[Nagaramid ti Dios].

  1. Anak ni Zeruia a kabsat a babai ni David wenno kabsatna iti ama, kasta met a kabsat da Abisai ken Joab; ngarud, kaanakan ni David. (1Cr 2:15, 16) Napadayawan a karaman iti 30 a nakalalaing a mannakigubat iti sidong ni David, ni Asael ket nangnangruna a nabigbig iti kinaparagsitna, “kas iti maysa kadagiti gasela nga adda iti nawayang a tay-ak.” (2Sm 2:18; 23:24) Daytoy ti nakaigapuan ti pannakaisagmakna. Kalpasan ti mangsubok a dangadang idiay Ban-aw ti Gabaon ken ti imbungana a pannakaabak ti buybuyot dagiti Israelita iti sidong ni Abner, sipipinget a kinamat ni Asael ti agtaltalaw a ni Abner. Kalpasan ti namindua a panagpakaasina a sumardeng ni Asael, ti nabileg a ni Abner induyokna ti murdong a putan ti pikana a sinalputna ti buksit ni Asael, ket dagus a natay ni Asael. Nupay idi agangay pinasardeng ni Joab a kabsat ni Asael ti buybuyot dagiti taga Juda kas panangipangagna kadagiti indagadag ni Abner, adda sakit ti nakem nga ing-ingpen ni Joab gapu iti ipapatay ni Asael, iti kasta iti naud-udi a gundaway sisisikap nga immaniobrana ti kasasaad tapno mapapatayna ni Abner babaen iti kampilan.​—2Sm 2:12-28; 3:22-27.

 Iti 1 Cronicas 27:7 nailista ni Asael kas komandante ti benneg iti binulan nga urnos dagiti buyot. Yantangay natay ni Asael sakbay ti panagbalin ni David kas ari iti intero nga Israel, ti pannakadakamatna ditoy mabalin a tumukoy iti balayna, nga inrepresentaran ti anakna a ni Zebadias, a natukoy iti teksto kas suno ni Asael. Ti kanayonan a singasing ket impaay ti The Interpreter’s Dictionary of the Bible (inurnos ni G. A. Buttrick, 1962, Tomo 1, p. 244): “Posible a daytoy ti kaunaan nga armada ni David a buklen dagiti umili, a naorganisar iti nasapa a paset ti panagturay ti ari iti Juda, ket daytoy nga orihinal a listaan napabaro babaen ti pannakairaman ni Zebadias, anak ken suno ni Asael iti daytoy a panagbilin.”​—Idiligyo ti 1Cr 12.

  2. Maysa kadagiti Levita a nadutokan a mangisuro iti Linteg iti intero a Juda, nangrugi iti maikatlo a tawen ti panagturay ni Jehosafat (934 K.K.P.).​—2Cr 17:7, 8; idiligyo ti De 33:8-10.

  3. Maysa a komisionado nga agserserbi iti templo bayat ti panagturay ni Ezekias (745-717 K.K.P.) mainaig kadagiti kontribusion ken apagkapullo.​—2Cr 31:13.

  4. Ti ama ti maysa nga agnagan Jonatan, kapatadan ni Esdras.​—Esd 10:15; kitaenyo ti JAZIAS.