Onhumwafo kOvaroma 5:1-21
5 Ndele molwaashi paife otwa talwa ko ovayuki omolweitavelo,+ natu hafele ombili* naKalunga okupitila mOmwene wetu, Jesus Kristus.+
2 Molwaashi otu na eitavelo muKristus, oshe shi ningifa tashi shiiva, opo tu mone efilonghenda laKalunga olo hatu hafele paife.+ Otwa hafa, molwaashi otu na eteelelo kutya Kalunga ote ke tu pa ondodo ya tumbala.
3 Natu kaleni twa hafa, nonande otu li momaudjuu,+ molwaashi otu shi shii kutya omaudjuu otae tu kwafele tu lididimike.+
4 Elididimiko otali tu kwafele tu kale twa hokiwa kuKalunga,+ naasho otashi tu pe eteelelo,+
5 neteelelo itali ke tu nyemateka,+ molwaashi omitima detu oda yadifwa ohole yaKalunga okupitila momhepo iyapuki oyo twa pewa.+
6 Kristus okwa fila ovalunde peufwafimbo laKalunga, naasho okwe shi ninga fimbo twa li oingone.+
7 Oshidjuu kuumwe a file omuyuki, ndele otashi dulika umwe a kale a hala okufila omunhu oo ha longo ouwa.
8 Ndele Kalunga okwa ulika kutya oku tu hole fimbo twa li natango ovalunde, eshi a yandja Kristus e tu file.+
9 Itatu ka hangwa kehandu laKalunga,+ molwaashi otwa talwa ko ovayuki omolwohonde yaKristus.+
10 Ngeenge otwa hanganifwa naKalunga okupitila mefyo lOmona waye fimbo twa li ovatondi vaye,+ osha yela kutya ohatu ka xupifwa, molwaashi Kristus oku na omwenyo.
11 Kakele kaasho, otwa hafa, eshi tu na ekwatafano liwa naKalunga notwa hanganifwa naye okupitila mOmwene wetu, Jesus Kristus.+
12 Ngaashi oulunde we uya mounyuni okupitila momunhu umwe, nefyo ole uya omolwoulunde.+ Onghee hano efyo nalo ola tandavela movanhu aveshe, molwaashi aveshe ovalunde.+
13 Oulunde owa kala mounyuni fimbo paha li Omhango, ndele kape na ou ta dulu okutiwa kutya okwa nyona omolwoulunde, ngeenge kape na omhango.+
14 Efyo ola kala tali pangele ngaashi ohamba okudja kuAdam fiyo okuMoses, naavo inava nyona monghedi ya faafana naai yaAdam ohava fi. Adam okwa faafana naao a li a udanekwa kutya ote ke uya.+
15 Oshali yaKalunga inai fa enyono. Osheshi omolwenyono lomunhu umwe ovanhu vahapu ohava fi, vahapu ova mona efilonghenda linenenene nosho yo oshali yefilonghenda okupitila momunhu umwe,+ Jesus Kristus, ola hapupalela ovanhu* vahapu.+
16 Oidjemo yoshali oya yooloka ko kwaayo ya etifwa kwaao a nyona.+ Osheshi enyono laye limwe ola etela ovanhu aveshe etimba,+ ndele oshali oyo ya yandjwa omolwomanyono avahapu oya ningifa ovanhu vahapu va talwe ko ovayuki.+
17 Efyo otali pangele ngaashi ohamba omolwenyono lomunhu oo umwe.+ Ndele ohatu dulu okukala noushili kutya oshali youyuki nefilonghenda laKalunga olinenenene,+ naavo tave li mono otava ka kala nomwenyo notava ka pangela ngaashi eehamba+ okupitila muJesus Kristus.+
18 Ngaashi ashike ovanhu aveshe tava tokolwa omolwenyono lomunhu umwe,+ ovanhu aveshe otava talwa ko ovayuki notava ka mona omwenyo omolwoshilonga shouyuki shaumwe.+
19 Omolwokuhadulika kwomunhu umwe, vahapu ova ninga ovalunde,+ nomolwokudulika kwomunhu umwe, vahapu otava ka ninga ovayuki.+
20 Kalunga okwa yandja Omhango, opo ovanhu va mone kutya ova nyona sha kwata moiti.+ Ndele ngeenge omanyono okwa hapupala, nefilonghenda ohali ningi linene.
21 Onelalakano lashike? Ngaashi ashike oulunde nefyo tai pangele ngaashi ohamba,+ efilonghenda laKalunga nalo otali pangele ngaashi ohamba omolwouyuki notali etele ovanhu omwenyo waalushe okupitila muJesus Kristus, Omwene wetu.+
