Kadagiti kongregasiontayo, adda dagiti agserserbi ken Jehova iti adun a tawen. Makasursurotayo iti natibker a panagtalekda ken Jehova. Mabalintayo a saludsoden kadakuada ti pakasaritaan ti organisasion ni Jehova ken no ania dagiti karit a napagballigianda iti tulong ni Jehova. Mabalin nga awisentayo dagitoy a patpatgentayo a kakabsat iti panagdaydayaw ti pamiliatayo tapno iyestoriada dagiti kapadasanda.

No maysaka nga aduan kapadasan a Kristiano, iyestoriam dagiti kapadasam kadagiti ub-ubing a Kristiano. Kasta ti inaramid da Jacob ken Jose kadagiti kaputotanda. (Ge 48:21, 22; 50:24, 25) Idi agangay, binilin ni Jehova dagiti ulo ti pamilia nga isuroda kadagiti annakda ti maipapan kadagiti nakaskasdaaw nga aramidna. (De 4:9, 10; Sal 78:4-7) Ita, mabalin nga isuro dagiti nagannak ken ti dadduma iti kongregasion dagiti ub-ubbing maipapan kadagiti nakitada a nakaskasdaaw nga aramid ni Jehova babaen ti organisasionna.

BUYAEN TI VIDEO A PANANGTAGINAYON ITI PANAGKAYKAYSA ITI SIDONG TI PANNAKAIPARIT SA SUNGBATAN DAGITOY A SALUDSOD:

• Kasano a tinulongan ti sangay idiay Austria dagiti kakabsattayo kadagiti dadduma a pagilian a maiparit ti trabahotayo?

• Kasano a nataginayon dagiti kakabsattayo kadagitoy a pagilian ti natibker a pammatida?

• Apay a simmina iti organisasion ni Jehova ti adu nga agibumbunannag idiay Romania, ken kasanoda a nagsubli?

• Kasano a timmibker ti pammatim gapu kadagitoy a kapadasan?