Juan 13:1-38
13 Ita, agsipud ta ammona sakbay ti piesta ti paskua a ti orasna dimtengen+ maipaay kenkuana tapno pumanaw iti daytoy a lubong nga agturong iti Ama,+ ni Jesus, yantangay inayatna ti kukuana nga adda iti lubong,+ inayatna ida agingga iti panungpalan.
2 Gapuna, bayat a madama idi ti panangrabii, yantangay ti Diablo naikabilnan dayta iti puso ni Judas Iscariote,+ ti anak ni Simon, a liputanna,+
3 isu, yantangay ammona a ti Ama intedna ti amin a bambanag kadagiti imana+ ket isu naggapu iti Dios ken mapan iti Dios,+
4 timmakder manipud iti pangrabii ket impaknina dagiti makinruar a kawesna iti igid. Ket, idi nangala iti tualia, binariksanna ti bagina.+
5 Kalpasan dayta isu nangikabil iti danum iti maysa a palanggana ket rinugianna a bugguan ti saksaka+ dagiti adalan ken pamagaan ida babaen iti tualia a naibarikes kenkuana.
6 Ket idin dimteng ken Simon Pedro. Kinunana kenkuana: “Apo, bugguam kadi dagiti sakak?”+
7 Kas sungbat kinuna kenkuana ni Jesus: “Ti ar-aramidek saanmo a maawatan iti agdama, ngem maawatamto kalpasan dagitoy a banag.”+
8 Kinuna kenkuana ni Pedro: “Pudno unay saanmonto a pulos bugguan dagiti sakak.” Simmungbat kenkuana ni Jesus: “Malaksid no bugguanka,+ awan ti pasetmo kaniak.”
9 Kinuna kenkuana ni Simon Pedro: “Apo, saan laeng a dagiti sakak, no di ket kasta met dagiti imak ken ti ulok.”
10 Kinuna kenkuana ni Jesus: “Ti nagdigusen+ saanna a kasapulan ti ad-adda pay ngem iti mabugguan dagiti sakana, ngem isu naan-anay a nadalus. Ket nadaluskayon, ngem saan nga amin.”
11 Kinapudnona, ammona ti tao a mangliput kenkuana.+ Daytoy ti makagapu a kinunana: “Saankayo a nadalus amin.”
12 Itan, idi nabugguannan dagiti sakada ket naikawesnan dagiti makinruar a kawesna ket nagsadag manen iti panganan, kinunana kadakuada: “Ammoyo kadi no ania ti inaramidko kadakayo?
13 Awagandak iti, ‘Mannursuro,’+ ken, ‘Apo,’+ ket umiso ti panagsaoyo, ta kastaak.+
14 Ngarud, no siak, nupay Apo ken Mannursuro, binugguak dagiti sakayo,+ rebbengyo met a bugguan dagiti saka ti maysa ken maysa.+
15 Ta impasdekko ti pagtuladan maipaay kadakayo, tapno, kas iti inaramidko kadakayo, rebbeng nga aramidenyo met.+
16 Pudno unay kunak kadakayo, Ti adipen saan a dakdakkel ngem iti apona, saan met a dakdakkel daydiay naibaon ngem iti daydiay nangibaon kenkuana.+
17 No ammoyo dagitoy a banag, naragsakkayo no aramidenyo ida.+
18 Saanak nga agsasao maipapan kadakayo amin; ammok dagidiay pinilik.+ Ngem dayta ket tapno matungpal ti Kasuratan,+ ‘Ti agtartaraon idi iti tinapayko inkusayna ti mukodna a maibusor kaniak.’+
19 Manipuden itoy a kanito ibagbagak kadakayo sakbay a mapasamak dayta,+ tapno inton mapasamak dayta patienyo a siak daydiay.
20 Pudno unay kunak kadakayo, Ti umawat iti asinoman nga ibaonko awatennak met.+ Kalpasanna ti umawat kaniak, awatenna met daydiay nangibaon kaniak.”+
21 Kalpasan ti panangisaona kadagitoy a banag, ni Jesus nariribukan iti espirituna, ket sinaksianna ket kinunana: “Pudno unay kunak kadakayo, Maysa kadakayo ti mangliputto kaniak.”+
22 Dagiti adalan nangrugida nga agkikinnita iti maysa ken maysa, a nariribukanda no siasino ti pagkunkunaanna iti dayta.+
23 Sisasadag idi iti sanguanan ti barukong ni Jesus ti maysa kadagiti adalanna, ket isu dinungdungngo ni Jesus.+
24 Ngarud ni Simon Pedro tinang-edanna daytoy ket kinunana kenkuana: “Ibagam no siasino daydiay pagkunkunaanna iti dayta.”
25 Gapuna ti naud-udi a nadakamat nagsadag iti barukong ni Jesus ket kinunana kenkuana: “Apo, siasino dayta?”+
26 Ngarud ni Jesus simmungbat: “Isu daydiay pangtedak iti sangkapisi nga isawsawko.”+ Ket ngarud, idi naisawsawnan ti sangkapisi, innalana ket intedna ken Judas, ti anak ni Simon Iscariote.
27 Ket kalpasan ti sangkapisi, idin ni Satanas simrek iti naud-udi a nadakamat.+ Ngarud, kinuna kenkuana ni Jesus: “Ti ar-aramidem aramidemon a nadardaras pay.”
28 Nupay kasta, awan kadagidiay sisasadag iti panganan ti nakaammo no iti ania a panggep a kinunana daytoy kenkuana.
29 Iti kinapudnona, impagarup ti dadduma, yantangay ni Judas ti mangig-iggem idi iti kahon ti kuarta,+ nga ibagbaga kenkuana ni Jesus: “Gatangem ti bambanag a kasapulantayo maipaay iti piesta,” wenno mangted iti aniaman a banag kadagiti napanglaw.+
30 Gapuna, kalpasan nga inawatna ti sangkapisi, rimmuar a dagus. Ket rabii idin.+
31 Gapuna idi nakaruaren, kinuna ni Jesus: “Ita ti Anak ti tao maipadayag,+ ket ti Dios maipadayag mainaig kenkuana.
32 Ket isu ipadayagto ti Dios a mismo,+ ket ipadayagnanto a dagus.
33 Babassit nga annak,+ addaak kadakayo iti apagbiit laengen. Sapulendakto; ket kas iti kinunak kadagiti Judio, ‘No sadino ti papanak saanyo a mabalin ti umay,’+ kunaek met kadakayo ita.
34 Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo,+ kasta met nga ayatenyo ti maysa ken maysa.+
35 Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”+
36 Kinuna kenkuana ni Simon Pedro: “Apo, sadino ti papanam?” Simmungbat ni Jesus: “No sadino ti papanak saanmo a mabalin ti sumurot kaniak ita, ngem sumurotkanto kalpasanna.”+
37 Kinuna kenkuana ni Pedro: “Apo, apay a saanko a mabalin ti sumurot kenka ita? Isukokto ti kararuak maigapu kenka.”+
38 Simmungbat ni Jesus: “Isukomto kadi ta kararuam maigapu kaniak? Pudno unay kunak kenka, Saanto a pulos agtaraok ti maysa a kawitan agingga a pinaglikudannak iti mamitlo.”+
