Inda koshikalimo

Eendombwedi daJehova

Hoolola elaka Oshikwanyama

“Eeshapi douhamba” oshike?

“Eeshapi douhamba” oshike?

Enyamukulo lopaMbiibeli

“Eeshapi douhamba” otadi ulike koufemba wokuyeulula ovanhu ondjila opo va dule okuya “mouhamba waKalunga.” (Mateus16:19; Oilonga 14:22) * Jesus okwa pa Petrus “eeshapi douhamba wokeulu.” Osho osha hala kutya Petrus okwa pewa oufemba wokupatulula ouyelele u na sha nanghee ovapiya vaKalunga vadiinini tava ka vaekwa nomhepo iyapuki nanghee tava ka mona oufembanghenda wokuya mOuhamba womeulu.

Oolyelye va li tava ka patululilwa ondjila neeshapi odo?

Petrus okwa pewa oufembanghenda kuKalunga wokupatululila eengudu nhatu ondjila yokuya mOuhamba:

  1. Ovajuda. Diva konima yefyo laJesus, Petrus okwa li a ladipika Ovajuda ovo va ninga ovaitaveli va tambule ko Jesus oo a hoololwa kuKalunga a ninge ohamba yOuhamba waye. Petrus okwa li e va ulikile osho ve na okuninga opo va xupifwe. Kungaho okwa li e va yeululila ondjila yokuya mOuhamba, nOvajuda omayovi ova li “va tambula nehafo eendjovo daye.” — Oilonga 2:38-41.

  2. Ovasamaria. Lwanima Petrus okwa ka tumwa kOvasamaria. * Pomhito opo Petrus okwa li a longifa eeshapi dOuhamba eshi vo naJohannes ‘va ilikanena Ovasamaria va pewe Omhepo Iyapuki.’ (Oilonga 8:14-17) Osho osha li sha yeululila Ovasamaria ondjila va dule okuya mOuhamba.

  3. Ovapaani. Eshi pa pita omido nhatu netata okudja pefyo laJesus, Kalunga okwa li a lombwela Petrus kutya ovapaani (ovo vehe fi Ovajuda) navo otava ka mona omhito yokuya mOuhamba. Petrus okwa li a longifa oshapi imwe eshi a udifila ovapaani, naasho osha yeululila ovapaani ondjila opo va dule okupewa omhepo iyapuki, va ninge Ovakriste nova ninge yo oilyo yOuhamba. — Oilonga 10:30-35, 44, 45.

Osha hala okutya ngahelipi ‘okuya mouhamba’?

Ovo tava i “mouhamba” otava ka pangela pamwe naJesus meulu. Ombiibeli oya popya kutya otava ka kala “omutumba komalukalwa” notava “ka kala nokupangela kombada yedu.” — Lukas 22:29, 30; Ehololo 5:9, 10.

Omitotolombo kombinga yeeshapi dOuhamba

Omutotolombo: Petrus oye ta hoolola ovo tava i meulu.

Oshili: Ombiibeli oya ti Jesus Kristus oye ta ka ‘tokola ovanamwenyo novafi’ ndele ke fi Petrus. (2 Timoteus 4:1, 8; Johannes 5:22) Petrus naye okwa koleka oushili oo eshi a ti: “Kalunga e mu [Jesus] ninga omutokoli wovanamwenyo nowovafi.” — Oilonga 10:34, 42.

Omutotolombo: Eulu ola teelela Petrus a tokole kutya onaini ta ka longifa eeshapi dOuhamba.

Oshili: Eshi Jesus a li ta popi kombinga yeeshapi dOuhamba, okwa lombwela Petrus ta ti: “Keshe osho to shi mange kombada yedu, otashi kala sha mangwa nomeulu, naasho to shi mangulula kombada yedu, nomeulu otashi ka kala sha mangululwa.” (Mateus 16:19) Nonande ovanhu vamwe ove udite ko kutya Petrus oye ta ningi omatokolo aeshe meulu, oshityalonga shopehovelo shOshigreka osha hala kutya Petrus ota ningi omatokolo ta shikula osho tashi ningwa meulu ndele haye ta tokola. *

Ombiibeli oya popya yo kutya Petrus okwa li ha dulika eshi a li ta longifa eeshapi dOuhamba. Pashihopaenenwa, okwa li a dulika komalombwelo aKalunga e na sha nokulongifa oshapi onhinhatu. — Oilonga 10:19, 20.

^ par. 3 Omafimbo amwe ngeenge Ombiibeli tai popi “eeshapi” otai ulike koufembanghenda nosho yo koinakuwanifwa. — Jesaja 22:20-22; Ehololo 3:7, 8.

^ par. 7 Ovasamaria ova li melongelokalunga la yooloka ko kwaalo lomuJuda ashike omahongo amwe nosho yo oinima imwe oyo ya li hai ningwa mo oya li yandja kOmhango yaMoses.

^ par. 15 Konakona ouyelele u na sha naMateus 16:19 oo tau hangwa mOmbiibeli yo-New World Translation of the Holy Scriptures (Ombiibeli yokukonakonwa).