombiibeli otai tu lombwele shi na sha nouwa oo wa etifwa po kuJesus ya ti: “Ngeenge pe na ou ta nyono, otu nomupopili puTate, Jesus Kristus omuyuki.” — 1 Johannes 2:1.

  2. Jesus okwa fya opo “keshe ou te mu itavele aha kane, ndelenee a kale e nomwenyo waalushe.” — Johannes 3:16.

    Nonande Adam okwa li a shitwa a kale nomwenyo fiyo alushe, okwa ka fya omolwokunyona kwaye. Ombiibeli otai ti: “Oulunde wa etwa mounyuni komunhu umwe [Adam], nefyo okoulunde, osho nee efyo ole uya movanhu aveshe, shaashi aveshe va nyona.” — Ovaroma 5:12.

    Mepingafano naasho, efyo laJesus ole shi ningifa tashi shiiva opo ovo ve mu itavela va dule okuxupifwa moulunde nosho yo mefyo. Ombiibeli oya popya oshinima osho ngaha: “Ngaashi oulunde wa pangela mefyo, osho yo efilonghenda tali pangele omolwouyuki li ete omwenyo waalushe molwaJesus Kristus, Omwene wetu.” — Ovaroma 5:21.

    Oshoshili kutya fiyo okunena ovanhu ihava kala nomwenyo fiyo alushe. Onghee hano, Kalunga okwa udaneka kutya ota ka pa ovanhu omwenyo waalushe nokunyumuna ovafi opo va mone ouwa mekuliloyambo laJesus. — Epsalme 37:29; 1 Ovakorinto 15:22

  3. Jesus okwa “dulika fiyo omefyo,” naasho osha ulika kutya ovanhu otava dulu okukala ovadiinini kuKalunga ngeenge va taalela omayeleko. — Ovafilippi 2:8.

    Nonande Adam okwa li a wanenena, ka li a dulika kuKalunga omolwomatomheno okulihola mwene. (Genesis 2:​16, 17; 3:6) Lwanima, omutondi waKalunga, Satana, okwa popya kutya omunhu ita dulu okukala omudiinini kuKalunga unene tuu ngeenge otashi pula omwenyo waye. (Job 2:4) Ndele Jesus, oo a li a wanenena, okwa li a dulika kuKalunga nokukala omudiinini nonande okwa pita meenghalo didjuu nokufya efyo li nyanyalifa. (Ovaheberi 7:26) Oshimoniwa shaJesus osha ulika kutya omunhu ota dulu okukala omudiinini kuKalunga nonande okwa taalela omayeleko ile omashongo a kwata moiti.

Omapulo kombinga yefyo laJesus

  • Omolwashike Jesus kwa li e na okuhepekwa nokudipawa opo a mangulule ovanhu? Omolwashike Kalunga e mu e fa a fye?

    Omhango yaKalunga oya popya ya ti: “Ondjabi youlunde oyo efyo.” (Ovaroma 6:23) Kalunga okwa li a lombwela Adam kutya ngeenge ina dulika ota ka fya ponhele yoku mu holeka oshipango shaye. (Genesis 3:3) Eshi Adam a nyona, eendjovo daKalunga oda li da wanifwa molwaashi “iha fufya.” (Titus 1:2) Oludalo laAdam inali fyuulula ashike oulunde ndele ola fyuulula yo efyo.

    Ovanhu ova li ve na okufya fiyo alushe molwaashi ova nyona, ashike Kalunga okwe va ulikila ‘oupuna wonghenda yaye.’ (Ovaefeso 1:7) Okwa li a ulika onghenda inenenene eshi a tuma omona waye a wanenena, Jesus, a ninge ekuliloyambo opo a mangulule ovanhu.

  • Jesus okwa fya naini?

    Jesus okwa fya ‘potundi onhimugoi,’ pavalulo leeveli pefimbo lOmbiibeli, ile tu tye ponhatu yokomatango mefiku lOpaasa yOvajuda. (Markus 15:33-37) Efiku olo ola li Etitano, 1 Aprili 33 O.P. pakalindeli kopaife.

  • Jesus okwa fila peni?

    Jesus okwa li a dipaelwa “konhele ya lukwa onhele yoshipongolo shomutwe, mOshiheberi otai ifanwa Golgata.” (Johannes 19:17, 18) Pefimbo laJesus, onhele oyo oya li “kondje yoshivelo” shoshilando shaJerusalem. (Ovaheberi 13:12) Onhele oyo otashi dulika ya li omhunda molwaashi Ombiibeli ya popya kutya ovanhu vamwe ova li ve wete Jesus eshi ta dipawa nonande ova li “kokule.” (Markus 15:40) Ashike kunena onhele oyo, Golgata, kai shiivike vali apa i.

  • Jesus okwa fya ngahelipi?

    Nonande vahapu ova itavela kutya Jesus okwa fila komushiyakano, Ombiibeli oya ti: “Oye ou a humbata Ye mwene omatimba etu molutu laye noku a londeka komuti.” (1 Petrus 2:24, King James Version) Ovashingi vOmbiibeli ova longifa oitya ivali yOshigreeka stau·rosʹ nosho yo xyʹlon tai ulike oko kwa fila Jesus. Ovahongwanhu vahapu ova fika pexulifodiladilo kutya omautumbulilo oo otaa ulike komuti wa ukilila pyo.

  • Efyo laJesus oli na okudimbulukiwa ngahelipi?

    Onguloshi yOpaasa yOvajuda, Jesus okwa li a dika po nokuulikila ovalongwa vaye nghee efyo laye li na okudanwa noku va lombwela a ti: “Shi ningeni nokudimbulukwa nge.” (1 Ovakorinto 11:24) Komina yeevili donhumba, Jesus okwa li a dipawa.

    Ovashangi vOmbiibeli ova yelekanifa Jesus nodi oyo hai yambwa pOpaasa. (1 Ovakorinto 5:7) Ngaashi ashike Opaasa ya li hai dimbulukifa Ovaisrael nghee va mangululwa moupika, Edimbuluko lefyo laJesus Kristus ohali dimbulukifa Ovakriste nghee va mangululwa moulunde nefyo. Opaasa, oyo ya li hai danwa lumwe komudo, oya li hai danwa 14 aNisan pakalindeli kOmbiibeli; Ovakriste votete navo ova li hava dana Edimbuluko lefyo laJesus lumwe aluke omudo keshe.

    Omudo keshe, ovanhu omamiliyona ova dimbuluka efyo laJesus mefiku olo tali tu kumwe no 14 aNisan.