Juan 9:1-41
9 Ita bayat nga isu lumablabas nakitana ti maysa a lalaki a bulsek nanipud pannakayanakna.
2 Ket inimtuod kenkuana dagiti adalanna: “Rabbi,+ siasino ti nagbasol,+ daytoy a lalaki wenno dagiti nagannakna,+ iti kasta isu nayanak a bulsek?”
3 Simmungbat ni Jesus: “Saan a nagbasol daytoy a lalaki wenno uray dagiti nagannakna, no di ket tapno maiparangarang dagiti aramid ti Dios iti kasasaadna.+
4 Masapul nga aramidentayo dagiti trabaho daydiay nangibaon kaniak bayat nga aldaw pay;+ um-umayen ti rabii+ inton awanen ti tao a makapagtrabaho.
5 Agingga nga addaak iti lubong, siak ti silaw ti lubong.”+
6 Kalpasan a naisaona dagitoy a banag, timmupra iti daga ket nangaramid iti pitak babaen iti katay, ket inkabilna ti pitakna kadagiti mata ti lalaki+
7 ket kinunana kenkuana: “Mapanka agdiram-os+ idiay ban-aw ti Siloam”+ (a naipatarus a ‘Naibaon’). Ket iti kasta napan ken nagdiram-os,+ ket nagsubli a makakitan.+
8 Gapuna dagiti kaarruba ken dagidiay sigud a makakitkita nga isu agpalpalama rinugianda a kunaen: “Saan kadi a daytoy daydi lalaki nga agtugtugaw ken makilimlimos?”+
9 Ti sumagmamano kunada: “Isu daytoy.” Ti dadduma kunada: “Saan a pulos, no di ket kaaspingna.” Kuna ti lalaki: “Siak daydi.”
10 Iti kasta rinugianda a kunaen kenkuana: “Kasano, ngarud, a naluktan dagita matam?”+
11 Simmungbat: “Ti lalaki a naawagan Jesus nangaramid iti pitak ket impulagidna kadagiti matak ket kinunana kaniak, ‘Mapanka idiay Siloam+ ket agdiram-oska.’ Napanak ngarud ket nagdiram-osak ket naaddaanak iti panagkita.”
12 Gapu itoy kinunada kenkuana: “Sadino ti ayan dayta a lalaki?” Kinunana: “Diak ammo.”
13 Impanda kadagiti Fariseo ti mismo a lalaki a sigud a bulsek.
14 Nairanrana a Sabbath+ iti daydi aldaw nga inaramid ni Jesus ti pitak ken linuktanna dagiti matana.+
15 Iti daytoy a tiempo, ngarud, nagim-imtuod met dagiti Fariseo no kasano a naaddaan iti panagkita.+ Kinunana kadakuada: “Nangikabil iti pitak kadagiti matak, ket nagdiram-osak ket naaddaanak ti panagkita.”
16 Gapuna rinugian a kunaen ti sumagmamano kadagiti Fariseo: “Daytoy ket saan a tao a naggapu iti Dios, agsipud ta saanna a ngilinen ti Sabbath.”+ Rinugian a kunaen ti dadduma: “Kasano a ti tao a managbasol makaaramid kadagiti kasta a kita ti pagilasinan?”+ Gapuna adda panagsusupadi+ iti nagbabaetanda.
17 Gapuna kinunada manen iti daydi bulsek a lalaki: “Ania ti makunam maipapan kenkuana, yantangay linuktanna dagita matam?” Kinuna ti lalaki: “Isu maysa a mammadto.”+
18 Nupay kasta, saan a namati dagiti Judio maipapan kenkuana nga isu bulsek idi ket naaddaan ti panagkita, agingga nga inayabanda dagiti nagannak ti lalaki a naaddaan ti panagkita.
19 Ket inimtuodda kadakuada: “Daytoy aya ti anakyo a kunayo a nayanak a bulsek? Kasano, ngarud, a makakita itan?”
20 Idin kas sungbat kinuna dagiti nagannakna: “Ammomi a daytoy ti anakmi ken nayanak a bulsek.
21 Ngem no kasano a makakita itan saanmi nga ammo, wenno no siasino ti nanglukat kadagiti matana saanmi nga ammo. Imtuodenyo kenkuana. Isu nataenganen. Masapul nga agsao maipaay iti bagina.”
22 Kinuna dagiti nagannakna dagitoy a banag agsipud ta agbutengda+ idi kadagiti Judio, ta nagaanamonganen dagiti Judio a, no adda asinoman a mangipudno kenkuana kas Kristo, rebbeng a mailaksid manipud iti sinagoga.+
23 Daytoy ti makagapu a kinuna dagiti nagannakna: “Isu nataenganen. Pagsaludsodanyo.”
24 Gapuna iti maikadua a daras inayabanda ti lalaki a bulsek idi ket kinunada kenkuana: “Idayawmo ti Dios;+ ammomi a managbasol daytoy a tao.”
25 Kalpasanna simmungbat: “No isu managbasol diak ammo. Maysa a banag ti ammok, nga, idinto ta bulsekak idi, makakitaak itan.”
26 Gapuna kinunada kenkuana: “Ania ti inaramidna kenka? Kasano a linuktanna dagita matam?”
27 Simmungbat kadakuada: “Imbagakon kadakayo, ket kaskasdi a saankayo a nagimdeng. Apay a kayatyo manen a mangngeg dayta? Kayatyo kadi ti agbalin met nga ad-adalanna?”
28 Gapu itoy rinabngisda ket kinunada: “Maysaka nga adalan dayta a tao, ngem dakami ket ad-adalan ni Moises.
29 Ammomi a ti Dios nagsao ken Moises;+ ngem no maipapan iti daytoy a tao, saanmi nga ammo no sadino ti naggapuanna.”+
30 Kas sungbat kinuna kadakuada ti lalaki: “Pudno a pagsiddaawan daytoy,+ a saanyo nga ammo no sadino ti naggapuanna, ket kaskasdi a linuktanna dagiti matak.
31 Ammotayo a ti Dios saanna nga imdengan dagiti managbasol,+ ngem no ti asinoman ket managbuteng iti Dios ken aramidenna ti pagayatanna, imdenganna daytoy.+
32 Manipud idi ugma saan a pulos nangngegan a ti asinoman linuktanna dagiti mata ti maysa a nayanak a bulsek.
33 No daytoy a tao saan a naggapu iti Dios,+ awan a pulos ti mabalinna nga aramiden.”
34 Kas sungbat kinunada kenkuana: “Naan-anay a nayanakka iti basbasol,+ ket kaskasdi nga isursuronakami aya?” Ket isu pinagtalawda!+
35 Ni Jesus nangngegna a pinagtalawda, ket, idi nasarakanna, kinunana: “Addaanka kadi iti pammati iti Anak+ ti tao?”
36 Ti lalaki simmungbat: “Ket siasino, apo, tapno maaddaanak iti pammati kenkuana?”
37 Kinuna kenkuana ni Jesus: “Nakitamon ken, malaksid iti dayta, ti makisasao kenka isu dayta.”+
38 Idin kinunana: “Addaanak iti pammati kenkuana, Apo.” Ket nagruknoy+ kenkuana.
39 Ket kinuna ni Jesus: “Immayak iti daytoy a lubong maipaay iti daytoy a panangukom:+ tapno makakita dagidiay saan a makakita+ ket agbalin a bulsek dagidiay makakita.”+
40 Dagiti kameng dagiti Fariseo a kimmuyog kenkuana nangngegda dagitoy a banag, ket kinunada kenkuana: “Bulsekkami met kadi?”+
41 Kinuna kadakuada ni Jesus: “No bulsekkayo, awan koma ti basolyo. Ngem ita kunayo, ‘Makakitakami.’+ Ti basolyo+ mataginayon.”
