Saludsod Dagiti Agbasbasa

Pudno Kadi a Persona ti Diablo?

Wen, isursuro ti Biblia a pudno a persona ni Satanas a Diablo. Ngem dagiti kritiko ti Biblia uyawenda ti kasta a panangiladawan iti Diablo. Kunada a ni Satanas isimbolona laeng ti kinadakes nga adda iti tao.

Pakasdaawantayo kadi nga adda nagduma a kapanunotan maipapan iti kinasiasino ni Satanas? Saan a pulos. Kas panangyilustrar: Mabalin nga ikkaten ti kriminal ti lammana iti nakapasamakan ti krimen tapno saan a maammuan ti kinasiasinona ket maitultuloyna ti ilegal nga ar-aramidenna. Umasping iti dayta, ni Satanas ti lider nga adda iti likud ti amin a kinadakes. Ni Jesus silalawag a tinukoyna ni Satanas kas ti utek ti dakes a kasasaad ti lubong ita. Inawaganna ni Satanas kas “ti agturay iti daytoy a lubong.”​—Juan 12:31.

Nagtaudan ti Diablo? Isu ket naparsua idi kas perpekto nga espiritu idiay langit. Daytoy a nagrebelde nga anghel pinagbalinna ti bagina a Diablo idi tinarigagayanna ti panagdayaw kenkuana dagiti tattao imbes nga iti Dios. Inlanad ti Biblia ti panagsarita idi da Satanas ken Jesus ditoy daga, a nangipalgak iti agimbubukodan nga ambision ti Diablo. Pinadasna a ‘pagruknoyen ni Jesus ken mangaramid iti maysa a tignay a panagdayaw’ kenkuana.​—Mateo 4:8, 9.

Uray iti panagsaritada iti Dios a nailanad iti libro a Job, impalgak ni Satanas ti motibona. Saan nga agsardeng agingga a mapagtallikudna dagiti tattao iti Dios.​—Job 1:13-19; 2:7, 8.

Usigem daytoy: No ni Satanas nakasaritana ni Jehova a Dios ken ni Jesu-Kristo, kasano koma nga isu ket maysa laeng a kinadakes nga adda iti maysa nga indibidual? Awan la ketdi ti kinadakes iti Dios ken iti Anakna! Nalawag ngarud a pudno a persona ni Satanas​—maysa a dakes nga espiritu a parsua nga awan panagraemna ken Jehova wenno ken Jesus.

Ti dakes a kasasaad ti lubong ita ket pammaneknek nga adda Diablo. Dagiti nasion baybay-anda a madadael dagiti sobra a taraon uray mabisbisinan dagiti umilida. Agurnongda kadagiti mangtalipupos nga igam nga usarenda a mangikisap iti maysa ken maysa. Punuenda ti daga iti polusion. Kaskasdi, saan nga ammo ti kaaduan a tattao ti gubuayan ti kasta a napnuan gura ken makadadael iti bagi a kababalin. Apay?

Ipalgak ti Biblia a ni Satanas “binulsekna ti pampanunot dagiti di manamati.” (2 Corinto 4:4) Tapno makontrolna dagiti tattao, us-usarenna ti maysa a di makita nga organisasion. Isu ti “agturay kadagiti sairo.” (Mateo 12:24) No kasano a ti utek ti sindikato maimatonanna ti dakkel nga ilegal nga organisasion uray saanna nga ipalgak ti kinasiasinona kadagiti dadduma a miembrona, us-usaren met ni Satanas ti nasikap nga organisasion dagiti dakes nga anghelna tapno makontrolna ti adu a tattao a saan a makaammo iti papel wenno impluensiana.

Anian a yamantayo ta imbutaktak ti Biblia ti kinasiasino ti Diablo ken ti organisasionna! Gapu iti dayta, ammotayo no kasano a sarangten ti impluensiana. Iparegta kadatayo ti Biblia: “Agpasakupkayo iti Dios; ngem busorenyo ti Diablo, ket isu agtalawto kadakayo.”​—Santiago 4:7.