Onhumwafo kOvaroma 13:1-14
13 Omunhu* keshe na dulike kovapangeli,+ molwaashi Kalunga oye e va efa va kale po+ nova kale ve na eendodo di lili noku lili.+
2 Onghee hano ovo ve li omhinge novapangeli itava dulika kelongekido laKalunga, naavo itava dulika otava ka tokolwa.
3 Ovapangeli ovo ove lile po okutilifa ovo tava longo owii, ndele havoovo tava longo ouwa.+ Ngeenge ino hala okukala wa tila ovapangeli, kala to longo ouwa,+ notave ke ku pandula,
4 molwaashi ove li ovayakuli vaKalunga omolwouwa woye. Ndele ngeenge oho longo owii, kala wa tila, molwaashi eongamukonda inave li djalela epwanga. Ove li ovayakuli vaKalunga, opo va handukile ovo tava longo owii.
5 Inamu dulika ashike, molwaashi mwa tila okuhandukilwa, ndele dulikeni yo omolweliudo leni.+
6 Onghee hano ohamu futu yo oifendela, molwaashi ovapangeli ovo ove li ovayakuli vaKalunga ovo tava yakula ovanhu aveshe.
7 Yandjeni kwaaveshe osho mu na okuyandja: ovo ve na okupewa oifendela, va peni oifendela;+ ovo ve na okupewa eemhale,* va peni eemhale; ovo va wana okutilika va tileni;+ ovo va wana okufimanekwa, va fimanekeni.+
8 Inamu kala noshikolo shomunhu, kakele koshikolo shokuholafana,+ molwaashi oo e hole ovanhu vakwao ota dulika komhango.+
9 Omhango oya ti: “Ino nyona ohombo,+ ino dipaa,+ ino vaka,+ ino kala u na okahalu,”+ noipango aishe oya kwatelwa moshipango eshi tashi ti: “Kala u hole mukweni ngaashi u lihole mwene.”+
10 Omunhu oo e na ohole iha ningile vakwao owii,+ nokungaho, ota dulika komhango.+
11 Oinima oyo nde mu lombwela omu na yo oku i ninga, molwaashi eli olo efimbo lokukala oupafi,+ nexupifo letu oli li popepi shi dulife okudja eshi twa ninga ovaitaveli.
12 Otaku shi mafiku, nefiku oli li popepi. Onghee hano natu efe po oilonga yomilaulu+ nokulonga alushe oilonga youyelele.+
13 Natu lihumbateni nawa+ efimbo keshe; inatu kufa ombinga moivilo ihe na elandulafano,* inatu kolwa, natu henuke oluhaelo, okunyona tuhe na ouxwenge,*+ eenhamanana nosho yo ondubo.+
14 Ndele djaleni Omwene Jesus Kristus,+ noinamu kala tamu ningi eemhangela domahalo opambelela.+
Omashangelo opedu
^ Ile “Omwenyo.”
^ Ile “eefuto odo hadi pewa eehamba.”
^ Ile “meenhingo.”
^ Ile “okunyona nopehe na okufya ohoni.” Oshitya shOshigreka aselgeia shi li pauhapu. Tala Omafatululo oitya.
