Onhumwafo kOvaroma 3:1-31
3 Oshike sha ningifa Ovajuda va kale ve dule vamwe, ile epitotanda oli na ouwa washike?
2 Ope na omauwa mahapu. Shotete, ove lineekelelwa etumwalaka laKalunga.+
3 Ongahelipi ngeenge Ovajuda vamwe kave na eitavelo? Mbela osha hala okutya ovanhu itava dulu okulineekela Kalunga?
4 Hasho nandenande! Nonande ovanhu aveshe ova kale ovanaipupulu,+ Kalunga omunashili+ ngaashi pa shangwa taku ti: “Oto ka ulika ouyuki woye okupitila meendjovo doye, nongeenge tave ku hokololifa, oto ke va tomha kutya ova puka.”+
5 Ngeenge hatu longo owii, ovanhu ohava mono kutya Kalunga omuyuki. Ndele mbela ngeenge Kalunga te tu handukile osha hala kutya ke fi omuyuki? (Ovanhu vamwe osho hava diladila ngaho.)
6 Hasho nandenande! Kalunga omuyuki, ngeno ka li omuyuki, ongahelipi ta dulu okutokola ounyuni?+
7 Ndele ngeenge oipupulu, oyo handi popi, otai ulike kutya osho Kalunga a popya oshoshili, notashi mu fimanekifa kovanhu, omolwashike ndi na okutalika ko omulunde?
8 Ovanhu vamwe ohave tu lundile kutya ohatu ti, “Natu longeni owii, opo tu mone ouwa.” Etokolo li na sha novanhu ovo oli li pauyuki.+
9 Mbela osho osha hala okutya otu dule vamwe? Hasho nandenande! Ngaashi twe shi popya nale, Ovajuda nOvagreka aveshe ovalunde,+
10 ngaashi pa shangwa taku ti: “Kape na omunhu omuyuki, kape na nande oumwe;+
11 kape na ou e na eendunge nandenande; kape na ou ha kongo Kalunga.
12 Ovanhu aveshe ova pilamena Kalunga, ndele aveshe tava ningi ovanhu vongaho. Kape na nande oumwe e na onghenda.”+
13 “Ominino davo odo ombila ya yeuluka; ova pukifa nomalaka avo.”+ “Oudiyo weenhoka ou li koshi yomilungu davo.”+
14 “Nomakanya avo oku yadi efingaelo nowii.”+
15 “Eemhadi davo ohadi endelele okutilashi ohonde.”+
16 “Ehanauno noixuna oi li meendjila davo,
17 noinava shiiva ondjila yombili.”+
18 “Momesho avo kamu na etilokalunga.”+
19 Ndele otu shi shii kutya oinima aishe oyo ya popiwa mOmhango, otai popi ovo hava diinine Omhango, opo paha kale umwe womuvo te ke lipopila, nounyuni aushe, opo u kale wa wana okuhandukilwa kuKalunga.+
20 Onghee kape na nande oumwe* ta ka talika ko omuyuki koshipala shaye omolwoilonga yomhango,+ osheshi otwa shiiva filufilu oulunde okupitila momhango.+
21 Ndele paife osha yela kutya ovanhu otava dulu okukala ovayuki koshipala shaKalunga, nonande itava diinine Omhango,+ naasho osha popiwa mOmhango nokOvaprofeti.+
22 Aveshe ovo ve na eitavelo otava dulu okukala ovayuki koshipala shaKalunga omolweitavelo muJesus Kristus. Osheshi Kalunga ke na okatongo.+
23 Ovanhu aveshe ova nyona nokave na oshinge shaKalunga,+
24 notava yukipalifwa omolwefilonghenda+ laye lekuliloyambo, olo li li oshali+ ya yandjwa okupitila muKristus Jesus.+
25 Kalunga okwe mu yandja e li eyambo lehanganifo*+ okupitila meitavelo mohonde yaye.+ Osho okwe shi ninga, opo a ulike ouyuki waye, molwaashi okwa ulika onheni* nokwa dimina po ovanhu omanyono avo omonakudiwa.
26 Osho okwe shi ninga, a ulike ouyuki waye+ mefimbo lopaife, opo a dule okukala omuyuki, eshi nokuli a tala ko ovanhu ovo va itavela muJesus ve li ovayuki.+
27 Mbela omunhu ota dulu okulitanga? Hasho nandenande. Omhango ilipi tai mu kelele ehe litange? Mbela oyoyo tai ti kutya osho a longa osha fimana?+ Hasho, ndele oyoyo tai ti kutya oku na okukala e na eitavelo.
28 Omunhu okwa talika ko omuyuki omolweitavelo, nonande kape na oilonga yomhango.+
29 Ile Kalunga oKalunga ashike kOvajuda?+ Hano ke fi yo Kalunga kovanhu vomoiwana?+ Heeno, oku li yo Kalunga kovanhu vomoiwana.+
30 Ndele molwaashi Kalunga umwe,+ okwa tala ko ovo va pita etanda nosho yo ovo inava pita etanda ve li ovayuki+ omolweitavelo lavo.
31 Mbela otu na okuxulifa po omhango omolweitavelo letu? Hasho nandenande! Mepingafano naasho, otu na okudulika kuyo.+
