[Heb., tan].

 Kita ti atap nga aso nga addaan iti atiddog, natirad a sungo ken napuskol nga ipus, ken umarngi unay iti sora. Daytoy nga animal (Canis aureus) masalaw pay laeng idiay Palestina. Nupay ti chacal mabalin a darupenna ken papatayenna ti agtatayab ken uray pay dagiti kordero ken, iti kinapudnona, pagbiagna ti gistay aniaman a banag, agraman prutas, kangrunaanna a maysa dayta a managlamut nga agtaraon iti agruprupsa a lasag. Ngarud, makagunggona a serbisio ti ar-aramiden ti animal, yantangay ti agruprupsa a lasag mabalin nga agserbi a pagpaaduan dagiti igges. Dagiti chacal kadawyan nga aganupda iti rabii, sinaggaysa, sinagdudua, wenno saggabassit a bunggoy. Iti aldaw gagangay a maturogda kadagiti langalang a disso, ab-abut iti daga, rukrukib, nagpanawan a patpatakder, wenno rebrebba.

 Yantangay agtataeng dagiti chacal iti let-ang, langalang, ken maradesierto pay a luglugar, ti pagturayan ti chacal ket piguratibo a maar-aramat iti Kasuratan a mangirepresentar iti kasasaad a nabatad a kinalangalang, nga awanan agnanaed a tao. Usaren ti nagduduma a padto daytoy a ladawan tapno ipakpakauna ti pannakalangalang agpaay iti Jerusalem, dagiti siudad ti Juda, Hasor, Babilonia, ken Edom. (Jer 9:11; 10:22; 49:33; 51:37; Isa 34:5, 13; Mal 1:3) Tukoyen met ti Biblia ti naleddaang a panagdung-aw, wenno panagtaguob, ti chacal. (Isa 13:22; Mik 1:8) Ti panagikkis ti chacal mangrugi iti ilelennek ti init ken nakapapaut dayta a panagdung-aw, mamitlo wenno mamimpat a maulit, a kada panangulit nangatngato bassit ti ayugna ngem iti immuna. Kamaudiananna agpatingga ti panagdung-aw babaen ti agsasaruno nga ababa, nakapigpigsa, agal-alang-ang a taul.

 Iti Kasuratan maulit-ulit a maitampok ti chacal iti mangiladawan a kasasaad. Ni Job, iti panangdeskribirna iti mismo a nakalkaldaang a kasasaadna, iyebkasna nga isu nagbalin a “maysa a kabsat kadagiti chacal.” (Job 30:29) Maipapan iti mangipababa a pannakaabak ti ili ti Dios, ti salmista, nalabit iti panangtukoy iti pagbabakalan a paguummongan dagiti chacal tapno agtaraonda kadagidiay napapatay (idiligyo ti Sal 68:23), indung-awna: “Rinumeknakami iti lugar dagiti chacal.” (Sal 44:19) Ti pananglakub ti Babilonia iti Jerusalem idi 607 K.K.P. nangyeg iti pannakaparigat iti bisin, a nagbanag iti siuulpit a panangtrato dagiti inna iti bukodda nga annak. Ngarud siuumiso a pinaggidiat ni Jeremias ti kinaulpit “ti ilik” iti panangaywan dagiti chacal kas inna.​—Un 4:3, 10.

 Maigapu kadagiti nakaro a tikag iti daga ti Juda idi naawanan iti pamendision ni Jehova, nailadawan dagiti sebra kas mangsaysay-up iti angin, kayatna a sawen, agan-anangsab, kas kadagiti chacal. (Jer 14:1, 2, 6) Iti sabali a bangir, maipapan iti pannakaisubli ti ilina, inkari ni Jehova a ti disso a pagyanan dagiti chacal maaddaan iti ruot, runruno, ken mulmula a papiro. Ket ti panangipaay ni Jehova iti danum iti ilina iti let-ang tignayenna dagiti animal a kas iti chacal a mangidayaw kenkuana.​—Isa 35:7; 43:20, 21.