Nasaktanka kadin nga urayka la nagsangit?— * Mabalin a napadasantayo amin daytan. Ngem no dadduma saan laeng a ti bagitayo ti masaktan. Mabalin a masaktan ti riknatayo no adda mangpadakes kadatayo. Saan kadi a nasakit dayta?— Masaktan met ti Dios no saan nga agpayso ti ibagada maipapan kenkuana. Pagsaritaanta no kasanotayo a maparagsak ken masaktan ti Dios.

Dakamaten ti Biblia a kuna ti dadduma nga ay-ayatenda ti Dios ngem “sinaktanda ti riknana.” Wen, “pinasakitanda” ti Dios! Kitaenta ngarud no apay a masaktan ni Jehova no ditay aramiden ti ibagana kadatayo.

Ti dua nga immuna a tao a pinarsua ni Jehova ditoy daga ti namagladingit kenkuana. Pinagnaedna ida iti Paraiso ditoy daga a maawagan iti “hardin ti Eden.” Siasino dagitoy?— Wen, ni Adan ken Eva. Kitaenta no ania ti inaramidda a namagladingit ken Jehova.

Kalpasan nga inkabil ida ni Jehova iti hardin, imbagana nga aywananda. Imbagana pay a mabalin a maaddaanda iti annak ken agkakaduada nga agbiag nga agnanayon iti hardin. Ngem sakbay a naaddaan iti annak da Adan ken Eva, adda dakes a napasamak. Ammom kadi no ania ti napasamak?— Maysa nga anghel ti nangsulisog ken Eva, kalpasanna ni Eva sinulisogna met ni Adan nga agsukir ken Jehova. Kitaenta no ania ti napasamak.

Ti anghel pinagparangna a kasla agsasao ti uleg. Nagustuan ni Eva ti nangngegna nga ibagbaga ti uleg nga agbalin a “kas iti Dios.” Isu nga inaramidna ti imbaga ti uleg kenkuana. Ammom kadi no ania ti imbaga ti uleg?—

 Nangan ni Eva iti bunga ti kayo nga imbaga ni Jehova ken Adan a saanda a kanen. Sakbay a pinarsuana ni Eva, kinuna ti Dios ken Adan: “Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.”

Ammo ni Eva dayta a linteg. Ngem intultuloyna a kinita dayta a kayo, ket nakitana a “nasayaat a pagtaraon ken maysa a banag a pakailiwan dagiti mata . . . Gapuna rinugianna ti nangala iti bungana ket kinnanna dayta.” Idi agangay, inikkanna met ni Adan ket ‘kinnanna dayta.’ Panagkunam, apay a nangan ni Adan?— Gapu ta ni Adan ad-adda nga inayatna ni Eva ngem ni Jehova. Pinilina nga ay-ayuen ni baketna ngem iti Dios. Nupay kasta, napatpateg ti agtulnog ken Jehova ngem iti asinoman!

Malagipmo pay kadi ti uleg a nakisarita ken Eva? No kasano a mapagparang ti maysa a tao a kasla agsasao ti maysa a munieka, kasta met ti napasamak iti uleg. Makin-timek ti naggapu iti uleg?— Timek dayta ti “kadaanan a serpiente [wenno uleg], daydiay naawagan iti Diablo ken Satanas.”

Ammom kadi no kasanom a maparagsak ni Jehova?— Maaramidmo dayta no kanayon nga agtulnogka kenkuana. Kuna ni Satanas a mapagtulnogna ti amin a mangaramid iti kayatna. Isu nga iparparegta ni Jehova kadatayo: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” Ni Satanas padpadaksen wenno lalaisenna ni Jehova. Kunana a mapagtallikudna amin a tao tapno saanda nga agserbi ken Jehova. Isu a maparagsakmo ni Jehova no agtulnog ken agserbika kenkuana! Aramidem kadi ti amin a kabaelam nga agserbi kenkuana?—