Panagririri].

  1. Maysa a lugar nga adda iti asideg ti nagpakarsuan dagiti Israelita idiay Refidim bayat ti kaaddada iti let-ang. Sadiay a namilagruan nga impaayan ida ni Jehova iti danum idi a ni Moises ket impang-orna ti sarukodna iti bato idiay Horeb. Isu nga inawagan ni Moises dayta a disso iti “Massah” (kaipapananna ti “Subok; Suot”) ken “Meriba” (kaipapananna ti “Panagririri”). Dagitoy a nagan ti mangipalagip iti pannakiriri ti Israel ken Moises ken ti panangsubokda iti Dios maigapu iti kaawan ti danum.​—Ex 17:1-7.

  2. Ti nagan a “Meriba” ket naipanagan met idi agangay iti maysa a lugar iti asideg ti Cades, a ti met laeng makagapu ket isu ti pannakiriri ti Israel ken Moises kasta met ken Jehova maipapan iti kaawan ti danum. (Nu 20:1-13) Daytoy a Meriba ket saan a napanaganan iti Massah kas iti naaramid iti lugar iti asideg ti Refidim, a nagpakarsuan dagiti Israelita iti nakurang a dua a bulan kalpasan ti iruruarda iti Egipto (Ex 16:1; 17:1; 19:1). Adda gundaway nga iduma dayta ti Kasuratan iti sabali pay a lugar babaen ti panangtukoyna iti “dandanum ti Meriba” (Sal 106:32) wenno “ti dandanum ti Meriba iti Cades.” (Nu 27:14; De 32:51) Nupay kasta, ti nadakamat iti Salmo 81:7 a panangsukimat ni Jehova iti Israel babaen ti “dandanum ti Meriba” ket mabalin a tumukoy iti daydiay napasamak idiay Meriba nga adda iti asideg ti Refidim.​—Idiligyo ti De 33:8.

 Saan a sinantipikar da Moises ken Aaron ni Jehova iti daydiay napasamak a namilagruan a pannakaipaay ti danum iti Meriba idiay lugar ti Cades. Isu a napukawda ti pribilehioda a sumrek iti Naikari a Daga. Kasla napasamak daytoy idi maika-40 a tawen ti panagallaalla ti Israel idiay let-ang.​—Nu 20:1, 9-13, 22-28; 33:38, 39.