Inda koshikalimo

Ongahelipi eyambo laJesus li li “ekulilo lavahapu”?

Ongahelipi eyambo laJesus li li “ekulilo lavahapu”?

Enyamukulo lopaMbiibeli

Ekulilo laJesus oli li oupitilo oo Kalunga ta longifa, opo a mangulule, ile a xupife ovanhu moulunde nefyo. Ombiibeli oya popya kutya ohonde yaJesus ya tika oi li ofuto yekulilo. (Ovaefeso 1:7; 1 Petrus 1:18, 19) Nomolwaasho Jesus a ti kutya okwa li e uya ‘okuyandja omwenyo waye u ninge ekulilo lavahapu.’ — Mateus 20:28.

Omolwashike “ekulilo lavahapu” la li la pumbiwa?

Omunhu wotete, Adam, okwa li a shitwa a wanenena, ile ehe na oulunde. Okwa li e na oufembanghenda wokukala nomwenyo fiyo alushe, ndele okwe u kanifa eshi a hoolola okuhadulika kuKalunga. (Genesis 3:17-19) Eshi a dala ounona, okwe va tambekida oulunde. (Ovaroma 5:12) Omolwetomheno olo, Ombiibeli otai ulike kutya Adam okwe ‘lilandifa po’ ye mwene nosho yo oludalo laye moupika woulunde nefyo. (Ovaroma 7:14, KB-13) Molwaashi oludalo laye inali wanenena, kape na umwe womulo ta dulu okukulila ko osho sha kanifwa kuAdam. — Epsalme 49:7, 8.

Kalunga okwa li a kenukila oludalo laAdam, molwaashi kala li li na eteelelo lasha. (Johannes 3:16) Ashike omolwouyuki waKalunga, ka li ashike te ke va dimina po omatimba avo nopehe na etomheno la femba. (Epsalme 89:14; Ovaroma 3:23-26) Ndele molwaashi Kalunga oku hole ovanhu, okwa tula po elongekido lopaveta opo vaha diminwe ashike omatimba avo, ndele oulunde u hanaunwe po filufilu. (Ovaroma 5:6-8) Elongekido olo lopaveta olo ekuliloyambo.

Ekulilo ohali longo ngahelipi?

MOmbiibeli, outumbulilo “ekulilo” owa kwatela mo oinima itatu tai landula:

  1. Olo ofuto. Numeri 3:46, 47.

  2. Ohali etele omunhu emanguluko. Exodus 21:30.

  3. Ohali kala li na ongushu i fike poshinima osho tashi futilwa po, ile tashi kalekwa po. *

Natu ka tale nghee oitwa oyo tai longo shi na sha nekuliloyambo laJesus Kristus.

  1. Ofuto. Ombiibeli oya ti kutya Ovakriste ova “landwa ondilo.” (1 Ovakorinto 6:20; 7:23) Ofuto oyo oyo ohonde yaJesus, oyo a ‘landela Kalunga nohonde yaye ovanhu va dja momapata, momalaka, movanhu nomoiwana aishe.’ — Ehololo 5:8, 9.

  2. Emanguluko. Eyambo laJesus ola “mangulula” ovanhu moulunde. — 1 Ovakorinto 1:30; Ovakolossi 1:14; Ovaheberi 9:15.

  3. Oli na ongushu i fike poshinima osho tashi futilwa po. Ekulilo laJesus oli fike naanaa pwaasho sha kanifwa kuAdam, omwenyo wopanhu wa wanenena. (1 Ovakorinto 15:21, 22, 45, 46) Ombiibeli oya ti: “Omolwokuhadulika kwomunhu umwe [Adam], vahapu ova ninga ovalunde, nomolwokudulika kwomunhu umwe [Jesus Kristus], vahapu otava ka ninga ovayuki.” (Ovaroma 5:19) Osho osha yelifa nghee efyo lomunhu umwe tali dulu okukulila ovalunde vahapu. Oushili oyoo kutya, ekuliloyambo laJesus ola “yeleka okukulila aveshe,” ovo tava katuka eenghatu da pumbiwa opo va mone ouwa mulo. — 1 Timoteus 2:5, 6.

^ okat. 7 MOmbiibeli, oitya yomelaka lopehovelo oyo ya tolokwa “ekulilo” otai yandje ediladilo londado, ile longushu yoshinima osho tashi futwa. Pashihopaenenwa, oshityalonga shOshiheberi ka·pharʹ otashi ti “okutuvika.” Luhapu ohashi ulike kokudima po omatimba. (Epsalme 65:3) Oshityadina she shi pamba koʹpher ohashi ulike kondado ya futwa opo ku tuvikwe, ile ku kulilwe oshinima. (Exodus 21:30) Sha faafana, oshitya shOshigreka lyʹtron, osho luhapu hashi tolokwa “ekulilo,” otashi dulu yo okutolokwa “ofuto yokukulila.” (Mateus 20:28) Ovashangi Ovagreka ova longifa outumbulilo oo okuulika kofuto oyo hai yandjwa okukulila eenghwate domoita, ile okumangulula ovapika.