[nalabit napaababa a porma ti Heb. a Matitias, kaipapananna ti “Sagut ni Jehova”].

 Maysa a Judio a pagaammo met kas Levi, a nagbalin nga apostol ni Jesu-Kristo ken mannurat iti Ebanghelio a napanaganan iti naganna. Ni Mateo ket anak ti maysa nga agnagan Alfeo ken sakbay a nagbalin a maysa kadagiti adalan ni Jesus isu ket maysa nga agsingsingir iti buis. (Mt 10:3; Mr 2:14; kitaenyo ti AGSINGSINGIR ITI BUIS.) Saan nga ibaga ti Kasuratan no agnagan metten ni Levi iti Mateo sakbay a nagbalin nga adalan ni Jesus, naipanagan kenkuana idi nagbalin nga adalan, wenno impanagan dayta ni Jesus kenkuana idi nadutokan kas maysa nga apostol.

 Agparang nga idi rugrugi ti ministerio ni Jesu-Kristo idiay Galilea (30 wenno nasapa a paset ti 31 K.P.) inayabanna ni Mateo nga adda iti pagsingiran iti buis idiay Capernaum wenno iti asideg  dayta. (Mt 9:1, 9; Mr 2:1, 13, 14) ‘Pinanawan ni Mateo ti amin a banag, timmakder ket simmurot ken Jesus.’ (Lu 5:27, 28) Nalabit tapno rambakan ti pannakaawisna kas maysa a pasurot ni Kristo, “nangisagana [ni Mateo] . . . iti dakkel a padaya ti panangabrasa,” a dinar-ayan ni Jesus ken dagiti adalanna kasta met ti adu nga agsingsingir iti buis ken managbasol. Daytoy ket nagrurodan dagiti Fariseo ken eskriba, isu a nagtanabutobda maipapan iti pannakipangan ken pannakiinum ni Kristo kadagiti agsingsingir iti buis ken kadagiti managbasol.​—Lu 5:29, 30; Mt 9:10, 11; Mr 2:15, 16.

 Idi agangay, kalpasan ti Paskua ti 31 K.P., pinili ni Jesus ti 12 nga apostol, ket maysa kadakuada ni Mateo. (Mr 3:13-19; Lu 6:12-16) Nupay namin-adu a tinukoy ti Biblia dagiti apostol kas maysa a grupo, saannan a dinakamat ti nagan ni Mateo agingga idi immulin ni Kristo sadi langit. Nakita ni Mateo ti napagungar a ni Jesu-Kristo (1Co 15:3-6), immawat kadagiti maudi a bilin manipud ken Jesus, ken nakitana nga immuli sadi langit. Kalpasan daytoy, isu ket nagsubli idiay Jerusalem a kaduana ti dadduma pay nga apostol. Adda idi dagiti apostol iti maysa a makinngato a siled sadiay, ket ni Mateo nainaganan a kaduada a mismo, isu a maysa kadagiti 120 nga adalan nga immawat iti nasantuan nga espiritu idi aldaw ti Pentecostes 33 K.P.​—Ara 1:4-15; 2:1-4.