Juan 19:1-42
19 Iti dayta a tiempo, ngarud, ni Pilato innalana ni Jesus ket sinaplitna.+
2 Ket nanglaga dagiti soldado iti korona a sisiitan ket inkabilda iti ulona ket kinawesanda iti purpura a makinruar a kawes;+
3 ket rinugianda ti immasideg kenkuana ket kinunkunada: “Naimbag nga aldawmo, sika nga Ari dagiti Judio!” Kasta met, tinungtungpada ti rupana.+
4 Ket rimmuar manen ni Pilato ket kinunana kadakuada: “Kitaenyo! Iruarko kadakayo tapno maammuanyo nga awan masarakak a biddut kenkuana.”+
5 Ngarud rimmuar ni Jesus, a sikokorona iti sisiitan ken sikakawes iti purpura a makinruar a kawes. Ket kinunana kadakuada: “Adtoy! Ti tao!”
6 Nupay kasta, idi nga isu nakita ti panguluen a papadi ken dagiti opisial, nagpukkawda, a kunkunada: “Isu ilansam! Isu ilansam!”+ Kinuna kadakuada ni Pilato: “Dakayo a mismo alaenyo ket ilansayo, ta awan masarakak nga aniaman a biddut kenkuana.”+
7 Simmungbat kenkuana dagiti Judio: “Addaankami iti linteg,+ ket sigun iti linteg rebbengna ti matay, agsipud ta pinagbalinna ti bagina nga anak ti Dios.”+
8 Ngarud, idi mangngeg ni Pilato daytoy a sao, ad-adda a nagbuteng;
9 ket simrek manen iti palasio ti gobernador ket kinunana ken Jesus: “Sadino ti naggapuam?” Ngem awan insungbat kenkuana ni Jesus.+
10 Gapuna kinuna kenkuana ni Pilato: “Saanka aya nga agsao kaniak?+ Saanmo aya nga ammo nga addaanak iti autoridad a mangluk-at kenka ken addaanak iti autoridad a mangilansa kenka?”
11 Simmungbat kenkuana ni Jesus: “Awan koma a pulos ti autoridadmo a maibusor kaniak no saan a naited kenka manipud ngato.+ Daytoy ti makagapu a ti tao a nangyawat kaniak kenka ket dakdakkel ti basolna.”
12 Gapu itoy a rason intultuloy ni Pilato nga ipamuspusan ti panangluk-at kenkuana. Ngem nagpukkaw dagiti Judio, a kunkunada: “No luk-atam daytoy a tao, saannaka a gayyem ni Cesar. Tunggal tao a mamagbalin iti bagina nga ari agsasao a maibusor ken Cesar.”+
13 Gapuna ni Pilato, kalpasan a nangngegna dagitoy a sasao, inruarna ni Jesus, ket nagtugaw iti tugaw iti panangukom iti disso a naawagan Ti Dappat a Bato, ngem, iti Hebreo, Gabbatha.
14 Itan ket pannakaisagana+ ti paskua; agarup maikanem nga oras idi. Ket kinunana kadagiti Judio: “Kitaenyo! Ti ariyo!”
15 Nupay kasta, impukkawda: “Ikkatem! Ikkatem! Ilansam!” Kinuna kadakuada ni Pilato: “Ilansak aya ti ariyo?” Simmungbat ti panguluen a papadi: “Awan ti arimi no di ni Cesar.”+
16 Iti dayta a tiempo, ngarud, inyawatna kadakuada tapno mailansa.+
Iti kasta innalada ni Jesus.
17 Ket, sibabaklay iti kayo a pagtutuokan a maipaay iti bagina,+ rimmuar+ a napan iti maaw-awagan Disso ti Bangabanga, a maawagan Golgotha iti Hebreo;+
18 ket sadiay inlansada,+ ken dua a sabali pay a lallaki a naikuyog kenkuana, maysa iti daytoy a sikigan ken maysa iti bangir, ngem ni Jesus iti tengnga.+
19 Nangisurat met ni Pilato iti maysa a titulo ket impaskilna iti kayo a pagtutuokan. Naisurat: “Ni Jesus a Nazareno nga Ari dagiti Judio.”+
20 Ngarud adu kadagiti Judio ti nakabasa iti daytoy a titulo, agsipud ta ti disso a nakailansaan ni Jesus ket asideg iti siudad;+ ket naisurat dayta iti Hebreo, iti Latin, iti Griego.
21 Nupay kasta, ti panguluen a papadi dagiti Judio rinugianda a kunaen ken Pilato: “Dika isurat ‘Ti Ari dagiti Judio,’ no di ket daydiay kinunana, ‘Siak ti Ari dagiti Judio.’”
22 Simmungbat ni Pilato: “No ania ti insuratko insuratkon.”
23 Itan idi a dagiti soldado nailansadan ni Jesus, innalada dagiti makinruar a kawesna ket pinagkapatda, maipaay iti tunggal soldado maysa a paset, ken ti makin-uneg a kawes. Ngem ti makin-uneg a kawes awan nagsaipanna, ta naabel manipud iti ngato agingga iti intero a kagayadna.+
24 Gapuna kinunada iti maysa ken maysa: “Saantay a pigisen dayta, no di ket pagbibinnunotantayo no asinonto ti agtagikua iti dayta.” Daytoy ket tapno matungpal ti kasuratan: “Nagbibingayanda dagiti makinruar a kawesko, ket ti pagan-anayko nagbibinnunotanda.”+ Ket ngarud dagiti soldado pudno nga inaramidda dagitoy a banag.
25 Iti denna ti kayo a pagtutuokan ni Jesus, nupay kasta, adda nga agtaktakder ti inana+ ken ti kabsat a babai ti inana; ni Maria+ nga asawa ni Clopas, ken ni Maria Magdalena.+
26 Gapuna ni Jesus, idi makitana ti inana ken ti adalan a dinungdungngona+ nga agtaktakderda iti asideg, kinunana iti inana: “Babai, kitaem! Ti anakmo!”
27 Simmaganad kinunana iti adalan: “Kitaem! Ti inam!” Ket manipuden iti dayta nga oras isu innala ti adalan iti bukodna a pagtaengan.
28 Kalpasan daytoy, idi naammuan ni Jesus nga itan naitungpalen amin a bambanag, tapno ti kasuratan maitungpal kinunana: “Mawawak.”+
29 Nakadisso sadiay ti maysa a basehas a napno iti naalsem nga arak. Gapuna ti maysa nga espongha a napno iti naalsem nga arak inkabilda iti ungkay ti hisopo ket inggaw-atda dayta iti ngiwatna.+
30 Itan, idi naawatnan ti naalsem nga arak, kinuna ni Jesus: “Naitungpalen!”+ ket, idi indumogna ti ulona, inyawatnan ti espirituna.+
31 Idin dagiti Judio, yantangay Panagsagana idi,+ tapno saan koma nga agtalinaed dagiti bagi+ kadagiti kayo a pagtutuokan iti Sabbath, (ta ti aldaw dayta a Sabbath ket naindaklan,)+ kiniddawda ken Pilato a matukkol dagiti sakada ken maikkat dagiti bagi.
32 Ngarud, immay dagiti soldado, ket tinukkolda dagiti saka ti immuna a lalaki ken dagiti saka ti sabali pay a lalaki a nailansa a naikuyog kenkuana.
33 Ngem idi dumtengda ken Jesus, gapu ta nakitada a natayen, saanda a tinukkol dagiti sakana.
34 Ngem maysa kadagiti soldado dinuyokna ti bakrangna iti maysa a pika,+ ket dagus a rimmuar ti dara ken danum.
35 Ket ti nakakita iti dayta sinaksianna, ket ti pangsaksina pudno, ket dayta a tao ammona nga ibagbagana ti pudno a bambanag, tapno mamatikayo met.+
36 Iti kinapudnona, naaramid dagitoy a banag tapno matungpal ti kasuratan: “Awan maysa a tulangna ti marumekto.”+
37 Ken, manen, kuna ti sabali pay a kasuratan: “Kumitadanto iti Daydiay a dinuyokda.”+
38 Ita kalpasan dagitoy a banag, ni Jose manipud Arimatea, nga adalan idi ni Jesus ngem sililimed gapu iti butengna kadagiti Judio,+ kiniddawna ken Pilato nga alaenna koma ti bagi ni Jesus; ket pinalubosan ni Pilato.+ Ngarud immay ket innalana ti bagina.+
39 Kasta met ni Nicodemo, ti lalaki nga immay kenkuana iti rabii iti daydi umuna a gundaway, immay a nangyeg iti sangalukot a mirra ken aloe, agarup sangagasut a libra dayta.+
40 Gapuna innalada ti bagi ni Jesus ket binedbedanda kadagiti patapat nga addaan kadagiti especia,+ kas iti wagas ti kaugalian dagiti Judio a panagisagana a maipaay iti panagitabon.
41 Nairanrana, iti lugar a nakailansaanna adda maysa a minuyongan, ket iti minuyongan maysa a baro a pakalaglagipan a tanem,+ nga awan pay ti naipaidda iti uray kaano.
42 Sadiay, ngarud, maigapu iti panagsagana+ dagiti Judio, impaiddada ni Jesus, agsipud ta ti pakalaglagipan a tanem adda iti asideg.
