[manipud Heb., kaipapananna ti “Nangted ti Dios”].

 Mabalin a nagan ni Bartolome, maysa ngarud kadagiti 12 nga apostol ni Jesus. Ti Bartolome, a kaipapananna ti “Anak ni Tolmai,” ket maysa nga awag a naala iti nagan ti amana. Inusar ni apostol Juan ti naganna a Natanael, idinto ta Bartolome ti inyawag kenkuana da Mateo, Marcos, ken Lucas. No kasta, pagnanaigen dagitoy a tallo da Felipe ken Bartolome, no kasano met a ni Juan inanaigna ni Felipe ken Natanael. (Mt 10:3; Mr 3:18; Lu 6:14; Jn 1:45, 46) Gagangay nga addaan dagiti tattao iti nasursurok ngem maysa a nagan. Kas pagarigan, “ni Simon nga anak ni Juan” ket pagaammo met kas Cefas ken Pedro. (Jn 1:42) Saan met a naidumduma ti pannakaawag ni Natanael iti Bartolome, wenno ti “Anak ni Tolmai,” ta adda met sabali pay a tao a naawagan laeng iti Bartimeo, wenno “Anak ni Timeo.” (Mr 10:46) Ti dua a nagan a Natanael ken Bartolome ket agsinsinnukat nga inusar dagiti Kristiano a mannurat kadagidi simmaganad a siglo.

 Ni Natanael ket manipud Cana ti Galilea. (Jn 21:2) Nangrugi a simmurot ken Jesus iti nasapa a paset ti ministerio ti Apo. Kalpasan a nagtignay ni Felipe iti awis ni Jesus nga “Agbalinka a pasurotko,” binirokna a dagus ti gayyemna a ni Natanael ket inawisna nga ‘umay ket kitaenna’ ti Mesias. Inimtuod ni Natanael, “Mabalin aya a tumaud manipud Nazaret ti aniaman a banag a naimbag?” ngem kalpasanna nagtignay iti awis. Kinuna ni Jesus idi makitana nga umas-asideg ni Natanael: “Kitaenyo, sigurado a maysa nga Israelita, a kenkuana awan ti allilaw.” Mabalin a nagsayaat a tao ni Natanael isu a naibaga ni Jesus ti kasta. Gapu itoy a sinao ni Jesus ken iti imbagana a nakitana ni Natanael iti sirok ti kayo a higos sakbay nga inayaban ni Felipe, imbaga ni Natanael a ni Jesus ket pudno nga isu “ti Anak ti Dios, . . . Ari ti Israel.” Impasigurado kenkuana ni Jesus a ‘makakitanto iti bambanag a dakdakkel ngem dagitoy.’​—Jn 1:43-51.

 Kas maysa kadagiti 12, ni Natanael ket kankanayon a kadua ni Jesus iti intero a ministeriona, a nasanay maipaay iti panagserbi iti masanguanan. (Mt 11:1; 19:25-28; 20:17-19, 24-28; Mr 4:10; 11:11; Jn 6:48-67) Kalpasan ti ipapatay ken panagungar ni Jesus, ni Natanael ken ti dadduma pay kadagiti apostol ket nagsubli iti trabahoda a panagkalap, ket iti maysa nga agsapa bayat nga umas-asidegda iti takdang a siluluganda iti barangay, inayaban ida ni Jesus. Saan a kas ken Pedro, nagtalinaed ni Natanael iti barangay agingga a nakadanon dayta iti takdang, ket kalpasanna, bayat ti pammigat a kadua ti dadduma pay, dimngeg a naimbag ni Natanael iti nagpateg a panagpatang da Jesus ken Pedro. (Jn 21:1-23) Adda met idi ni Natanael a kadua ti sabsabali pay nga apostol idi agtataripnongda tapno agkararagda ken idi aldaw ti Pentecostes.​—Ara 1:13, 14; 2:42.