Jeremias 10:1-25
10 Denggenyo ti imbaga ni Jehova maibusor kadakayo, O tattao ti Israel.
2 Daytoy ti kinuna ni Jehova:
“Diyo sursuruen ti dalan dagiti nasion,+Ket diyo pagbutngan dagiti pagilasinan iti langitTa dagita ti pagam-amkan dagiti nasion.+
3 Ta awan ti serserbi dagiti kaugalian ti tattao.
Ta kayo laeng dayta a napukan iti bakir,Nga inaramid dagiti ima ti eksperto a trabahador babaen ti remientana.*+
4 Ar-arkosanda dayta iti pirak ken balitok+Ken pagkakamangenda kadagiti lansa tapno saan a matumba.+
5 Dida makasao a kas iti bambanti iti talon a namulaan iti pipino.+Masapul a mabagkatda ta saanda a makapagna.+
Diyo kabuteng ida ta saandakayo a madangran,Wenno awan ti aniaman a nasayaat a maaramidda kadakayo.”+
6 Awan ti kas kenka, O Jehova.+
Naindaklanka! Naindaklan ken mannakabalin ti naganmo.
7 Asino ti saan nga agbuteng kenka, O Ari dagiti nasion,+ ta maikarika iti dayta;Gapu ta iti amin a masirib a tattao kadagiti nasion ken pagarianda,Awan a pulos ti kas kenka.+
8 Aminda ket awan naknakemna ken maag.+
Ti panagpaiwanwan iti kayo ket talaga nga awan ti serserbina.+
9 Naggapu dagiti pirak idiay Tarsis+ ken naggapu dagiti balitok idiay Ufaz,Aramid dagita ti eksperto a trabahador, aramid ti ima ti latero.
Asul ken purpura a sinulid ti naaramid a badoda.
Inaramid amin dagita dagiti eksperto a trabahador.
10 Ngem ni Jehova ti pudno a Dios.
Isu ti sibibiag a Dios+ ken ti agnanayon nga Ari.+
Gapu iti kasta unay a pungtotna, agginggined ti daga,+Ket awanto ti nasion a makaibtur iti nakaro nga ungetna.
11 * Daytoy ti masapul nga ibagam kadakuada:
“Dagiti didiosen a saan a nangaramid iti langit ken iti dagaKet mapukawto ditoy daga ken iti baba ti langit.”+
12 Isu ti Nangaramid iti daga babaen ti pannakabalinna,Daydiay nangaramid iti nabunga a daga babaen ti siribna+Ken Daydiay nangyunnat iti langit babaen ti pannakaawatna.+
13 No ipangngegna ti timekna,Makibur dagiti danum iti langit,+Ken ipangatona dagiti ulep* manipud kadagiti ungto ti daga.+
Mangaramid iti kimat* para iti tudo,Ken iruarna ti angin kadagiti pagiduldulinanna.+
14 Tunggal tao ket agtigtignay nga awan nakemna ken awan ammona.
Maibabainto ti tunggal latero gapu iti kinitikitan nga imahen;+Ta saan a pudno ti inaramidna a metal nga imahen,*Ken awan angesda.*+
15 Awan ti serserbi dagita ken banag a mauy-uyaw.+
Inton aldaw ti pannakasingirda, madadaeldanto.
16 Ti Bingay ni Jacob ket saan a kas kadagitoy a banag,Ta isu Daydiay nangaramid iti amin,Ket ti Israel ti sarukod ti tawidna.+
Jehova a panguluen dagiti armada ti naganna.+
17 Alaem ti kargam manipud iti daga,O babai nga agnanaed iti lugar a nasakup.
18 Ta daytoy ti kuna ni Jehova:
“Ipalladawko* ita dagiti agnanaed iti daga,+Ket baybay-akto nga agrigatda.”
19 Kaasiak pay gapu iti pannakadunorko!*+
Saan a maagasan ti sugatko.
Ket imbagak: “Sigurado a daytoy ti sakitko isu a masapul nga ibturak.
20 Nadadaelen ti toldak, ken napugsapugsaten dagiti galut ti toldak.+
Pinanawandakon dagiti annakko ket awandan.+
Awanen ti mangyukrad ken mangibangon iti toldak.
21 Ta minamaag ti inaramid dagiti papastor,+Ken saanda a nagsaludsod ken Jehova.+
Isu a saan a masirib ti panagtignayda,Ket naiwarawara ti amin nga arbanda.”+
22 Denggenyo ti kasangsangpet a damag!
Ti napigsa a karibuso manipud iti daga iti amianan,+A mamagbalin kadagiti siudad iti Juda a langalang ken pagaponan dagiti chakal.+
23 O Jehova, ammok a saan a kabaelan ti tao nga idalan ti bagina.
Saan a naikkan ti tao iti autoridad a mangiturong uray iti addangna.+
24 Ilintegnak, O Jehova, maitunos iti hustisiam,Ngem saan a babaen ti ungetmo,+ tapno saannak a dadaelen.+
25 Ipapasmo ti pungtotmo kadagiti nasion a di mangikankano kenka,+Ken kadagiti pamilia a saan nga umaw-awag iti naganmo.
Ta inibusda ni Jacob,+Wen, inibusda agingga nga awan ti nabati,+Ken dinadaelda ti nasionna.+
Footnotes
^ Wenno “kimmawit a pandarasna.”
^ Ti ber. 11 ket orihinal a naisurat iti Aramaiko.
^ Wenno mabalin nga, “aribengbeng.”
^ Wenno “alingasaw.”
^ Wenno “sinukog nga estatua.”
^ Lit., “espirituda.”
^ Wenno “Ipallatibongko.”
^ Wenno “pannakabullok!”
